اردو کا مستقبل محفوظ بنانے کے لیے سنجیدہ کوششیں کہاں ہیں؟

جاوید جمال الدین

اردو زبان کے تحفظ، فروغ اور مستقبل کے حوالے سے ہر سال تقاریب منعقد ہوتی ہیں، مشاعرے سجتے ہیں، سیمینار اور مذاکرے ہوتے ہیں، تقاریر کی جاتی ہیں اور اردو سے محبت کے دعوے بھی بڑے جوش و خروش سے کیے جاتے ہیں، ابھی چند روز قبل جگہ جگہ یوم اردو مناتے ہوئے تقریبات کا انعقاد کیا گیا اور حکومت سے زبان کے فروغ اور ترویج کے لیے اقدامات اور سرکاری تعاون کے مطالبات کیے گئے،لیکن نیادی سوال آج بھی اپنی جگہ قائم ہے کہ ان سرگرمیوں کے نتیجے میں اردو زبان، اس کے تعلیمی اداروں، نئی نسل اور مستقبل کے لیے کیا ٹھوس کام ہورہا ہے؟ کیا اردو کے نام پر منعقد ہونے والی تقریبات اور جذباتی اظہار ہی اس زبان کی بقا کی ضمانت بن سکتے ہیں؟ اگر ایسا نہیں ہے تو پھر اردو کے مستقبل کو محفوظ بنانے کے لیے سنجیدہ اور عملی کوششیں کہاں ہیں؟
چند سال پہلے کی بات ہے جب میں روزنامہ راشٹریہ سہارا کا ممبئی کا ریزیڈنٹ ایڈیٹر تھا اس درمیان سہارا پریوار میں بحرانی دور شروع ہو گیا اور پیرا بینکنگ کے معاملات میں سہارا انتظامیہ اور سیبیی کے درمیان تنازع پیدا ہو گیااور اور عدالتی فیصلے کے تحت سہارا کے روح رواں سبرت رائے عرف سہارا شری کو جیل میں سلاخوں کے پیچھے جانا پڑا،ممبئی میں سہارا اسٹار ہوٹل میں واقع تہہ خانے کے وسیع ہال میں تقریباً چار ہزار ملازمین سے سبرت رائے نے جیل سے ویڈیو کانفرنس ہی کے ذریعے خطاب کیا اور سوالات کے جواب بھی دے رہے تھے اسی درمیان مجھے مائک کسی طرح حاصل ہو گیا اور میں نے ان سے سوال کیا کہ ان کا مقصد اردو اخبار نکالنے کا کیا تھا کیونکہ مولانا الطاف حسین حالی نے جاوید نامہ میں لکھا ہے کہ 1857 کے غدر کے بعد مسلمانوں کے ساتھ ساتھ اردو زبان اور گنگا جمنی تہذیب و ثقافت کو بھی فرنگیوں نے نشانہ بنانا شروع کر دیا تھا اس موقع پر سر سید احمد خان نے اس بات کا اظہار کیا تھا کہ اگرانگریزوں کا یہی طریقہ کار رہا تو سو سال بعد ہندوستان میں اردو کو ختم کر دیا جائے گا یا اردو کا نام نشان مٹ جائے گا لیکن اپ نے پہلی بار ملک شمال جنوب اور مغرب اور مشرق کے شہروں سے اردو اخبارات نکال کر روزگار کے ساتھ ساتھ اردو زبان اور اردو صحافت کوئی نئی زندگی بخشی ہے لیکن اس پر توجہ دینا اور اسے سنبھالنا کافی اہم بات ہے جو سہارا کی جانب سے ہونے کی پوری امید ہے۔کیونکہ آ پ کا مقصد کوئی نہیں جانتا ہے،سبرت رائے نے نے میرے سوال کاجواب تسلی کے ساتھ دیتے ہوئے کہاکہ ” جاوید صاحب اردو ہمارے ملک کی زبان ہے جو یہاں پروان چڑھی اور سبھی جانتے ہیں کہ اردو ہماری گنگا جمنی تہذیب کا ایک حصہ ہے اور یہ صرف ایک طبقے اور فرقے کی زبان نہیں بلکہ سبھی نے اس کی ترقی تشریح اور ترویج میں اہم رول ادا کیا ہے اور یہی مقصد تھا کہ ہر کوئی چاہتا تھا کہ زبان کے فروغ کے لیے اور صحافت کی ترقی کے لیے ایک اخبار نکالا جائے اور اس جانب قدم اٹھایا گیا اور پھر پہلی بار ایسا ہوا کہ ملک میں ایک اردو اخبار کئی شہروں سے ایک ساتھ شائع کیا گیا اور ایک ہی اواز بن کے رہ گیا جو اردو والوں کی صحیح ترجمان کر رہا ہے۔ہم اس کی بقا اور ترقی کے لیے ہر ممکن اقدامات کریں گے اور مستقبل میں اسے قائم رکھنے کی حربوں کی کوشش کی جائے گی۔”لیکن یہ افسوسناک حقیقت ہے کہ سہارا کمپنی کے بحران کا شکار روزنامہ اردو سہارا بھی ہوگیااور چند ماہ قبل ملک کے سبھی مراکز کو بند کر دینا پڑا اور اخبار کی اشاعت بھی بند ہو چکی ہو چکی ہے۔ویسے یہ خوش ائین بات ہے کہ ملک بھر میں ہندی اور انگریزی کے بعد تیسرے نمبر پہ اردو اخبارات کی اشاعت ہے اور کوئی شہر نہیں بچا ہے جہاں سے اردو اخبار شائع نہیں ہوتے ہیں اور انٹرنیٹ اور سوشل میڈیا نے بھی ان کی ترقی میں اہم رول ادا کیا ہے اگر پرنٹ شائع بھی نہیں ہو رہا ہے اس کے باوجود بھی اردو اخبارات پڑھے جا رہے ہیں۔خیر آگے بڑھتے ہیں اور اُردو دان طبقے کی بے حسی کو پیش کرتے ہیں ۔
