بھاگوت جی کو حکومت اور دیش میں فرق سمجھنا ہوگا
موہن بھاگوت کا یہ کہنا کہ اگر ہم کورؤں کی طرح بکھر گئے تو پورا دیش ہار جائے گا، بظاہر اتحاد اور یکجہتی کا پیغام ہے۔ وہ یہ بھی کہتے ہیں کہ ملک میں آج بھی کچھ لوگ انگریزوں کی طرح ’’بانٹو اور حکومت کرو‘‘ کی پالیسی پر عمل کر رہے ہیں۔ لیکن ان بیانات کے اندر چھپے سیاسی مفہوم کو نظرانداز نہیں کیا جا سکتا۔ سوال یہ ہے کہ آخر وہ کون لوگ ہیں جو ملک کو بانٹ رہے ہیں؟ اور کیا ملک کو متحد رکھنے کی ذمہ داری صرف اسی نظریے کے ماننے والوں پر عائد ہوتی ہے جس کی نمائندگی آر ایس ایس اور بی جے پی کرتی ہیں؟
ملک یقیناً کسی ایک فرد، جماعت یا تنظیم سے بڑا ہوتا ہے۔ ہندوستان کی شناخت اس کے تنوع، اس کی کثیر مذہبی اور کثیر تہذیبی روایت اور اختلافات کے باوجود ساتھ رہنے کی صلاحیت سے بنتی ہے۔ یہاں کروڑوں لوگ ایسے ہیں جو بی جے پی کی سیاست سے اتفاق نہیں کرتے، آر ایس ایس کے نظریے کو قبول نہیں کرتے اور حکومت کی پالیسیوں پر سوال اٹھاتے ہیں۔ کیا ان سب کو ملک کے اتحاد کے لیے خطرہ سمجھ لیا جائے؟ اگر ایسا ہے تو پھر جمہوریت اور سیاسی آمریت میں فرق ہی کیا رہ جائے گا؟ موہن بھاگوت کو یہ سمجھنا ہوگا کہ بی جے پی ہندوستان نہیں ہے، آر ایس ایس ہندوستان نہیں ہے اور نہ ہی ان دونوں کی سیاسی و نظریاتی ترجیحات پورے ملک کی اجتماعی خواہشات کی ترجمان ہیں۔ ہندوستان میں حکومتیں بدلتی رہی ہیں، نظریات بدلتے رہے ہیں اور عوام نے وقتاً فوقتاً اپنے ووٹ کے ذریعے اقتدار کے دعوے داروں کو ان کی اوقات بھی یاد دلائی ہے۔ یہی جمہوریت ہے۔ یہاں کسی جماعت کو ہمیشہ اقتدار میں رہنے کا خدائی حق حاصل نہیں ہے۔ یہ بھی ایک دلچسپ حقیقت ہے کہ جب بی جے پی کو عوامی حمایت حاصل ہوتی ہے تو اسے قومی اتحاد اور عوامی مینڈیٹ کا نام دیا جاتا ہے، لیکن جب اپوزیشن جماعتیں حکومت کی پالیسیوں کے خلاف آواز اٹھاتی ہیں تو اسے ملک میں انتشار پیدا کرنے کی سازش قرار دینے کی کوشش ہوتی ہے۔ کبھی احتجاج کرنے والوں کو بیرونی طاقتوں کا آلہ کار بتایا جاتا ہے، کبھی حکومت مخالف تحریکوں کو ملک دشمنی سے جوڑ دیا جاتا ہے اور کبھی یہ تاثر دیا جاتا ہے کہ اقتدار کی تبدیلی ملک کے مفاد کے خلاف ہے۔ آخر یہ کیسا جمہوری تصور ہے جس میں حکومت کی مخالفت تو برداشت نہیں، لیکن حکومت کی ہر پالیسی کی تائید کو حب الوطنی سمجھا جاتا ہے؟ انگریزوں کی ’’بانٹو اور حکومت کرو‘‘ کی پالیسی کا حوالہ دینے والوں کو اپنے گریبان میں بھی جھانکنا چاہیے۔ ملک میں مذہبی شناخت کی بنیاد پر پیدا ہونے والی خلیج، نفرت انگیز بیانات، فرقہ وارانہ سیاست اور انتخابی فائدے کے لیے سماجی تقسیم کو ہوا دینے والے عناصر پر بھی بات ہونی چاہیے۔ اگر ذات، مذہب اور زبان کی بنیاد پر عوام کو ایک دوسرے کے مقابل کھڑا کرنا تقسیم کی سیاست ہے تو اس کا اطلاق صرف مخالفین پر کیوں؟ کیا حکمراں جماعت کے رہنماؤں کے بیانات اور انتخابی مہمات اس تنقید سے بالاتر ہیں؟ اتحاد کا مطالبہ کرنے والوں کو پہلے یہ بتانا چاہیے کہ وہ کس قسم کا اتحاد چاہتے ہیں: برابری کی بنیاد پر قائم اتحاد یا ایک نظریے کے سامنے سب کی غیر مشروط اطاعت؟
