نئی دہلی، (یو این آئی): ہندوستانی باکسنگ کے نامور کھلاڑی وجیندر سنگھ کو ایشیائی باکسنگ کونسل کا رکن مقرر کیا گیا ہے۔ یہ تقرری ایک ممتاز کھلاڑی سے عالمی کھیل انتظامیہ تک کے ان کے سفر میں ایک اور اہم سنگِ میل کی حیثیت رکھتی ہے۔وجیندر، جو باکسنگ میں ہندوستان کے پہلے اولمپک تمغہ یافتہ کھلاڑی ہیں، اس کھیل کی اعلیٰ ترین سطح پر تقریباً دو دہائیوں پر محیط وسیع تجربہ رکھتے ہیں۔ انہوں نے یہ تجربہ ابتدائی اور پیشہ ورانہ، دونوں سطحوں کی باکسنگ میں حاصل کیا۔ ایشیائی باکسنگ کونسل میں ان کی تقرری اس کھیل پر ان کی گہری سمجھ اور پورے برِاعظم میں باکسنگ کے فروغ کے لیے ان کے مسلسل عزم کی عکاس ہے۔اس پیش رفت پر اظہارِ خیال کرتے ہوئے وجیندر سنگھ نے کہا "ایشین باکسنگ کونسل کا رکن مقرر ہونا میرے لیے اعزاز کی بات ہے۔ میں باکسنگ فیڈریشن آف انڈیا اور اس کی قیادت کا شکر گزار ہوں کہ انہوں نے مجھ پر یہ ذمہ داری سونپی۔ مجھے امید ہے کہ میں بین الاقوامی سطح پر اپنی صلاحیتوں کے بہترین استعمال کے ساتھ اس کردار کو نبھا سکوں گا۔ جس طرح ہم نے بیجنگ میں تاریخ رقم کی، اسی طرح میں ایشیائی باکسنگ کے فروغ کے لیے کام کرنے کے لیے پُرعزم ہوں، بالخصوص ہندوستانی باکسرز پر خصوصی توجہ کے ساتھ، اور اپنے کھلاڑیوں کو مستقبل میں مزید بڑی کامیابیاں حاصل کرنے میں مدد دوں گا۔”ایشین باکسنگ کونسل پورے ایشیا میں اس کھیل کے مسابقتی اور ترقیاتی ڈھانچے کی تشکیل میں کلیدی کردار ادا کرتی ہے۔ وجیندر کی شمولیت سے پالیسی سازی، نظم و نسق اور طویل مدتی منصوبہ بندی میں کھلاڑیوں کے مفادات کو ترجیح دینے والا نقطۂ نظر شامل ہونے کی توقع ہے۔وجیندر سنگھ ہندوستان کی کھیلوں کی دنیا کی اہم شخصیات میں شامل ہیں۔ انہوں نے 2008 کے بیجنگ اولمپکس میں تاریخی کانسی کا تمغہ جیتا، جبکہ دولتِ مشترکہ (کامن ویلتھ) اور ایشیائی مقابلوں میں بھی متعدد تمغے اپنے نام کیے تھے۔