حال ہی میں سوشل میڈیا پر ایک معروف اردو ہفت روزہ اخبار کے مدیر کی ایک ریل پر ہندی اور رومن رسم الخط میں عنوان درج کیے جانے کے حوالے سے میں نے تبصرہ کیا۔ میرا مقصد کسی فرد کی مخالفت یا تنقید نہیں بلکہ اس توجہ طلب مسئلے کی نشان دہی کرنا تھا کہ اگر اردو کے نام سے پہچانے جانے والے ادارے اور ان کے ذمہ داران ہی اپنی تشہیر میں اردو رسم الخط کو ترجیح نہیں دیں گے تو نئی نسل کو اردو کی اہمیت کا احساس کیسے دلایا جائے گا؟ افسوس کہ مدیر محترم کی جانب سے کوئی ایسا جواب نہیں ملا جو اس معاملے کی سنجیدگی کو ظاہر کرتا۔ اس کے برعکس یہ کہا گیا کہ عنوان کے پیچھے چھپ جاؤں گا۔ یہی معاملہ میں نے ایک اعلیٰ سرکاری افسر کے سامنے بھی رکھا، جو خوش قسمتی سے خود ایک اچھے شاعر ہیں۔ انہوں نے معاملے کی وضاحت طلب کی اور یقین دلایا کہ متعلقہ عنوان کی نشان دہی کردی جائے تو وہ اس پر غور کریں گے۔ ان کا یہ رویہ قابلِ تحسین ہے، کیونکہ زبان کے مسائل پر گفتگو اور اصلاح کی گنجائش ہمیشہ موجود رہنی چاہیے۔
یہ واقعہ کسی ایک مدیر یا ادارے تک محدود نہیں۔ آج صورت حال یہ ہے کہ اردو کی محبت کو اکثر مشاعروں، ادبی تقریبات، مبارک باد کے پیغامات اور رسمی تقاریر تک محدود کردیا گیا ہے۔ اردو کے نام پر سرگرم بعض ادارے بھی اپنی عملی کارکردگی کے بجائے تقریبات کی تعداد اور مہمانوں کی فہرست کو اپنی کامیابی سمجھنے لگے ہیں۔ حالاں کہ زبان کی حقیقی خدمت اس وقت ہوتی ہے جب اس کے ذریعے تعلیم، تحقیق، روزگار، جدید علوم اور نئی نسل کی تربیت کے مواقع پیدا کیے جائیں۔
اردو کی تاریخ ہندوستان کی تہذیبی، لسانی اور سماجی تاریخ سے گہرا تعلق رکھتی ہے۔ یہ کسی ایک دن، ایک شہر یا کسی ایک حکم کے نتیجے میں وجود میں آنے والی زبان نہیں، بلکہ صدیوں کے لسانی میل جول، تہذیبی اشتراک اور سماجی تعامل کے نتیجے میں پروان چڑھی ہے۔
برصغیر میں مختلف ادوار کے دوران مقامی بولیوں، خصوصاً کھڑی بولی، برج بھاشا، ہریانوی اور دیگر ہند آریائی لسانی روایتوں کے ساتھ فارسی، عربی اور ترکی کے الفاظ و اثرات نے ایک نئی لسانی صورت اختیار کی۔ شمالی ہندوستان میں دہلی اور اس کے گرد و نواح میں اس زبان کی تشکیل و ارتقا کا عمل آگے بڑھا، جب کہ دکن میں بھی اس کی ایک مضبوط ادبی روایت قائم ہوئی۔ اس زبان کو مختلف ادوار میں ہندوی، دہلوی، ہندوستانی، ریختہ اور دکنی جیسے ناموں سے بھی یاد کیا گیا۔ بعد کے زمانے میں اردو اس کی معروف شناخت بن گئی۔
اردو کے نام کی نسبت ترکی زبان کے لفظ ’’اوردو‘‘ سے بیان کی جاتی ہے، جس کے معنی لشکر یا شاہی چھاؤنی کے ہیں، لیکن اس سے یہ نتیجہ اخذ کرنا درست نہیں کہ اردو محض فوجی چھاؤنیوں میں پیدا ہوئی۔ دراصل اس زبان کی تشکیل ایک طویل سماجی اور تہذیبی عمل کا نتیجہ تھی۔
دکن میں پندرھویں سے سترھویں صدی کے دوران اردو ادب نے نمایاں ترقی کی۔ دکنی شاعری، نثر اور صوفیانہ ادب نے اس زبان کو ایک مضبوط ادبی بنیاد فراہم کی۔ شمالی ہندوستان میں اٹھارویں صدی کے دوران میر، سودا، خواجہ میر درد اور دیگر شعرا نے اسے ادبی وقار عطا کیا، جب کہ انیسویں صدی میں غالب، ذوق، مومن، سرسید احمد خان، حالی اور شبلی نعمانی جیسی شخصیات نے شاعری، نثر، تنقید، صحافت اور علمی تحریروں کے ذریعے اس کے دائرے کو وسیع کیا۔
بعد کے زمانے میں پریم چند، فراق گورکھپوری، کرشن چندر، راجندر سنگھ بیدی، عصمت چغتائی، منٹو، فیض احمد فیض، جوش ملیح آبادی اور بے شمار دیگر ادیبوں اور شاعروں نے اردو کو عالمی سطح پر شناخت دلائی۔
