بکسر جیل میں قیدیوں کو ملی رہی ہے کمپیوٹر کی ٹریننگ

بکسر، 17 جون (یو این آئی) بہار کی بکسر ڈسٹرکٹ سینٹرل جیل میں قیدیوں کو تکنیکی معلومات ملنی شروع ہوگئی ہے۔نیشنل انسٹی ٹیوٹ آف الیکٹرانکس اینڈ انفارمیشن ٹیکنالوجی (بکسر) نے 11 جون 2025 سے 15 روزہ کمپیوٹر ٹریننگ پروگرام شروع کیا ہے جس میں پہلے مرحلے میں 30 قیدیوں کو منتخب کیا گیا ہے۔ یہ ٹریننگ کل 90 گھنٹے پر مشتمل ہوگی جس میں کمپیوٹر کی بنیادی معلومات جیسے ٹائپنگ، ونڈوز آپریشن، ورڈ پروسیسنگ اور انٹرنیٹ کا استعمال سکھایا جا رہا ہے۔اس ٹریننگ پروگرام کا ریاستی سطح پر آغاز 11 جون کو اروند کمار چودھری، ایڈیشنل چیف سکریٹری، ہوم ڈپارٹمنٹ، حکومت بہار نے پٹنہ سے آن لائن میڈیم کے ذریعے کیا تھا۔ یہ پروگرام ایک ساتھ آدرش سنٹرل جیل بیور (پٹنہ)، سنٹرل جیل بکسر اور شہید کھودی رام بوس سنٹرل جیل مظفر پور میں شروع کیا گیا تھا۔بکسر میں اس تربیت کو موثر بنانے کے لیے محکمہ داخلہ کی جانب سے دس کمپیوٹر سیٹ خصوصی طور پر فراہم کیے گئے ہیں۔ نیشنل انسٹی ٹیوٹ آف الیکٹرانکس اینڈ انفارمیشن ٹیکنالوجی (بکسر) تربیتی مواد فراہم کر رہا ہے، جبکہ تربیتی کام میں تکنیکی مدد سینئر ٹیچر سدھانشو شریواستو اور سینئر ٹیکنیکل اسسٹنٹ سمیت شریواستو دے رہے ہیں۔سینٹرل جیل بکسر کی سپرنٹنڈنٹ گیانیتا گورو کے مطابق قیدیوں کو نہ صرف نظریاتی بلکہ عملی تربیت بھی دی جارہی ہے۔ انہوں نے کہا کہ اس ٹریننگ میں بہترین کارکردگی کا مظاہرہ کرنے والے قیدیوں کو مستقبل میں لیول ٹو کی اعلیٰ سطحی تربیت بھی فراہم کی جائے گی۔