بہارشریف(محمد راشد عالم) نالندہ ضلع کے ہلسا اور ہرنوت تھانہ علاقوں میں جمعرات کی رات الگ الگ واقعات میں پانچ لوگوں کی موت ہونے کا معاملہ رونما ہوا ہے۔ذرائع کے مطابق پہلے واقعہ ہلسا تھانے کے علاقہ کے بائی پاس میں گزشتہ رات ایک ہی موٹرسائیکل پر سوار تین نوجوان جو شادی کی تقریب میں شرکت کے لیے جا رہے تھے،نامعلوم گاڑی نے کچل کر ہلاک کر دیا۔مرنے والوں میں روہت راج (20)،دلشانت کمار (18) اور اوم پرکاش (23) شامل ہیں جو ہلسا تھانہ علاقہ کے پرتھو گاؤں کے رہائشی ہیں۔واقعہ کے بارے میں اہل خانہ نے بتایا کہ تینوں نوجوان ایک موٹرسائیکل پر پٹنہ ضلع کے فرید پور تھانہ علاقہ کے اوریا گاؤں سے شادی کی بارات میں شامل ہونے جا رہے تھے کہ اسی دوران ہلسا تھانہ علاقہ بائی پاس کے قریب نامعلوم بولیرو کی ٹکر سے تینوں کی موقع پر ہی موت ہو گئی۔ہلسا تھانہ صدر ابھیجیت کمار نے بتایا کہ لاش کو پوسٹ مارٹم کے لیے بہارشریف صدر اسپتال بھیج دیا گیا ہے اور درخواست ملنے کے بعد کارروائی کی جائے گی، فی الحال پولیس نامعلوم گاڑی کی شناخت میں مصروف ہے۔دوسرے واقعہ میں ایک آٹو رکشہ اور کار میں زبردست ٹکر ہوئی جس کی سبب دونوں گاڑیاں 30 فٹ گہری پانی سے بھری کھائی میں جا گری اور اس حادثے میں دو افراد کی موقع پر ہی موت ہو گئی۔یہ واقعہ ہرنوت تھانہ علاقہ کے گناما پل کے قریب پیش آیا،مرنے والوں کی شناخت نور سرائے تھانہ علاقہ کے میار گاؤں کے رام پرویش پاسوان(58) اور پٹنہ ضلع کے سکسوہرا تھانہ علاقہ کے وویک کمار (50) کے طور پر ہوئی ہے جب یہ دونوں افراد ایک شادی کی تقریب میں شرکت کے بعد آٹو سے واپس آرہے تھے کہ ہرنوت تھانہ علاقہ کے بلوا پر گاؤں میں یہ واقعہ پیش آیا۔دونوں افراد کی موت پانی میں ڈوبنے سے ہوئی۔ وویک کمار گاؤں میں حکومت استاد ہیں۔اندھیرے کے باعث پولیس کو پل کے نیچے پانی سے لاش نکالنے میں کافی مشکلات کا سامنا کرنا پڑا، متوفی کی شناخت گاڑی کے نمبر اور جیب سے ملنے والے شناختی کارڈ سے ہوسکی۔واقعہ کی اطلاع ملتے ہی نالندہ کے رکن پارلیمنٹ کوشلندر کمار فوراً صدر ہسپتال پہنچکر ملاقات کی اور تعزیت کا اظہار کیا۔ہرنوت تھانہ صدر امردیپ کمار نے کہاکہ راہگیروں سے اطلاع ملی تھی۔پوسٹ مارٹم کرانے کے بعد لاش ورثاء کے حوالے کر دیا گیا ہے پولیس مزید کارروائی میں مصروف ہے۔
