دبئی، ( یو این آئی) دبئی ڈیوٹی فری ٹینس چیمپئن شپ میں ایک بڑا الٹ پھیر دیکھنے میں آیا ہے جہاں ایونٹ کی فیورٹ اور ٹاپ سیڈ کھلاڑی ایلینا ریباکینا انجری کے باعث ٹورنامنٹ سے دستبردار ہو گئی ہیں۔ اس غیر متوقع صورتحال نے کروشیا کی ابھرتی ہوئی کھلاڑی اینٹونیا روزک کے لیے کامیابی کے نئے دروازے کھول دیے ہیں۔ 23 سالہ اینٹونیا روزک، جو کوالیفائنگ راؤنڈ میں شکست کے بعد بطور ‘لکی لوزر مین ڈرا میں شامل ہوئی تھیں، اب اپنے کیریئر کے پہلے WTA 1000 کوارٹر فائنل میں پہنچ گئی ہیں۔ انجری سے قبل دونوں کھلاڑیوں کے درمیان کانٹے دار مقابلہ دیکھنے کو ملا، جہاں کھیل کسی بھی سمت مڑ سکتا تھا۔ٹاپ سیڈڈ ایلیناریباکینا نے پہلا سیٹ 5-7سے جیتا، تاہم عالمی نمبر 67 کروشین ٹینس کھلاڑی اینٹونیا روزک نے ہمت نہ ہاری اور دوسرا سیٹ 4-6 سے جیت کر مقابلہ برابر کر دیا۔ فیصلہ کن تیسرے سیٹ کے آغاز میں ہی کروشین 23 سالہ اینٹونیا روزک نے ایلینا ریباکینا کی سروس بریک کر کے برتری حاصل کی، جس کے فوراً بعد قازقستانی کھلاڑی نے طبی امداد طلب کی۔انجری کی شدت کے باعث ایلیناریباکینا نے میچ جاری نہ رکھنے کا فیصلہ کیا، جس کے نتیجے میں کروشین 23 سالہ اینٹونیا روزک کو فاتح قرار دے دیا گیا۔اینٹونیا روزک کے لیے یہ چیمپئن شپ کسی خواب سے کم نہیں ہے۔وہ ایونٹ سے تقریباً باہر ہو چکی تھیں۔لکی لوزر کے طور پر واپسی کی۔اب وہ دنیا کی بہترین 8 کھلاڑیوں (کوارٹر فائنل) میں شامل ہو چکی ہیں۔