یہ حقیقت فراموش نہیں کی جاسکتی کہ اردو کی تعمیر و ترقی میں مسلمانوں کے ساتھ ہندوؤں، سکھوں اور دیگر مذاہب سے تعلق رکھنے والے اہلِ قلم نے بھی نمایاں کردار ادا کیا۔ منشی پریم چند، فراق گورکھپوری، پنڈت برج نارائن چکبست، کرشن چندر، راجندر سنگھ بیدی اور رام لعل اس مشترکہ ادبی ورثے کی روشن مثالیں ہیں۔
اس لیے اردو کو کسی ایک مذہب یا فرقے کی زبان قرار دینا نہ صرف اس کی تاریخ سے ناواقفیت ہے بلکہ ہندوستان کی مشترکہ تہذیبی روایت کو بھی محدود کرنے کے مترادف ہے۔ اردو ہندوستان کی اپنی زبان ہے اور اس کی جڑیں اسی سرزمین میں پیوست ہیں۔
مذہب، تہذیب اور شناخت سے آگے اردو کی افادیت
اردو محض ایک زبان نہیں بلکہ ہماری تہذیب، ثقافت، اجتماعی شناخت، تاریخ اور گراں قدر علمی ورثے کی امین ہے۔ اس زبان نے محبت، شائستگی، رواداری، اخوت اور انسانیت کے پیغام کو عام کرنے میں نمایاں کردار ادا کیا ہے۔
برصغیر کے مسلمانوں کا ایک بڑا دینی، علمی، فقہی، تفسیری، اصلاحی اور صوفیانہ سرمایہ اردو زبان میں محفوظ ہے۔ عربی کے بعد برصغیر میں دینی تعلیم و تفہیم کے لیے اردو نے جو اہم کردار ادا کیا ہے، اس کی اہمیت سے انکار ممکن نہیں۔ قرآن مجید کے تراجم، احادیث کی تشریحات، فقہی کتابیں، سیرت النبیؐ، اسلامی تاریخ اور اصلاحی لٹریچر کا ایک وسیع ذخیرہ اردو میں موجود ہے۔ اس کے باوجود افسوس ناک بات یہ ہے کہ نئی نسل کو اردو کی اس علمی اور دینی اہمیت سے بھی پوری طرح آگاہ نہیں کیا جارہا۔
دوسری طرف اردو کو ایک مخصوص مذہب سے وابستہ کرنے کی کوششوں نے بھی اس کے دائرے کو محدود کیا ہے۔ اردو اور ہندی دونوں ہندوستانی تہذیب اور معاشرت کی اہم لسانی روایتیں ہیں۔ ان کے درمیان لسانی قربت، مشترکہ الفاظ اور صدیوں کے سماجی میل جول کی تاریخ موجود ہے۔ ضرورت اس بات کی ہے کہ دونوں زبانوں کو ایک دوسرے کے مقابل کھڑا کرنے کے بجائے ان کے مشترکہ تہذیبی ورثے کو فروغ دیا جائے۔
سرکاری سطح پر اردو کی موجودگی اور زمینی حقیقت
یہ کہنا درست نہیں ہوگا کہ ہندوستان میں اردو کے لیے ہر دروازہ بند ہوچکا ہے یا سرکاری سطح پر اس زبان کا استعمال بالکل ختم ہوگیا ہے۔ مرکزی حکومت اور متعدد ریاستی حکومتوں کے عوامی مفاد سے متعلق بعض ویب سائٹوں اور ڈیجیٹل پلیٹ فارموں پر اردو میں بھی معلومات فراہم کی جاتی ہیں۔
الیکشن کمیشن آف انڈیا، محکمہ ڈاک، پریس انفارمیشن بیورو، وزارتِ اقلیتی امور، قومی انسانی حقوق کمیشن اور حج کمیٹی آف انڈیا سمیت مختلف سرکاری اداروں کی ویب سائٹوں پر اردو مواد اور معلومات کی دستیابی اس بات کا ثبوت ہے کہ سرکاری نظام میں اردو کی افادیت اور ضرورت اب بھی موجود ہے۔ اسی طرح بعض ریاستوں اور علاقوں میں بینکنگ اور انٹرنیٹ بینکنگ کی سہولتوں میں بھی اردو زبان استعمال کی جاتی ہے۔اے ٹی ایم اور نیٹ بینکنگ میں بھی سہولتیں دستیاب ہیں ۔ملک بھر میں متعدد ریاستوں میں ریلوے اسٹیشنوں پر ناموں کی تختیاں اردو میں نصب ہیں اور داخلہ دروازے پر بھی ہندی ،انگریزی ،اردو اور علاقائی زبان میں اسٹیشن کا نام تحریر رہتا ہے،لیکن میں سفر کے دوران اتر پردیش اور مہاراشٹرا کے چند علاقوں میں ریلوے اسٹیشنوں پر اُردو کی تختیاں ہٹانے کی درپردہ مہم جاری ،شمال وسطی ریلوے کے آگرہ ڈیویژن میں تاج محل، اردو کے لیے اور مرزا غالب کے لیے جانے جانے والے شہر آگرہ میں شہر کے آگرہ کینٹ،راجا کی منڈی ،آگرہ فورٹ ،آگرہ عہدہ گاہ ،آگرہ سٹی اور دیگر اسٹیشنوں سے اُردو کو ہٹانے کی کوشش جاری ہے،کیونکہ پرانے بورڈ کی جگہ نئے بورڈ نہیں لگائے گئے ہیں۔
لیکن سوال یہ ہے کہ کیا ان سہولتوں کو مزید وسعت دینے کے لیے کوئی مربوط پالیسی موجود ہے؟ کیا تمام اہم سرکاری معلومات، عوامی خدمات، آن لائن درخواستوں اور شہری سہولتوں تک اردو میں یکساں رسائی فراہم کی جارہی ہے؟ اگر نہیں تو اس سمت میں کام کرنے کی ضرورت ہے۔

