پاکستان کے حوالے سے ہندوستان کی پالیسی میں کوئی تبدیلی نہیں: وزارت خارجہ

نئی دہلی، 28 اکتوبر (یواین آئی) ہندوستان نے واضح کیا ہے کہ پاکستان کے حوالے سے اس کی پالیسی میں کوئی تبدیلی نہیں آئی ہے۔وزارت خارجہ کے ترجمان رندھیر جیسوال نے بدھ کے روز یہاں میڈیا بریفنگ کے دوران اس بارے میں پوچھے گئے ایک سوال کے جواب میں واضح طور پر کہا کہ پہلگام دہشت گردانہ حملے کے بعد ہندوستان نے پاکستان کے حوالے سے ایک سخت پالیسی اختیار کی تھی۔ یہ پالیسی پہلے کی طرح برقرار ہے اور اس میں کوئی تبدیلی نہیں آئی ہے۔ان سے پوچھا گیا تھا کہ بدلتے ہوئے عالمی منظرنامے اور آئندہ ہونے والی بین الاقوامی میٹنگوں کے پیش نظر کیا ہندوستان پاکستان کے بارے میں اپنی پالیسی میں کسی تبدیلی پر غور کر رہا ہے۔قابل ذکر ہے کہ ہندوستان کا موقف رہا ہے کہ جب تک پاکستان دہشت گردی کی حمایت بند نہیں کرتا، اس کے ساتھ کسی بھی طرح کی بات چیت نہیں کی جائے گی۔