اویسی اور چندر شیکھر کا اتحاد ‘صفر جمع صفر برابر صفر’: رام گوپال یادو

اٹاوہ،  (یو این آئی۔) سماج وادی پارٹی (ایس پی) کے قومی جنرل سکریٹری اور راجیہ سبھا کے رکن پارلیمنٹ پروفیسر رام گوپال یادو نے اسد الدین اویسی اور چندر شیکھر آزاد کے ممکنہ اتحاد پر طنز کرتے ہوئے کہا کہ صفر جمع صفر برابر صفر ہوتا ہے۔پروفیسر یادو جمعہ کی شام اٹاوہ میں ایس پی صدر اور سابق وزیر اعلیٰ اکھلیش یادو کے بنوائے جا رہے زیر تعمیر کیداریشور مندر پہنچے۔ انہوں نے رسم و رواج کے مطابق پوجا ارچنا کرکے بھگوان شیو کا آشیرواد لیا۔ اس کے بعد میڈیا سے بات چیت میں انہوں نے ریاست کی موجودہ سیاست اور اپوزیشن جماعتوں کے ممکنہ اتحاد پر اپنے خیالات کا اظہار کیا۔

اویسی اور چندر شیکھر آزاد کے اتحاد سے متعلق سوال پر انہوں نے کہا، ”ایس پی پر تبصرہ کرنے دیجیے، صفر ہی ملے گا۔ صفر جمع صفر برابر صفر ہی ہوگا۔” ان کے اس تبصرے کو آئندہ اسمبلی انتخابات سے پہلے دونوں رہنماؤں کے ممکنہ اتحاد کی انتخابی اہمیت کے بارے میں ایس پی کے ردعمل کے طور پر دیکھا جا رہا ہے۔کانگریس لیڈر راہل گاندھی کے فون ٹیپ کیے جانے سے متعلق سوال پر پروفیسر یادو نے کہا کہ فون تو سبھی لوگوں کے ٹیپ کیے جا رہے ہیں، صرف راہل گاندھی کے ہی نہیں۔ صحافیوں کی جانب اشارہ کرتے ہوئے انہوں نے کہا کہ جب آپ لوگ بڑے صحافی بن جائیں گے تو آپ کے فون بھی ٹیپ کیے جائیں گے۔ تاہم، انہوں نے کسی ایجنسی یا کسی مخصوص معاملے کا ذکر نہیں کیا۔

کیداریشور مندر میں درشن کے مقصد کے بارے میں انہوں نے کہا کہ وہ بھگوان مہادیو کا آشیرواد برقرار رہنے کی پراتھنا کے ساتھ یہاں آتے ہیں۔ مہادیو کی کرپا سے لوگوں کی تمام چالیں ناکام ہو جائیں گی۔ اس موقع پر سابق ایم ایل سی اروند یادو، سابق چیئرمین کلدیپ گپتا اور گوپال یادو بھی موجود تھے۔