اپنے صحافتی اور سفری تجربات کے دوران میں نے شمالی، وسطی، مغربی اور جنوبی ہندوستان کی متعدد ریاستوں کا سفر کیا ہے۔ ممبئی سے احمد آباد، جے پور، نئی دہلی، لکھنؤ، بھوپال اور پٹنہ کے علاوہ بنگلور اور حیدرآباد جیسے شہروں کے ریلوے اسٹیشنوں پر بھی اردو کے نام اور تختیاں نظر آتی ہیں۔ آزادی کے تقریباً آٹھ دہائیوں بعد بھی مختلف مقامات پر اردو کی یہ موجودگی اطمینان بخش ہے۔ البتہ بعض جگہوں پر اردو املا کی غلطیاں بھی دکھائی دیتی ہیں، جن کی اصلاح ضروری ہے۔عرب ممالک میں مردوں کی ملازمتوں کے دوران بیرون ملک رہنے کے سبب جنوبی ہند خصوصی طور پر حیدرابادخواتین نے اپنے بچوں کو اردو زبان اور تہذیب اور کلچر سے دور کر دیا ہے حیدراباد میں صورتحال مختلف نظر اتی ہے یہاں بھی ریلوے اسٹیشن ہو بس دو اور سڑکوں کی تختیوں پر اردو نظر اتی ہے لیکن گھروں سے اردو کا دیس نکالا ہو چکا ہے اور بڑے بڑے بازاروں میں اردو سائن بورڈ کی کمی واقع ہو چکی ہے زبان ان کا مسئلہ پیدا ہو چکا ہے۔

