نئی دہلی،2جنوری ،سماج نیوز سروس: ائیرلائنس میں نوکری پکی ہو چکی ہے اس طرح کی جعلسازی کرنے والے ملزم کی شناخت ایشو ورما عرف راہول سکسینہ کے طور پر کی گئی ہے، جس نے مبینہ طور پر اس خاندان کو نشانہ بنایا جب ان کی بیٹی نے جون 2023 میں جاب سرچ انجن کی ایپ پر اپنی جاب سرچ پروفائل پوسٹ کی تھی۔ورما نے خاتون سے رابطہ کیا، اپنا تعارف ایان ملک” کے طور پر کرایا اور اسے IndiGo میں ریسپشنسٹ کے عہدے کی پیشکش کی۔ اس کے بعد اس نے خاتون کے کئی فرضی انٹرویو آن لائن لیے اور پھر اسے 28 ہزار روپے ماہانہ کی ابتدائی تنخواہ کے ساتھ فرضی آفر لیٹر بھیجا۔ خاندان کو مزید راضی کرنے کے لیے، ورما نے اسے ایک اور ساتھی، سنجے بنگر سے ملوایا، جس نے اسی طرح بیٹے کو نوکری کی پیشکش کی اور اسے ایک جعلی جوائننگ لیٹر دیا۔ڈی سی پی شاہدرہ روہت مینا کے مطابق 31 دسمبر کو شکایت کنندہ شمی مہرا، 48 سالہ، جگت پوری، دہلی کی رہنے والی، نے بتایا کہ اس کے دو بچے تیشا اور نتن مہرا ہیں۔ جون 2023 میں، ان کی بیٹی تیشا نے نوکری کی تلاش کے لیے ایپ پر اپنا پروفائل بنایا۔ اس کی بیٹی سے اس کے موبائل پر رابطہ کیا گیا اور اسے سرچ انجن کی ایپ پر ریسپشنسٹ کی نوکری کی پیشکش کی گئی۔ اس کے بعد خاندان نے ورما کو کئی مہینوں کے دوران قسطوں میں 50 لاکھ روپے ادا کئے۔ تاہم تصدیق کے بعد جوائننگ لیٹر جعلی پائے گئے جس کے بعد اہل خانہ نے جگت پوری پولیس اسٹیشن میں شکایت درج کرائی۔شکایت کی بنیاد پر، پولیس نے تعزیرات ہند کی دفعہ 420 (دھوکہ دہی)، 406 (مجرمانہ اعتماد کی خلاف ورزی) اور 34 (مشترکہ نیت) کے تحت مقدمہ درج کیا ہے۔ تفتیش کے دوران، پولیس کو پتہ چلا کہ ورما نے جوائننگ لیٹر بھی جعلی بنایا تھا، جس کے بعد الزامات میں دفعہ 468 (جعل سازی) اور 471 (جعلی دستاویزات کا استعمال) شامل کیا گیا۔ پولیس نے شکایت کنندہ شمی مہرا کی شکایت پر آئی پی سی کی دفعہ 420/406/34 کے تحت مقدمہ درج کرکے تحقیقات شروع کردی۔پولیس نے کہا، "تحقیقات کے دوران پتہ چلا کہ ملزمین کی طرف سے متاثرین کو دئیے گئے تمام جوائننگ لیٹر فرضی تھے۔ اس کے بعد اس کیس میں جعلسازی کی دفعہ یعنی 468/471 آئی پی سی بھی شامل کی گئی ہے۔ ملزم ایشو ورما عرف راہول سکسینہ (عمر 29 سال) کو مذکورہ معاملے میں گرفتار کیا گیا تھا۔ وہ اس وقت انڈیگو میں کام کر رہا تھا۔پولیس کے مطابق ملزم ایشو ورما عرف راہول سکسینہ نے ایم بی اے کی تعلیم حاصل کی تھی اور وہ انڈیگو ایئر لائنز میں بی ایم آئی (باڈی ماس انڈیکس) افسر کے طور پر کام کر رہا تھا۔ اس کے والد کا انتقال ہو چکا تھا اور وہ اپنی ماں اور بڑے بھائی کے ساتھ رہ رہا تھا۔ پولیس نے کہا کہ پوری سنڈیکیٹ کی مزید تفتیش جاری ہے۔
