سید پرویزقیصر
ممبئی کے وانکھڑے اسٹیڈیم میں سن رائزرس حیدرآباد کے خلاف سوریہ کمار یادو اور تلک ورما نے چوتھے وکٹ کی بغیر ٹوٹی شراکت میں13.1اوور میں143 رن کا اضافہ کیا جو انڈین پریمیر لیگ میں ممبئی انڈینس کے لئے تیسرے سب سے بڑی شراکت اور انڈین پریمیر لیگ میں چوتھے وکٹ کی دوسری سب سے بڑی شراکت ہے۔
ممبئی انڈینس کا تیسرا وکٹ پانچویں اوور کی پہلی بال پر31 رن کے مجموعی اسکور پر گرا جس کے بعد سوریہ کمار یادو اور تلک ورما نے 13.1 اوور میں143 رن جوڑے۔ سوریہ کمار یادو68 منٹ میں 51 بالوں پر12 چوکوں اور چھ چھکوں کی مدد سے آوٹ ہوئے بغیر102 رن بنائے جبکہ تلک ورما 64 منٹ میں32 بالوں پر چھ چوکوں کی مدد سے37 رن بناکر ناٹ آوٹ لوٹے۔ ان د ونوں کی شراکت کی وجہ سے ممبئی انڈینس نے اس میچ میں سات وکٹ سے جیت اپنے نام کی۔
انڈین پریمیر لیگ میں چوتھے وکٹ کی سب سے بڑی شراکت کا ریکارڈ شمروں ہیٹ میئر اور گور کیرت سنگھ مان کے پاس ہے۔ ان دونوں کھلاڑیوں نے رائل چیلنجرس بنگلور کی جانب سے کھیلتے ہوئے سن رائزرس حیدرآباد کے خلاف بنگلور میں4 مارچ2019 کو ہوئے میچ میں14.5 اوور میں144 رن جوڑے تھے۔ رائل چیلنجرس بنگلور کا تیسرا وکٹ2.5 اوور میں20 رن کے مجموعی اسکور پر گرا تھا جس کے بعد چوتھے وکٹ کی اتنی بڑی شراکت ہوئی تھی۔ شمروں ہیٹ میئر کے آوٹ ہونے کی وجہ سے یہ شراکت ٹوٹی تھی جو81 منٹ میں47 بالوں پر چار چوکوں اور چھ چھکوں کی مدد سے75 رن بناکر آوٹ ہوئے تھے۔ انکے آوٹ ہونے کے بعد کیرت سنگھ مان نے اپنی اننگ جاری رکھی اور80 منٹ میں48 بالوں آٹھ چوکوں اور ایک چھکے کی مدد سے65 رن بناکر آوٹ ہوئے تھے۔ اس میچ میں رائل چیلنجرس بنگلور نے چار وکٹ سے جیت اپنے نام کی تھی۔
ممبئی انڈینس کے لئے سب سے بڑی شراکت کا ریکارڈ روہت شرما اور ہرشل گبس کے پاس ہے ۔ ان دونوں کھلاڑیوں نے کولکاتہ میں کولکاتہ نائیٹ رائیڈرس کے خلاف12 مئی 2012کو ہوئے میچ میں دوسرے وکٹ کی شراکت میں علیحدہ ہوئے بغیر 167 رن جوڑے تھے۔ ممبئی انڈینس کا پہلا وکٹ2.2 اوور میں15 رن کے مجموعی اسکور پر گرا تھا جس کے بعدروہت شرما اور ہرشل گبس نے 17.4 اوور میں علیحدہ ہوئے بغیر 167 رن کا اضافہ کیا۔ روہت شرما76 منٹ میں 60بالوں پر12 چوکوں اور پانچ چھکوں کی مدد سے 109 رن بناکر ناٹ آوٹ رہے جبکہ ہرشل گبس نے88 منٹ میں58 بالوں پر سات چوکوں اور دو چھکوں کی مدد سے آوٹ ہوئے بغیر 66رن بنائے۔ اس میچ میں ممبئی انڈینس نے27 رن سے جیت حاصل کی تھی۔
جے پور میں20 مئی2012 کو راجستھان رائلز کے خلاف کھیلے گئے میچ میں سچن ٹنڈولکر او ر ڈیون اسمتھ نے پہلے وکٹ کی بغیر ٹوٹی شراکت میں18 اوور میں163 رن جوڑے تھے جو ممبئی انڈینس کی جانب سے دوسری سب سے بڑی شراکت ہے۔ سچن ٹنڈولکر نے 51 بالوں پر چھ چوکوں کی مدد سے آوٹ ہوئے بغیر58 رن بنائے تھے جبکہ ڈیون اسمتھ58 بالوں پر دس چوکوں اور تین چھکوں کی مدد سے87 رن بناکر ناٹ آوٹ رہے تھے۔ اس میچ میں ممبئی انڈینس نے دس وکٹ سے جیت اپنے نام کی تھی۔
ڈیلی الیوم
