لکھنؤ، (یو این آئی) قنوج میں امرت بھارت اسٹیشن یوجنا کے تحت قنوج ریلوے اسٹیشن کو گورکھپور ریلوے اسٹیشن کی طرز پر تیار کرنے کے حکومتی منصوبے پر سماج وادی پارٹی (ایس پی) کے قومی صدر اکھلیش یادو نے طنز کیا ہے۔ اکھلیش یادو نے سوشل میڈیا کے ذریعے کہا کہ ایودھیا میں بنایا گیا ریلوے اسٹیشن بھارتیہ جنتا پارٹی (بی جے پی) کے کرپٹ ماڈل کی مثال ہے۔ اتوار کے روز اکھلیش یادو نے کہا کہ حکومت کو چاہیے کہ تعمیراتی کاموں میں معیار (کوالٹی) کو یقینی بنائے۔ انہوں نے طنزیہ انداز میں کہا کہ بنتے ہی گر جانے والی پانی کی ٹنکی تھوڑی دور بنائی جائے۔ چھت ایسی ہو کہ نیچے کھڑے لوگوں کو چھتری نہ لگانی پڑے۔ اپروچ روڈ کی تہہ نہ اکھڑے۔ انہوں نے مزید کہا کہ اگر لفٹ اور اسکیلیٹر لگائے جائیں تو وہ صحیح طریقے سے کام بھی کریں۔ ایس پی صدر نے کمیشن خوری پر بھی سوال اٹھاتے ہوئے کہا کہ تعمیراتی کاموں میں شفافیت ہونی چاہیے اور مسافروں کے لیے ویٹنگ ایریا کو واقعی آرام دہ بنایا جائے، کیونکہ اکثر ریل گاڑیاں کافی تاخیر کا شکار ہوتی ہیں۔ انہوں نے پارکنگ کے انتظام اور بیت الخلا کی حالت بہتر بنانے کا بھی مطالبہ کیا۔ اکھلیش یادو نے یہ بھی کہا کہ ٹھیکیدار مقامی ہونا چاہیے تاکہ ذمہ داری طے کی جا سکے۔ انہوں نے الزام لگایا کہ بی جے پی حکومت میں تعمیراتی کاموں کے معیار پر توجہ نہیں دی جا رہی ہے۔ قابل ذکر ہے کہ ایودھیا ریلوے اسٹیشن کے احاطے میں ایک دیوار گرنے کا واقعہ سامنے آیا تھا، جس کے بعد تعمیرات کے معیار پر سوالات اٹھے تھے۔ تاہم، پریس انفارمیشن بیورو (پی آئی بی) کے فیکٹ چیک یونٹ نے سوشل میڈیا پرنو تعمیر شدہ ایودھیا دھام ریلوے اسٹیشن کی چاردیواری گرنے کی خبروں کی تردید کی تھی۔
