گاؤں کے لوگ سرکاری اسکیموں سے بھی واقف نہیں

راجستھان کا تاریخی ادے پور شہر جھیلوں کے شہر کے نام سے بھی مشہور ہے۔ جہاں سال بھر ملک و دنیا کے سیاحوں کا اجتماع رہتا ہے۔ اس جگہ کی خوبصورتی کی مثال اس حقیقت سے دی جا سکتی ہے کہ دنیا کے بڑے صنعتکار اور فلمی ستارے اس شہر کو اپنی شادی کی جگہ کے طور پر منتخب کرتے ہیں۔ اسی لیے اس شہر کی شان و شوکت اور خوبصورتی قابل دید ہے۔ لیکن منوہر پورہ گاؤں اس شہر سے صرف چار کلومیٹر کے فاصلے پر واقع ہے۔ درج فہرست ذات والے اس گاؤں کی آبادی تقریباً ایک ہزار ہے اور شرح خواندگی تقریباً پچاس فیصد ہے۔ شہر کے قریب ہونے کے باوجود اس گاؤں کی زیادہ تر آبادی مختلف سرکاری سکیموں سے محروم ہے۔جو نہ صرف حیرت کی بات ہے بلکہ انتظامہ کی بے حسی کو بھی ظاہر کرتا ہے۔ اس وقت راجستھان حکومت کی طرف سے ریاست کو ایک ماڈل ریاست بنانے کی کوششیں کی جا رہی ہیں۔ جس کے تحت حکومت کی جانب سے کئی عوامی فلاحی اسکیمیں شروع کی گئی ہیں۔ اس کے علاوہ مرکز کی طرف سے چلائی جانے والی اسکیموں کو بھی زمینی سطح پر 100 فیصد نافذ کرنے کی کوشش کی جا رہی ہے۔ اس سب کا حتمی مقصد راجستھان کے لوگوں کو سماجی تحفظ فراہم کرنا ہے۔ ایسی صورت حال میں، حکومت زمین پر کئی حفاظتی اسکیموں کو نافذ کرنے کی کوشش کر رہی ہے جیسے پردھان منتری آواس یوجنا، پردھان منتری بیما تحفظ یوجنا، اجولا یوجنا تاکہ خواتین کو لکڑی اور دھوئیں پر مبنی چولہے سے آزاد کیا جا سکے اور تعلیم، زراعت اور ادویات جیسی کئی حفاظتی اسکیمیں اہم ہیں۔لیکن اس کے باوجود ایسی کئی اسکیمیں ہیں جن کا فائدہ منوہر پورہ گاؤں کے لوگوں کو نہیں مل پا رہا ہے۔
اس سلسلے میں گاؤں کی ایک بزرگ خاتون نندو بائی کا کہنا ہے کہ وہ گزشتہ 40 سال سے اس گاؤں میں رہ رہی ہیں۔ ان کے شوہر کا گزشتہ سال انتقال ہو گیا تھا۔ وہ پچھلے ایک سال سے بیوہ پنشن کے لیے لڑ رہی ہیں۔ لیکن شعور کی کمی کی وجہ سے وہ محکمہ سے اپنی پنشن شروع کروانے میں ناکام رہی ہے۔ نندو بائی بتاتی ہیں کہ وہ اس سلسلے میں کئی بار ای-مترا سے بھی مل چکی ہیں، لیکن وہ بھی ان کی درخواست کو سنجیدگی سے نہیں لیتا اور درخواست دینے میں دلچسپی نہیں ظاہر کرتا ہے۔ حالانکہ نندو بائی کا کہنا ہے کہ ان جیسے بزرگوں کے لیے پنشن کا بندوبست کرنا انتظامیہ کا کام ہے، لیکن ان کی کہیں شنوائی نہیں ہو رہی ہے۔ یہی نہیں، گاؤں کے لوگ بھی منریگا گارنٹی اسکیم سے واقف نہیں ہیں۔ ایسے بہت سے گاؤں والے ہیں جن کے پاس جاب کارڈ ہیں، لیکن آج تک انہیں کبھی بھی منریگا سے کام نہیں ملا ہے۔تاہم حکومت نے ایسا نظام بنایا ہے کہ اس کے تحت کوئی بھی فارم 6 بھر کر دیہی پنچایت سے کام مانگ سکتا ہے۔ لیکن ان دیہی علاقہ کے رہنے والوں کے پاس ایسی کوئی معلومات بھی نہیں ہے۔ اس کی وجہ سے خواتین کو سب سے زیادہ نقصان پہنچ رہا ہے۔ منریگا سے کام نہ ملنے کی وجہ سے مرد کام کی تلاش میں شہروں یا دوسری ریاستوں کی طرف ہجرت کرتے ہیں لیکن گھر کی دیکھ بھال کی وجہ سے خواتین کو گاؤں میں ہی رہنا پڑتا ہے۔ ایسے میں گاؤں کی بہت سی خواتین گھر کی معاشی حالت بہتر کرنے کے لیے شہر کے بڑے گھروں میں جھاڑو دینے کا کام کرنے پر مجبور ہیں۔ اس سلسلے میں گاؤں کی 32 سالہ خاتون جانکی دیوی کا کہنا ہے کہ اس کے شوہر اور اس نے کئی سال پہلے منریگا کے تحت جاب کارڈ بنوائے تھے لیکن آج تک انہیں کوئی کام نہیں ملا۔ اس سلسلے میں وہ کئی بار پنچایت آفس بھی گئی لیکن انہیں سوائے یقین دہانی کے کچھ نہیں ملا۔ وہ کہتی ہیں کہ گاؤں میں درج فہرست ذاتوں کی تعداد زیادہ ہے اور وہ خود بھی اس ذات سے تعلق رکھتی ہیں۔ اس کی ذات کے بہت سے لوگوں کو منریگا کے تحت کام ملا ہے، لیکن آج تک نہ اسے اور نہ ہی ان کے شوہر کو کام ملا ہے۔
ان کی ذات کی ایک اور خاتون شانتی بائی ناراضگی کے ساتھ کہتی ہیں کہ منوہر پورہ گاؤں میں بہت سی بنیادی ضروریات کا فقدان ہے۔ زیادہ تر لوگوں کو روزگار کی ضرورت ہے۔ اس کے لیے گاؤں سے مرد اور نوجوان نقل مکانی کر رہے ہیں۔ الیکشن کے وقت تمام جماعتوں کے رہنما آکر تمام خامیاں دور کرنے کی یقین دہانی کراتے ہیں۔ لیکن الیکشن کے بعد کوئی لیڈر اس گاؤں میں ان کی حالت کو جاننے واپس بھی نہیں آتا ہے۔ شانتی بائی کہتی ہیں کہ جن لوگوں کی سیاسی پارٹیوں یا محکموں تک رسائی ہے وہ تمام اسکیموں کا فائدہ اٹھاتے ہیں، لیکن ہم جیسے لوگوں کو یہ نہیں معلوم کہ پردھان منتری آواس یوجنا کے فوائد حاصل کرنے کے لیے کہاں اور کیسے درخواست دی جائے؟ کوئی ہماری رہنمائی کرنے کو تیار نہیں۔ بہت سے لوگ ایسے ہیں جنہوں نے آج تک اپنا آدھار کارڈ نہیں بنوایا ہے جس کی وجہ سے وہ کسی بھی طرح کی اسکیموں کا فائدہ حاصل کرنے سے محروم ہیں۔ انہوں نے بتایا کہ ایک 65 سالہ بزرگ خاتون پیاری دیوی گاؤں میں اکیلی رہتی ہیں۔ بڑھاپے میں ان کا کوئی نہیں ہے۔ وہ کہیں کام کرنے سے بھی قاصر ہیں۔ ایسے میں بڑھاپا پنشن ان کے لیے کارگر ثابت ہو سکتی ہے۔ لیکن آدھار کارڈ کی عدم موجودگی کی وجہ سے وہ ابھی تک اس کے فوائد حاصل کرنے سے محروم ہیں۔
منوہر پورہ گاؤں کے نہ صرف مستقل باشندے بلکہ کئی خاندان بھی جو 10 سال قبل بہار سے کام کی تلاش میں یہاں آکر آباد ہوئے تھے، کسی بھی قسم کی دستاویز نہ ہونے کی وجہ سے سہولیات سے محروم ہیں۔ ان کے بچوں کے آدھار کارڈ نہ ہونے کی وجہ سے آج تک وہ بچے اسکول نہیں جا سکے ہیں اور نہ ہی ان خاندانوں کو راشن یا کوئی اور سہولت میسر ہے۔ صرف منوہر پورہ ہی نہیں ملک میں اس جیسے کئی گاؤں ہیں جہاں تعلیم کی کمی کی وجہ سے لوگ اپنے حقوق سے بھی واقف نہیں ہیں۔ ان تمام مسائل کو دیکھ کر لگتا ہے کہ شعور کی کمی کے باعث لوگ سرکاری سہولیات سے فائدہ اٹھانے سے محروم ہیں۔ دوسری جانب محکمہ کی بے حسی کی وجہ سے سرکاری سکیمیں زمین پر لاگو ہونے کی بجائے فائلوں میں دب کر رہ جاتی ہیں۔