اور پھر جمہوریت کا ایک بنیادی سوال بھی ہے۔ کیا کسی سیاسی جماعت کو حاصل ہونے والی انتخابی کامیابی اس بات کا ثبوت ہوتی ہے کہ پورا ملک اس کے ساتھ کھڑا ہے؟ 2019 کے عام انتخابات میں بی جے پی کو ملک بھر میں ڈالے گئے ووٹوں کا تقریباً 37 فیصد ہی ملا تھا۔ اس کا مطلب یہ ہے کہ باقی تقریباً 63 فیصد ووٹ بی جے پی کے امیدواروں کو حاصل نہیں ہوئے تھے۔ کیا ان ووٹروں کو ملک سے الگ سمجھ لیا جائے؟ کیا ان کی سیاسی ترجیحات قومی یکجہتی کے خلاف ہیں؟ 2019 کے انتخابات میں انتخابی بے ضابطگیوں کے حوالے سے بھی سوالات اٹھے تھے۔ اشوکا یونیورسٹی کے محقق سبیا ساچی داس کی تحقیق نے بعض قریبی مقابلوں والی نشستوں پر انتخابی عمل میں ممکنہ بے ضابطگیوں کی نشاندہی کی تھی۔ ایسوسی ایشن فار ڈیموکریٹک ریفارمز اور کامن کاز نے بھی ووٹ ڈالے جانے اور ووٹوں کی گنتی کے اعدادوشمار میں فرق کے معاملے کو عدالت عظمیٰ تک پہنچایا تھا۔ ان سوالات کی شفاف اور غیر جانب دارانہ جانچ ہونی چاہیے، کیونکہ جمہوریت میں انتخابی عمل کی شفافیت پر سوال اٹھانا بھی اتنا ہی ضروری ہے جتنا عوامی مینڈیٹ کا احترام کرنا۔2019 میں بی جے پی 240 نشستوں پر سمٹ گئی اور اسے حکومت بنانے کے لیے اپنے اتحادیوں کی حمایت درکار ہوئی۔ یہ صورت حال اس بات کا ثبوت ہے کہ ہندوستانی عوام کے سیاسی فیصلے بدلتے رہتے ہیں اور کسی ایک جماعت کی مقبولیت کو پورے ملک کی متفقہ رائے قرار نہیں دیا جا سکتا۔
موہن بھاگوت اگر واقعی ملک کو متحد دیکھنا چاہتے ہیں تو انہیں یہ بھی بتانا ہوگا کہ اختلاف کرنے والوں کے لیے اس ملک میں کتنی جگہ ہے؟ کیا مسلمان، عیسائی، سکھ، دلت، آدی واسی، بائیں بازو کے حامی، لبرل اور سیکولر نظریات رکھنے والے لوگ بھی اسی ہندوستان کا حصہ ہیں جس کی عظمت کے لیے وہ اتحاد کا مطالبہ کر رہے ہیں؟ کیا ان کی شناخت، ان کے حقوق اور ان کی سیاسی آزادی بھی قومی یکجہتی کا حصہ ہیں یا انہیں کسی ایک مخصوص تہذیبی اور نظریاتی سانچے میں ڈھلنا ہوگا؟
حقیقت یہ ہے کہ ملک کو اختلافات سے نہیں، اختلافات کو دبانے کی کوششوں سے خطرہ لاحق ہوتا ہے۔ جمہوریت میں حکومت کی مخالفت ملک کی مخالفت نہیں ہوتی۔ آر ایس ایس کی پالیسیوں پر تنقید ہندوستان سے بے وفائی نہیں اور بی جے پی کو اقتدار سے ہٹانے کی سیاسی جدوجہد کوئی قومی جرم نہیں۔ اگر عوام کسی دن ووٹ کے ذریعے بی جے پی کو اقتدار سے باہر کر دیتے ہیں تو اس سے ہندوستان نہیں ہارے گا، صرف ایک سیاسی جماعت اقتدار سے محروم ہوگی۔
موہن بھاگوت کو یہ بنیادی فرق سمجھنا ہوگا کہ ملک اور حکومت ایک چیز نہیں ہیں، قوم اور سیاسی جماعت ایک دوسرے کا متبادل نہیں ہیں اور اقتدار کا تسلسل قومی سالمیت کی ضمانت نہیں ہوتا۔ ہندوستان کی طاقت اس بات میں نہیں کہ یہاں سب ایک ہی زبان بولیں، ایک ہی نظریہ اپنائیں اور ایک ہی سیاسی قیادت کے سامنے سر جھکائیں، بلکہ اس میں ہے کہ مختلف نظریات، مذاہب اور شناختوں کے لوگ برابر کے شہری بن کر رہ سکیں۔
اگر کورؤں کی مثال دینی ہی ہے تو یہ بھی یاد رکھنا چاہیے کہ مہابھارت میں شکست کی وجہ محض اختلاف نہیں بلکہ اقتدار کا غرور، ناانصافی اور دوسروں کے جائز حقوق سے انکار بھی تھا۔ تاریخ کا سبق صرف اتحاد نہیں، انصاف بھی ہے۔ جس اتحاد میں انصاف، برابری اور اختلافِ رائے کی گنجائش نہ ہو، وہ اتحاد نہیں بلکہ غلبے کی خواہش ہے۔
اس لیے سوال یہ نہیں کہ بی جے پی اور آر ایس ایس کی مخالفت سے دیش کیسے ہار جائے گا، اصل سوال یہ ہے کہ کیا ہندوستان کی جمہوریت کسی سیاسی جماعت یا تنظیم سے اختلاف کی آزادی کے بغیر زندہ رہ سکتی ہے؟ ملک کو بچانے کے لیے ضروری ہے کہ عوام کو متحد کیا جائے، نہ کہ انہیں ایک مخصوص نظریے کے تابع بنایا جائے۔ کیونکہ ہندوستان کسی تنظیم کی جاگیر نہیں، یہ ڈیڑھ ارب شہریوں کا ملک ہے۔
