نوح،میوات : صوبہ ہریانہ سے حج بیت اللہ 2023 کےلئے درخواست گزار 1932 عازمین حج میں سے آن لائن قرعہ اندازی کے ذریعہ 1802عازمین حج منتخب کئے گئے ہیں جن میں70 سال اور اس سے زائد عمر کے عازمین مع ایک ساتھی کی تعداد 527 جبکہ 4 بغیر محرم خواتین شامل ہیں۔ علاوہ ازیں 201درخواست گزار کو ویٹنگ میں رکھا گیا ہے اس موقع پر ہریانہ اسٹیٹ حج کمیٹی کے چیئرمین محسن چودھری نے اپنی خوشی کا اظہار کرتے ہوئے قرعہ میں منتخب ہونے والے تمام عازمین حج کو مبارکباد پیش کی۔ انہوںنے بتایا کہ منتخب عازمین حج کو اسٹیٹ حج کمیٹی کی جانب سے ان کے رجسٹرڈ موبائل نمبر پر مطلع کیا جارہا ہے۔
حج کمیٹی کے سابق ممبر و مدرسہ جامعہ عربیہ فیض سبحانیہ فروز پورنمک کے مہتمم مولانا ظفرالدین قاسمی نے بتایا کہ منتخب عازمین حج کو آئندہ 7اپریل تک پہلی قسط کے طور پر 81,000روپے بینک میں جمع کرنے ہوں گے۔بعد ازیں جمع رقم کی رسید ، اصل پاسپورٹ، سفید بیگ گراؤ ڈ والی ایک فوٹو اور میڈیکل سرٹیفکیٹ اور دیگر کاغذات ہریانہ اسٹیٹ حج کمیٹی میں جمع کرادیں۔ انہوںنے بتایا کہ متعین تاریخ تک اگر قسط جمع نہیں کرائی گئی تو ویٹنگ لسٹ سے اس کی جگہ دوسرے عازمین حج کو موقع د ے دیا جائے گا۔ سفر حج سے متعلق کسی بھی طرح کی جانکاری کے لیے موبائل نمبر9813419562 پر رابطہ کر سکتے ہیں۔
