دیوالی اور چھٹھ تہوار کے موقع پر اتر پردیش حکومت نے نوجوانوں کو روزگار کا تحفہ دیا

وارانسی،  (یو این آئی۔) دیوالی اور چھٹھ تہوار کے موقع پر اتر پردیش حکومت نے نوجوانوں کو روزگار کا تحفہ دیا ہے۔ اتر پردیش روزگار مشن کے تحت نومبر میں 3، 5، 13 اور 14 تاریخ کو منعقدہ 4 بڑے روزگار میلوں میں مجموعی طور پر 4,003 امیدواروں کو ملازمت کی پیشکش کی گئی۔ ان میلوں میں 311 کمپنیوں نے حصہ لیا، جبکہ روزگار کی تلاش میں 11,662 امیدوار شریک ہوئے۔ منتخب نوجوانوں کو زیادہ سے زیادہ 4.20 لاکھ روپے سالانہ تنخواہ کے پیکیج کی پیشکش کی گئی۔ وہیں 333 خواتین کو بھی روزگار کے مواقع حاصل ہوئے۔

اسسٹنٹ ڈائریکٹر (محکمہ روزگار) مکیش کمار نے بتایا کہ نوجوانوں کو ان کی تعلیمی قابلیت اور ہنر کے مطابق روزگار فراہم کرنے کے مقصد سے ان میلوں کا انعقاد کیا گیا۔ چاروں میلوں میں بڑی تعداد میں کمپنیوں اور امیدواروں نے شرکت کی، جس سے نوجوانوں کو مختلف شعبوں میں ملازمت حاصل کرنے کے مواقع ملے۔

اسی سلسلے میں چوتھے بڑے روزگار میلے کا انعقاد ہفتہ کو آدرش راشٹریہ ودیالیہ انٹر کالج، چولاپور میں کیا گیا۔ میلے کا افتتاح اجگرا کے رکن اسمبلی تریبھون رام نے کیا۔ اس میں ووڈافون، آئی سی آئی سی آئی بینک، ڈکسن، مدرسن، کوٹک مہندرا بینک، وکاس گروپ، بلنکٹ، سیپیٹ، ایکسس بینک، اتکرش اسمال فنانس بینک اور فلپ کارٹ سمیت مجموعی طور پر 43 کمپنیوں نے حصہ لیا۔

علاقائی دفتر روزگار کے روزگار میلے کے انچارج دیپ سنگھ نے بتایا کہ 13 اور 14 نومبر کو منعقدہ 2 روزہ روزگار میلے کے دوسرے دن ہفتہ کو 1,896 امیدواروں نے شرکت کی۔ ان میں سے 456 امیدواروں کو مختلف کمپنیوں کی جانب سے ملازمت کی پیشکش کی گئی۔ 3 امیدواروں کو زیادہ سے زیادہ 35,000 روپے ماہانہ تنخواہ کی پیشکش ملی، جو سالانہ تقریباً 4.20 لاکھ روپے ہوتی ہے۔انہوں نے بتایا کہ روزگار میلوں کے ذریعے بڑی تعداد میں نوجوانوں کو ملازمت کے مواقع فراہم ہوئے ہیں۔ ملازمت کی پیشکش ملنے سے امیدواروں میں جوش و خروش اور خوشی کا ماحول رہا۔