سید پرویز قیصر
احمد آباد کے نریندر مودی اسٹیڈیم میں کھیلے گئے جنوبی افریقہ اور افغانستان کے درمیان ہوالیگ میچ ٹائی رہا جو ٹونٹی ٹونٹی عالمی کپ کا چھٹا ٹائی میچ تھا۔ اس میچ میں جنوبی افریقہ نے پہلے بلے بازی کرتے ہوئے مقررہ20 اوور میں چھ وکٹ پر 187 رن بنائے تھے۔ افغانستان کے سبھی کھلاڑی19.4 اوور میں187 رن بناکر آوٹ ہوئے جس کی وجہ سے میچ ٹائی رہا۔ پہلے سپر اوور میں دونوں نے 17۔ْ 17 رن بنائے اور میچ ایک مرتبہ پھر ٹائی ہوگیا۔ دوسرے سپر اوور میں جنوبی افریقہ کے 23 رن کے جواب میں افغانستان نے دو وکٹ پر 19 رن بنائے جس کی بدولت اسے شکست ہوئی۔
ٹونٹی ٹونٹی عالمی کپ میں یہ پہلا میچ تھا جس میں فیصلہ دو سپر اوور میں ہوا جبکہ ٹونٹی ٹونٹی بین الاقوامی کرکٹ میں یہ تیسرا میچ تھا جس کا فیصلہ دو سپر اوور بعد ہوا۔ پہلا مرتبہ ایسا ہندوستان اور افغانستان کے درمیان بنگلور میں17 جنوری2024 کو کھیلا گیا تھا جبکہ نیدرلینڈس اور نیپال کے درمیان گلاسگو میں16 جون2025 کو تیسرے سپر اوور میں فیصلہ ہوا تھا۔
ٹونٹی ٹونٹی عالمی کپ میں پہلا ٹائی میچ ہندوستان اور پاکستان کے درمیان ڈربن میں14 ستمبر2007 کو کھیلا گیا تھا۔ اس میچ میں ٹاس جیت کر پہلے ہندوستان نے بلے بازی کرائی تھی جس نے مقررہ 20 اوور میں نو وکٹ پر141 رن بنائے تھے۔ پاکستان نے مقررہ20 اوور میں سات وکٹ پر 141 رن بناکر میچ ٹائی کرایا تھا۔ میچ کی آخری پر پاکستان کو ایک رن کی ضرورت تھی۔ سر ی سنت کی اس بال کو کور کی جانب کھیل کر مصباح الحق رن لینے کے لئے بھاگے تھے۔ اجیت اگرکر نے بال پکڑ کر سری سنت کو تھرو کی انہوں نے بال وکٹوں پر ماردی تھی اور مصباح الحق کو رن آوٹ کردیا تھا۔اس میچ اس زمانے میں کھیلا گیا تھا جب سپر اوور نہیں ہوتا تھا اور ہر ٹیم کو تین کھلاڑیوں کو وکٹ پر بال مارنی ہوتی تھی۔ ہندوستان کی جانب سے وریند سہواگ، ہربھجن سنگھ اور روبن اتھپا نے بالوں پر وکٹوں پر ماردیا تھا مگر پاکستان کی جانب سے
یاسر عرفات، عمر گل اور شاہد آفریدی بال کو وکٹوں پر مارنے میں ناکام رہے تھے ۔ ہندوستان نے بول آوٹ میں3-0 کامیابی حاصل کرکے دو پوائنٹس اپنے نام کرلئے تھے۔
سری لنکا میں2012 میں ہوئے ٹونٹی ٹونٹی عالمی کپ میں دو میچ ٹائی رہے تھے۔ پہلا ٹائی میچ نیوزی لینڈ اور سری لنکا کے مابین پالے کیلے میں 27 ستمبر 2012 کو ہوا تھا۔ اس میچ میںٹاس جیت کر پہلے بلے بازی کرتے ہوئے نیوزی لینڈ نے مقررہ20 اوور میں سات وکٹ پر 174 رن بنائے تھے۔ سری لنکا نے مقررہ 20 اوور میں چھ وکٹ پر 174 رن بناکر میچ ٹائی کرایا تھا۔سری لنکا کو میچ کی آخری بال پر ایک رن درکار تھے مگر لاہیرو تری مانے اس بال پر رن آوٹ ہوگئے۔ سپر اوور میں سری لنکا نے ایک وکٹ پر13 رن بنانے کے بعد نیوزی لینڈ کو ایک وکٹ پر سات رن بنانے دیئے۔
