سہرسہ(سالک کوثر امام)ضلع کے تحت سمری بختیار پور کے سر بیلہ گاؤں سے تعلق رکھنے والے گولڈ میڈلسٹ امان احمد بن غفران احمد نے اپنی محنت سے ایک پھر اپنا لوہا منوایا ہے، انہوں نے نیشنل الیجبیلیٹی ٹیسٹ جیسے امتحان میں 95.96 فیصد نمبر لا کر کامیابی کا پرچم لہراتے ہوئے والدین کے ساتھ ساتھ علاقے کا نام روشن کیاہے۔امان احمد نے اس کامیابی کا سہرا اپنے والدین کے سر باندھتے ہوئے کہا کہ میرے والد محترم اپنے بچوں کی کامیابی کے لیئے جو قربانی دی اور دے رہے ہیں یہ اسی کا صلہ ملا ہے میں کچھ نہیں ہوں ،میں بس اسی راہ پر چلتا رہا جس راہ پر والد محترم نے ڈالا اور اساتذہ کرام نے چلایا۔ میں اپنے تمام اساتذۂ کرام کا ممنون و مشکور ہوں جن کی وجہ سے یہ ممکن ہوسکا ،خاص کر اپنے استاذ محترم شہاب ظفر اعظمی صاحب اور مفتی نوشاد نوری صاحب کا جن کی رہبری میں منزل کا پہلا پڑاؤ سر کیا۔ اور اپنے اقربا خصوصاً جد محترم حافظ کوثر امام صاحب اور تمام مخلصین و محبین کا شکریہ جن کی دعائیں ہمیشہ آگے بڑھنے میں روشنی کا کام کیا ہے. واضح رہے کہ امان احمد پٹنہ یونیورسٹی سے ایم اے میں ٹاپر رہے ہیں جس پر اس وقت بہار کے گورنر راجندردوشو ناتھ آرلیکر نے اپنے ہاتھوں سے گولڈ میڈل سے نوازا تھا۔علاوہ ازیں امان احمد دینی تعلیم سے بھی آراستہ ہیں موصوف حافظ قرآن کے ساتھ ساتھ ایشیا کی عظیم اسلامک یونیورسٹی دار العلوم دیوبند سے فضیلت بھی کی ہے۔
