بہار کے نوجوانوں کو روزگار کے مواقع ملیں گے
خصوصی سروے میں تیزی لانے کے لیے 3,310 عہدوں پر تقرریاں ہوں گی: ڈاکٹر دلیپ کمار جیسوال
پٹنہ، (یواین آئی) بہار میں اراضی سروے کا کام مقررہ مدت میں مکمل کرنے کے لیے محکمہ مال و اراضی اصلاحات نے بڑے پیمانے پر تقرریوں کی تیاری شروع کر دی ہے۔ مختلف عہدوں پر مجموعی طور پر 3,310 ملازمین کی بھرتی کی جائے گی۔ محکمہ کا ہدف فروری 2027 تک تمام عہدوں پر تقرریاں مکمل کرنا ہے۔
وزیر ڈاکٹر دلیپ کمار جیسوال نے بدھ کو اپنے دفتر میں منعقدہ پریس کانفرنس میں بتایا کہ 3,310 عہدوں میں 96 اسسٹنٹ سیٹلمنٹ افسر، 414 خصوصی سروے قانون گو، 2,609 خصوصی سروے امین اور 191 خصوصی سروے کلرک کے عہدے شامل ہیں۔ انہوں نے کہا کہ وزیر اعلیٰ سمراٹ چودھری نے جائزہ اجلاس میں اراضی سروے کے کام میں تیزی لانے کی واضح ہدایت دی ہے۔ انہوں نے کہا کہ جب تمام لوگوں کو اپنی اپنی زمین کی پاس بک مل جائے گی تو کسی طرح کا تنازع نہیں رہے گا۔ زمین سے متعلق تنازعات کے مسائل بھی حل ہوں گے، جرائم میں کمی آئے گی اور عدالتوں پر مقدمات کا بوجھ بھی کم ہوگا۔ وزیر اعلیٰ کی ہدایات کے مطابق ہی تقرری کا یہ عمل شروع کیا جا رہا ہے۔
وزیر نے کہا کہ حکومت کی کوشش ہے کہ فروری تک تمام عہدوں پر ملازمین کی تقرری یقینی بنا دی جائے، تاکہ سروے کے کام میں تیزی لائی جا سکے۔ انہوں نے کہا کہ اراضی سروے مکمل ہونے سے زمین سے متعلق تنازعات میں کمی آئے گی اور زمین کے جھگڑوں کی وجہ سے ہونے والے جرائم پر مؤثر طور پر قابو پانے میں مدد ملے گی۔
وزیر نے بتایا کہ ونوبا بھاوے کی اپیل پر اس وقت کے زمینداروں نے بہار بھودان یگیہ کمیٹی کو مجموعی طور پر 6 لاکھ 48 ہزار 593 ایکڑ زمین عطیہ کی تھی۔ اس کا مقصد ضرورت مندوں اور بے زمین خاندانوں کو اراضی فراہم کرنا تھا۔ انہوں نے کہا کہ اب تک 3 لاکھ 46 ہزار 494 ایکڑ زمین کی تصدیق ہو چکی ہے۔ اس میں سے 2 لاکھ 42 ہزار 601 ایکڑ تصدیق شدہ زمین ضرورت مندوں اور سرکاری کاموں کے لیے تقسیم کی جا چکی ہے۔ انہوں نے بتایا کہ تقریباً 6,235 ایکڑ زمین ضرورت مندوں میں تقسیم کی جائے گی، جبکہ 14 ہزار ایکڑ غیر مصدقہ زمین کی خصوصی جانچ کرائی جا رہی ہے۔
حکومت نے بھودان یگیہ کمیٹی کو تحلیل کرنے کا فیصلہ کیا ہے۔ محکمہ کو شبہ ہے کہ بھودان کی زمین مقررہ مقاصد کے مطابق تقسیم نہیں کی گئی۔ اس لیے اس بات کی بھی جانچ کرائی جائے گی کہ مختص کی گئی زمین کا فائدہ حقیقی طور پر ضرورت مندوں کو ملا ہے یا نہیں۔
وزیر نے بتایا کہ ترقیاتی پروجیکٹوں کے لیے بروقت زمین فراہم کرنے کے مقصد سے اراضی کے حصول کے لیے ایک الگ خصوصی سیل قائم کیا جا رہا ہے۔ اس کے علاوہ 328 مستقل عہدوں پر بھی تقرریاں کی جائیں گی، جس کی تجویز کو کابینہ سے منظوری مل چکی ہے۔
انہوں نے کہا کہ سڑک، ریل سمیت مرکزی اور ریاستی حکومت کے مختلف ترقیاتی پروجیکٹوں کے لیے زمین کی ضرورت ہوتی ہے۔ اراضی کے حصول میں تاخیر سے زمین کی قیمت بڑھ جاتی ہے اور پروجیکٹوں پر عمل درآمد میں بھی تاخیر ہوتی ہے۔ اسی بات کو مدنظر رکھتے ہوئے اراضی حصول ڈائریکٹوریٹ کے ساتھ ایک الگ خصوصی سیل قائم کرنے کا فیصلہ کیا گیا ہے۔ اس سے زمین کے حصول کے عمل میں تیزی آئے گی اور بہار میں ترقیاتی پروجیکٹوں کو وقت پر مکمل کرنے میں مدد ملے گی۔
