عامر سلیم خان
نئی دہلی، سماج نیوز سروس:کانگریس کو ایک بار پھر مبینہ ’ مسلم پارٹی‘ باور کرانے پر مشتمل ایک ویڈیو کومبینہ انتخابی حربہ بنانے کے بعد اب بی جے نے دعویٰ کیا ہے کہ ’ بھارت جوڑو یاترا‘میں جو فلمی شخصیات راہل گاندھی کے ساتھ نظر آرہی ہیں وہ سبھی ’ پیڈ‘ ہیں۔ یعنی انہیں یاترا میں شامل کرنے کیلئے روپئے ادا کئے گئے ہیں۔دراصل بالی ووڈ اور ٹی وی انڈسٹری کے کچھ اداکار راہل گاندھی کے ساتھ کانگریس کی بھارت جوڑو یاترا میں نظر آئے ہیں۔ اب ایسے میں بھارتیہ جنتا پارٹی (بی جے پی) پر اس کااثر ہونا لازمی تھا، اس حوالے سے پارٹی نے ایک بڑا دعویٰ کرڈالا ہے کہ فلمی اداکاروں کی شمولیت میں کوئی ’ گول مال‘ ہے۔ دعویٰ یہ کیا گیاہے کہ راہل گاندھی کے ساتھ بھارت جوڑو یاترا میں حصہ لینے والے فلمی اداکاروں اور اداکاراؤں کو پیسے دیے گئے ہیں۔ اس دعوے کے ساتھ ایک واٹس ایپ پیغام بھی شیئر کیا گیا ہے۔
بھارتیہ جنتا پارٹی کے اس دعوے پر کانگریس نے جوابی حملہ کرتے ہوئے کہاہے کہ اس سے پتہ چلتا ہے کہ بی جے پی یاترا کو بدنام کرنے کیلئے کتنی بے چین ہے۔ حال ہی میں بالی ووڈ اداکار امول پالیکر نے مہاراشٹرا کی یاترا میں حصہ لیاتھا۔ اس کے بعد ایک اور اداکارہ آکانکشا پوری نے ٹی وی اداکارہ رشمی دیسائی کے ساتھ یاترا میں حصہ لیاہے۔ ادھرفلمی اداکاروں اور اداکاراؤں کی شمولیت پر ایک واٹس ایپ پیغام پوسٹ کرتے ہوئے بی جے پی لیڈر نتیش رانے نے لکھا کہ راہل گاندھی کا دورہ ’’مینجڈ‘‘ ہے۔ یہ سب گول مال ہے بھائی! یہ پپو کبھی پاس نہیں ہوگا۔ کانگریس کو مدھیہ پردیش میں راہل گاندھی کے ساتھ 15 منٹ چلنے کیلئے ایک اداکار چاہئے۔ سفر اور ان کی رہائش کے انتظامات کی ذمہ داری ہماری ہوگی۔ پیغام میں کہا گیا ہے کہ اداکار سفر کے مطابق اور اپنی پسند کے لحاظ سے وقت کا انتخاب کرسکتے ہیں۔
پیغام میں مزید کہاگیا ہے کہ اداکار کو یاترا کیلئے نومبر میں دستیاب ہونا چاہئے۔ اتنا ہی نہیں پیغام میں 15 منٹ کے سفر میں شامل ہونے کیلئے پیسے دینے کی بات کہی گئی ہے۔ادھر کانگریس لیڈر سچن ساونت نے اس کا جواب دیتے ہوئے ثبوتوں پر سوال اٹھائے ہیں۔ انہوں نے کہا کہ اس سے صاف ظاہر ہوتا ہے کہ بی جے پی یاترا کو بدنام کرنے کیلئے کتنی بے چین ہے۔ اس طرح کی جعلی واٹس ایپ تصاویر کو ثبوت کے طور پر دکھایا جا رہا ہے، جس پر کوئی نام یا نمبر نہیں ہے۔سچن ساونت نے کہاکہ مشہور شخصیات کے ذریعہ سیاسی فائدہ اٹھانے کیلئے بی جے پی سہارا لینے کے فن میں ماہر ہے، کانگریس نہیں۔ کیا ہمیں یو پی اے حکومت کے دوران پٹرول اور ڈیزل کی قیمتوں پر مشہور شخصیات کے ٹویٹس یاد نہیں ہیں؟ ہر کوئی جانتا ہے کہ بی جے پی کے آمرانہ اور فرقہ انگیز ایجنڈے کیخلاف کھڑے ہونے کیلئے ہمت کی ضرورت ہوتی ہے۔ جن لوگوں نے بھارت جوڑو یاترا میں حصہ لیا وہ ہمارے مفاد اور ملک کیلئے کھڑے ہیں۔
بتادیں کہ جب بھارت جوڑو یاترا ضلع اکولا پہنچی تو راہل گاندھی کے اس سفر میں بالی ووڈ اداکارہ ریا سین نظر آئیں۔ جس میں اداکارہ ریا سین بھارت جوڑو یاترا میں راہل گاندھی کے ساتھ چلتی ہوئی نظر آئیں۔ اس سے قبل بالی ووڈ اداکارہ پوجا بھٹ بھی راہل گاندھی کی بھارت جوڑو یاترا میں حصہ لے چکی ہیں۔اداکارہ پوجا بھٹ نے حیدرآباد میں راہل گاندھی کے ساتھ کانگریس کی بھارت جوڑو یاترا میں حصہ لیاتھا۔ کانگریس نے ٹویٹ کرکے پوجا بھٹ کی یاترا میں حصہ لینے کی تصویر شیئر کی تھی۔ اس میں لکھا تھا کہ ہر روز نئی تاریخ بن رہی ہے۔ ملک میں محبت کے متلاشیوں کی تعداد روز بروز بڑھ رہی ہے۔ اس دوران اداکارہ کو راہل گاندھی اور دیگر کانگریس لیڈروں کے ساتھ چہل قدمی کرتے دیکھا گیا۔ ان شخصیات کے بعد فلم اداکار سوشانت سنگھ 10 نومبر کو مہاراشٹر کے ناندیڑ میں یاترامیں شامل ہوئے تھے۔