2005-06 کے دوران روزنامہ انقلاب سے وابستہ ہونے کے سلسلے میں نئی دہلی میں قیام کے دوران بھی میں نے دارالحکومت کی متعدد شاہراہوں اور مقامات پر اردو میں درج ناموں کی تختیاں دیکھی تھیں۔ یہ مشاہدہ خوش آئند تھا کہ اردو سرکاری اور عوامی مقامات پر اپنی موجودگی کا احساس دلا رہی ہے۔خاتون صحافی نور جہاں ثروت نے تختیوں کے املا درست کروانے کے لیے زبردست مہم چلائی تھی۔
صحافت کی بات چلی تو بتادوں کہ گزشتہ دو تین دہائیوں کے دوران اُردو اخبارات سے شہرت اور عزت حاصل کرنے والے مسلم لیڈران اردو اخبارات کے سرکولیشن کی معلومات کے متمنی رہتے ہیں اورخوب خبریں ای میل ،واٹس ایپ اور دیگر ذریعہ سے بھیجتے ہیں لیکن تہوار یا سالگرہ کے موقعوں پر اشتہارات کی التجا پر اخبارات کی اشاعت پوچھتے ہیں۔

تاہم کسی زبان کی ترقی کا اندازہ صرف چند تختیوں یا ویب سائٹوں پر اس کے استعمال سے نہیں لگایا جاسکتا۔ اصل پیمانہ یہ ہے کہ وہ زبان تعلیم، انتظامیہ، روزگار، کاروبار، تحقیق اور نئی ٹیکنالوجی میں کتنی مؤثر طریقے سے استعمال ہورہی ہے۔