اسی میدان پر چار دن بعد ویسٹ انڈیز اور نیوزی لینڈ کے مابین ہونے والا میچ ٹائی ہواتھا۔ اس میچ میںٹاس ہارنے کے بعد پہلے بلے بازی کرتے ہوئے ویسٹ انڈیز کے سبھی کھلاڑی19.3 اوور میں139 رن بناکر آوٹ ہوگئے تھے۔ نیوزی لینڈ نے مقررہ20 اوور میں سات وکٹ پر139 رن بناکر میچ ٹائی کرایا تھا۔میچ کی آخری بال پر نیوزی لینڈ کو دو رن کی ضرورت تھی۔ ڈوگ برسویل دوسرا رن لینے کی کوشش میں رن آوٹ ہوئے تھے۔ سپر اوور میں نیوزی لینڈ نے کسی نقصان کے بغیر17 رن بنائے تھے۔ سری لنکا نے پانچ بالوں پر19 رن بناکر میچ جیتکت دو پوائنٹس حاصل کرلئے تھے۔
پچھلے عالمی کپ میں دو میچ ٹائی رہے تھے۔ پہلا ٹائی میچ عمان اور نامیبیا کے مابین برج ٹاون میں کھیلا گیا۔ٹاس ہارنے کے بعد عمان کے سبھی کھلاڑی 19.4 اوور میں109 رن بناکر آوٹ ہوگئے تھے۔ نامیبیا نے مقررہ 20 اوور میں چھ وکٹ پر 109رن بناکر میچ ٹائی کرالیا تھا۔ میچ کی آخری بال پر دو رن کی ضرورت تھی۔ مہران خان نے یہ بال کرائی جس پر لیگ بائی کا ایک رن بنا اور میچ ٹائی ہوا۔ اگر وکٹ کیپرنسم خوشی بال کو صحیح طرح پکڑ کر وکٹوں میں مارکر ملان کروگر کو رن آوٹ کرسکتے تھے۔
سپر اوور میں نامیبیا نے عمان کو شکست دیکر دو پوائنٹس اپنے نام کئے۔ عمان کی جانب سے سپر اوور بائیں ہاتھ کے تیز بالر بلال خان نے کرایا۔ ڈیوڈ ویز (13)اور گرہارد ایراس مس (8) نے21 رن بنائے جو ٹونٹی ٹونٹی بین الاقوامی کرکٹ میں مشترکہ طور پر تیسرے سب سے زیادہ رن تھے۔ ڈیود ویز نے ااپنی ٹیم کی جانب سے سپر اوور کرایا اور اس میں دس رن دیکر ایک کھلاڑی کو آوٹ کیا۔ عمان کی جانب سے نسم خوشی نے دو،عاقب الیاس نے سات اورزیشان مقصود نے ایک رن بنایا۔
ڈلاس میں6 جون 2024 کوپاکستان اور امریکہ کے مابین ڈلاس میں کھیلا گیا عالمی کپ کا میچ ٹائی رہا۔ پاکستان نے ٹاس ہارنے کے بعد پہلے بلے بازی کرتے ہوئے مقررہ20 اوور میں سات وکٹ پر159 رن بنائے تھے۔ امریکہ نے مقررہ20 اوور میں تین وکٹ پر 159 رن بناکر میچ ٹائی کرایا تھا۔ میچ کی آخری بال پر نتیش کمار نے چوکا لگاکر یہ میچ ٹائی کرایا تھا۔ سپر اوور میں امریکہ نے ایک وکٹ پر 18 رن بنائے تھے۔ محمد عامر نے تین وائیڈ بالیں کرائیں جن پر رن بھی بنے۔ پاکستان کی شکست کی سب سے اہم وجہ یہی تھی۔ وائید بالوں پر سات رن بنے۔ پاکستان نے ایک وکٹ پر 13 رن بنائے اور میچ گنوادیا۔ امریکہ کو سپر اوور کی جیت کے بعد دو پوائنٹس حاصل ہوگئے اور اس نے ٹونٹی ٹونٹی عالمی کپ میں اپنے پہلے دونوں میچ جیت لئے۔
