قانون ساز کونسل کے انتخابات میں بی جے پی کی کارکردگی پر اکھلیش یادو  کا طنز 

اکھلیش یادو نے الزام لگایا کہ وزیر اعلیٰ نے دیگر حلقوں میں پارٹی کی کامیابی کے امکانات کے بجائے اپنے سیاسی گڑھ گورکھپور کو بچانے کو ترجیح دی۔ انہوں نے طنزیہ انداز میں کہا، ’’وزیر اعلیٰ اپنی شطرنج کی چالیں الگ الگ سمتوں میں چل رہے تھے۔ نتیجہ یہ نکلا کہ گویا وہ کہہ رہے ہوں کہ کاشی بھلے ہی ڈوب جائے، لیکن گورکھپور کا کام نہیں رکنا چاہیے۔‘‘انہوں نے گورکھپور-فیض آباد ٹیچر حلقے سے سماجوادی پارٹی کے امیدوار سنجین ترپاٹھی کی شکست کا حوالہ دیتے ہوئے الزام لگایا کہ انہیں جیتنے نہیں دیا گیا۔ بی جے پی چھوڑ کر حال ہی میں سماجوادی پارٹی میں شامل ہونے والے ترپاٹھی اس انتخاب میں تیسرے مقام پر رہے۔ انہوں نے بھی دعویٰ کیا کہ وزیر اعلیٰ نے ان کی شکست یقینی بنانے کے لیے کام کیا۔