ممبئی میں اردو کا سکڑتا ہوا دائرہ

عروس البلاد ممبئی میں اردو کی صورت حال کا جائزہ لیا جائے تو ایک طرف اس کی مضبوط تعلیمی اور ادبی روایت دکھائی دیتی ہے، تو دوسری طرف اس کے عوامی استعمال میں بتدریج کمی بھی محسوس ہوتی ہے۔جنعبی ممبئی کے کئی اردو اسکولوں کے بند ہونے کا ذکر کر کے ہیں،متعدد اداروں اردو زبان کے فروغ و ترویج کے لیے تشکیل دیئے گئے اپنے اداروں اور کتب۔ خانوں کو سائٹ لائن کردیا ہے ،اور حلیہ بہانے کیے جارہے ہیں۔

بچپن میں جنوبی ممبئی کے مسلم اکثریتی اور ملی جلی آبادی والے علاقوں میں دکانوں، تجارتی اداروں، عمارتوں اور سڑکوں پر اردو کی تختیاں عام دکھائی دیتی تھیں۔ لیکن وقت گزرنے کے ساتھ یہ منظر محدود ہوتا چلا گیا۔ آج بہت سے علاقوں میں دکانوں کے سائن بورڈ سے اردو غائب ہوچکی ہے۔ ممبئی میونسپل کارپوریشن کی جانب سے عوامی مقامات پر اردو تختیاں لگانے کا سلسلہ بھی پہلے جیسا نہیں رہا۔ بعض مسلم اکثریتی علاقوں میں مقامی نمائندوں کی کوشش سے سنگِ مرمر یا دوسری تختیاں نصب کردی جاتی ہیں، لیکن یہ کوئی مستقل اور شہر گیر پالیسی نہیں ہے۔

اس معاملے میں میونسپل کارپوریشن اور دیگر متعلقہ اداروں کو اپنی ذمہ داری ادا کرنی چاہیے۔ ممبئی ایک کثیر لسانی اور کثیر تہذیبی شہر ہے۔ یہاں اردو سمیت تمام بڑی زبانوں کی نمائندگی کو شہری شناخت کا حصہ بنایا جانا چاہیے۔

یہ بھی ایک افسوس ناک حقیقت ہے کہ ممبئی کے بعض علاقوں میں اردو اسکولوں کی تعداد اور ان کے تعلیمی معیار کے حوالے سے مسائل بڑھ رہے ہیں۔ کئی اداروں میں بنیادی سہولتوں، اساتذہ، جدید تعلیمی وسائل اور طلبہ کی رہنمائی کی کمی محسوس کی جاتی ہے۔ اردو اخبارات کی اشاعت اور قارئین کی تعداد میں بھی نمایاں تبدیلی آئی ہے۔ ایسے میں ضروری ہے کہ اردو کے روایتی حلقوں سے باہر نکل کر اس کے نئے قارئین اور نئے امکانات پیدا کیے جائیں۔

مہاراشٹر: اردو تعلیم کی ایک اہم مثال

مہاراشٹر میں اردو تعلیم کی تاریخ اور موجودہ صورت حال خاص توجہ کی مستحق ہے۔ ریاست کی تشکیل کے بعد اردو ذریعۂ تعلیم کو برقرار رکھنے اور اسے تعلیمی نظام کا حصہ بنانے کے لیے مسلم رہنماؤں، دانشوروں اور تعلیمی اداروں نے جدوجہد کی تھی۔ اس سلسلے میں مصطفیٰ فقیہ کا نام نمایاں طور پر لیا جاتا ہے۔ وہ آزادی کے مجاہد اور مہاراشٹر کے اہم مسلم رہنما تھے۔ ریاست کی تشکیل کے ابتدائی دور میں انہوں نے اردو ذریعۂ تعلیم کے حق میں آواز بلند کی اور سیاسی سطح پر مزاحمت کے باوجود اس کے لیے کوششیں جاری رکھیں۔ وہ انجمن اسلام جیسے اہم تعلیمی ادارے کی قیادت سے بھی وابستہ رہے اور اس کی ترقی میں ان کا کردار اہم رہا۔

