واشنگٹن ڈی سی، (یو این آئی ) ہندوستان کی نوجوان اسکوائش سنسنی اناہت سنگھ نے اپنے کیریئر کی سب سے بڑی کامیابی حاصل کرتے ہوئے اسکوائش آن فائر اوپن 2026کا خطاب جیت لیا۔ فائنل میں انہوں نے انگلینڈ کی ٹاپ سیڈ اور ورلڈ نمبر 10 جارجینا کینیڈی کو یکطرفہ مقابلے کے بعد شکست دے کر دنیا کو حیران کر دیا۔اتوار کے روز کھیلے گئے فائنل میں دنیا کی 31 ویں نمبر کی کھلاڑی اناہت سنگھ نے کامن ویلتھ گیمز کی موجودہ چیمپئن جارجینا کینیڈی کے خلاف محض 26 منٹ میں فتح سمیٹی۔ مقابلے کا اسکور 3-0 (12-10, 11-5, 11-7) رہا۔یہ اناہت سنگھ کا پہلا پی ایس اے برونز لیول خطاب ہے، جو ان کے پیشہ ورانہ کیریئر کی اب تک کی سب سے بڑی عالمی جیت ہے۔ مجموعی طور پر پی ایس اے ٹور پر یہ ان کا 15 واں اعزاز ہے۔میچ کے بعد اپنی جیت پر تبصرہ کرتے ہوئے اناہت سنگھ نے کہا”برٹش جونیئر اوپن میں خراب کارکردگی کے بعد میں بہت دباؤ میں تھی، لیکن میں نے اپنی ٹریننگ پر توجہ دی تاکہ کھیل میں بہتری لا سکوں۔ میں اپنی رینکنگ بڑھانا چاہتی تھی اور مجھے خوشی ہے کہ میں اس پلیٹ فارم پر خود کو ثابت کر پائی۔اناہت کی اس جیت نے نہ صرف ان کی عالمی رینکنگ میں بہتری کی راہ ہموار کی ہے بلکہ ہندوستانی اسکوائش کے روشن مستقبل کی نوید بھی سنائی ہے۔
