نئی دہلی ، دہلی ممبران اسمبلی کے لیے خوشخبری ہے۔ کیونکہ تنخواہ میں 66فیصداضافہ ہو گیا ہے ،دہلی کے ایم ایل ایز کی تنخواہوں اور الاؤ نسز میں اضافہ کے لیے صدر سے منظوری مل گئی ہے۔ اس کے ساتھ ہی دہلی کے تمام ایم ایل اے کی تنخواہ میں اب 66 فیصد اضافہ ہوا ہے۔ اب دہلی کے ایم ایل اے کو 90000 ہزار تک تنخواہ ملے گی۔ اس سے پہلے دہلی کے ممبران اسمبلی کی تنخواہ 54000 روپے تھی۔تنخواہوں میں اضافے کی اس تجویز کی صدر مملکت سے منظوری ملنے کے بعد محکمہ قانون، انصاف اور قانون سازی امور نے تنخواہوں میں اضافے کا نوٹیفکیشن جاری کر دیا ہے۔ اب وزیر اعلیٰ، وزرا ، اسمبلی سپیکر اور قائد حزب اختلاف کو تنخواہ اور الاؤ نس سمیت کل 1.70 لاکھ روپے ماہانہ ملیں گے، جب کہ پہلے 72 ہزار روپے ملتے تھے۔ اہم بات یہ ہے کہ اس تنخواہ میں اضافے کی تجویز 4 جولائی 2022 کو دہلی اسمبلی میں منظور کی گئی تھی۔دہلی کے ممبران اسمبلی کی تنخواہ میں اضافے کے حوالے سے ایک دلچسپ بات سامنے آئی ہے کہ پورے 12 سال بعد ان کی تنخواہ میں اضافہ ہوا ہے۔ محکمہ کی طرف سے جاری کردہ نوٹیفکیشن کے مطابق ایم ایل ایز کی بڑھتی ہوئی تنخواہ کا نظام 14 فروری 2023 سے لاگو ہوگا۔اطلاعات کے مطابق گزشتہ سال جولائی کے مہینے میں الگ الگ بل پاس کرنے کے بعد تنخواہوں میں اضافے کی تجویز وزارت داخلہ کو بھیجی گئی تجویز پر غور کرنے کے بعد صدر نے 14 فروری کو اسے منظوری دے دی ہے جس کی وجہ سے ایم ایل اے کی تنخواہ میں 66 فیصد اضافہ ہوا ہے۔پہلے بنیادی 12 ہزار تھا جو اب 30 ہزار ہو گیا ہے۔ یومیہ الاؤ نس 1000 تھا جو اب 1500 ہو گیا ہے۔ وزیراعلیٰ، وزرا، اسمبلی سپیکر اور قائد حزب اختلاف کی بنیادی تعداد 18 ہزار سے بڑھ کر 60 ہزار ہوگئی۔ یہی نہیں، اس کے علاوہ ایم ایل اے کو سالانہ ایک لاکھ روپے کا سفری الاؤنس ملے گا، جو اب تک 50 ہزار روپے تھا۔ دہلی کے ایم ایل اے کو بھی ہر مدت میں لیپ ٹاپ، پرنٹر، موبائل خریدنے پر ایک لاکھ روپے ملیں گے۔