مہاراشٹر میں اردو تعلیم کے فروغ کا یہ سفر ممبئی تک محدود نہیں رہا بلکہ بھیونڈی، مالیگاؤں، اورنگ آباد، بیڑ، عثمان آباد، ناندیڑ، جلگاؤں، بھساول، چالیس گاؤں، پونے، شولاپور، ناگپور اور مراٹھواڑہ و ودربھ کے دیگر علاقوں تک پھیلا ہوا ہے۔

ممبئی میونسپل کارپوریشن کے تحت پرائمری اور اپر پرائمری کے ساتھ سیکنڈری سطح پر بھی تعلیم فراہم کی جارہی ہے۔ ان اسکولوں میں اردو، مراٹھی، ہندی اور دیگر زبانوں کے طلبہ زیر تعلیم ہیں۔ اردو اور ہندی ذریعۂ تعلیم کے طلبہ کی بڑی تعداد اس بات کی نشاندہی کرتی ہے کہ ان زبانوں کی تعلیمی اہمیت آج بھی برقرار ہے۔

مہاراشٹر میں ساڑھے چار ہزار سے زائد اردو میڈیم اسکولوں کی موجودگی کے اعداد و شمار بھی سامنے آتے رہے ہیں۔ مراٹھواڑہ، ودربھ اور شمالی مہاراشٹر کے متعدد علاقوں میں اردو میڈیم تعلیم کی موجودگی اور بعض مقامات پر اس میں اضافے کی اطلاعات اردو داں طبقے کے لیے خوش آئند ہیں۔ تاہم ان اعداد و شمار کی تازہ سرکاری تصدیق اور ضلع وار تفصیلات سامنے لانا ضروری ہے تاکہ اردو تعلیم کی اصل صورت حال کا درست اندازہ لگایا جاسکے۔

یہاں ایک اہم سوال بھی پیدا ہوتا ہے کہ جب اردو میڈیم اسکولوں میں طلبہ موجود ہیں تو ان کے تعلیمی معیار، جدید مضامین، سائنس، ریاضی، کمپیوٹر اور انگریزی کی تعلیم کو بہتر بنانے کے لیے کیا اقدامات کیے جارہے ہیں؟ اردو میڈیم کا مطلب جدید تعلیم سے دوری نہیں ہونا چاہیے۔ اردو کے ساتھ انگریزی، مراٹھی اور دیگر زبانوں پر عبور حاصل کرنے والے طلبہ ہی مستقبل میں زیادہ بہتر مواقع حاصل کرسکتے ہیں۔

اردو اسکولوں کی بقا اور نئی نسل کا مستقبل

اردو زبان کے مستقبل کا سب سے اہم تعلق اس کے تعلیمی اداروں سے ہے۔ اگر اردو اسکول کمزور ہوں گے، اساتذہ کی حوصلہ شکنی ہوگی، طلبہ کو جدید تعلیمی سہولتیں نہیں ملیں گی اور والدین کا اعتماد ختم ہوگا تو محض تقریبات اور مشاعروں سے زبان کا مستقبل محفوظ نہیں ہوسکے گا۔

والدین کی بھی یہ ذمہ داری ہے کہ وہ بچوں کو اردو بولنے کے ساتھ پڑھنے اور لکھنے کی ترغیب دیں۔ گھروں میں اردو کتابوں، اخبارات اور رسائل کے مطالعے کا ماحول پیدا کیا جائے۔ بچوں کو صرف نصابی کتابوں تک محدود رکھنے کے بجائے کہانیاں، سوانح، تاریخی واقعات اور سائنسی موضوعات پر اردو لٹریچر فراہم کیا جائے۔

اردو اسکولوں کے طلبہ کے لیے اسکالرشپ، تعلیمی رہنمائی، کمپیوٹر کی تربیت، مسابقتی امتحانات کی تیاری اور پیشہ ورانہ تعلیم کے مواقع پیدا کرنا بھی ضروری ہے۔ اگر اردو میڈیم کا طالب علم ڈاکٹر، انجینئر، صحافی، وکیل، سائنس داں، منتظم اور ٹیکنالوجی کا ماہر بن سکتا ہے تو اس کا اعتماد بھی بڑھے گا اور زبان کی افادیت بھی ثابت ہوگی۔