نامور گلوکارہ آشا بھوسلے کا انتقال ، دنیا ایک عہد سے محروم

ممبئی ،  (یو این آئی) ہندوستانی موسیقی کی نامور اور لیجنڈری پلے بیک سنگر آشا بھوسلے کا آج انتقال ہو گیا، جس سے فنِ موسیقی کی دنیا ایک عظیم آواز سے محروم ہو گئی۔ اطلاعات کے مطابق آشا بھوسلے کو دل کا دورہ پڑنے کے بعد اسپتال میں داخل کیا گیا تھا، جہاں وہ زیرِ علاج تھیں، تاہم وہ جانبر نہ ہو سکیں۔ ان کے انتقال کی تصدیق ان کے بیٹے آنند بھوسلے نے کی۔ آنند بھوسلے نے بتایا کہ ان کی والدہ کی میت کو کل صبح 11 بجے سے دوپہر 2 بجے تک ان کی رہائش گاہ پر آخری دیدار کے لیے رکھا جائے گا، جس کے بعد شام 4 بجے ممبئی کے شیواجی پارک میں ان کی آخری رسومات ادا کی جائیں گی۔ آشا بھوسلے بھارتی موسیقی کی تاریخ کی ایک بے مثال آواز تھیں، جنہوں نے کئی دہائیوں تک اپنی گائیکی سے کروڑوں مداحوں کے دلوں پر راج کیا۔ انہوں نے مختلف زبانوں میں ہزاروں گانے گائے اور اپنی ہمہ جہتی صلاحیت کے باعث عالمی شہرت حاصل کی۔ ان کے انتقال کی خبر کے بعد ملک بھر میں سوگ کی فضا قائم ہو گئی ہے اور فنکاروں، مداحوں اور سیاسی شخصیات کی جانب سے انہیں خراجِ عقیدت پیش کیا جا رہا ہے۔ وزیرِ اعظم نریندر مودی نے اتوار کو معروف پلے بیک سنگرآشا بھوسلے کے انتقال پر گہرے رنج و غم کا اظہار کرتے ہوئے انہیں ہندوستان کی سب سے بااثر اور ہمہ جہت آوازوں میں سے ایک قرار دیا۔ ایکس پر شیئر کیے گئے ایک جذباتی پیغام میں وزیرِ اعظم نے کہا کہ وہ ان کے انتقال سے "انتہائی رنجیدہ” ہیں اور ان کے کئی دہائیوں پر محیط شاندار موسیقی کے سفر کو خراجِ تحسین پیش کیا۔ انہوں نے کہاکہ "ان کا غیر معمولی موسیقی کا سفر، جو کئی دہائیوں پر محیط ہے، ہماری ثقافتی وراثت کو مالا مال کرتا رہا اور دنیا بھر میں بے شمار دلوں کو چھوتا رہا۔” مودی نے اس بات پر بھی زور دیا کہ ان کی آواز نے ہندوستانی سنیما اور موسیقی کی کئی نسلوں کی نمائندگی کی۔ ان کی بے مثال ہمہ گیری کو یاد کرتے ہوئے مودی نے کہا کہ چاہے وہ سریلی دھنیں ہوں یا پرجوش گیت، آشا بھوسلے کی آواز میں ایک "لازوال چمک” تھی جو ہر دور اور ہر سامع تک پہنچتی رہی۔ انہوں نے ایک ذاتی یاد بھی شیئر کی اور کہاکہ "میں ہمیشہ ان سے ہونے والی ملاقاتوں کو یاد رکھوں گا”، جس سے ان کی شخصیت کی گرمجوشی اور مقبولیت کا اندازہ ہوتا ہے۔ تعزیت کا اظہار کرتے ہوئے وزیرِ اعظم نے کہاکہ "میری دلی تعزیت ان کے خاندان، مداحوں اور موسیقی کے شائقین کے ساتھ ہیں۔ وہ آنے والی نسلوں کو متاثر کرتی رہیں گی اور ان کے گیت ہمیشہ لوگوں کی زندگیوں میں گونجتے رہیں گے۔” آشا بھوسلے، جن کا کیریئر 1940 کی دہائی میں شروع ہوا، ہندوستانی سنیما کی سب سے مشہور پلے بیک گلوکاراؤں میں شمار ہوتی تھیں۔ انہوں نے متعدد زبانوں میں ہزاروں گانوں کو اپنی آواز دی۔ کلاسیکی، غزل، کیبری اور پاپ سمیت مختلف اصناف میں مہارت رکھتے ہوئے انہوں نے موسیقی کی دنیا میں ایک منفرد مقام بنایا اور سات دہائیوں سے زائد عرصے تک ایک عظیم ثقافتی شخصیت رہیں۔ ان کا انتقال ہندوستانی موسیقی کے ایک عہد کے خاتمے کے مترادف ہے، اور ملک و دنیا بھر سے مداحوں اور فنکاروں کی جانب سے خراجِ عقیدت پیش کیا جا رہا ہے۔ دہلی قانون ساز اسمبلی کے اسپیکر وجیندر گپتا نے اتوار کو معروف بھارتی گلوکارہ آشا بھوسلے کے انتقال پر گہرے رنج و غم اور دلی تعزیت کا اظہار کیا۔ اپنے تعزیتی پیغام میں گپتا نے کہا کہ آشا بھوسلے نے اپنے شاندار کیریئر کے دوران 12,000 سے زائد گیت گائے اور وہ ہمیشہ اپنی لازوال دھنوں کے لیے یاد رکھی جائیں گی۔ انہوں نے مزید کہا کہ آشا بھوسلے کے انتقال کے ساتھ، خاص طور پر بھارت رتن لتامینگیشکر کے بعد، ملک نے اپنی سب سے سریلی اور بااثر آوازوں میں سے ایک کو کھو دیا ہے۔ آشا بھوسلے کا انتقال ممبئی کے بریچ کینڈی اسپتال میں ہوا، جہاں انہیں ایک دن قبل سانس اور دل سے متعلق مسائل کی شکایت پر داخل کرایا گیا تھا۔ نائب صدر جمہوریہ سی پی رادھاکرشنن نے عظیم گلوکارہ آشا بھوسلے کے انتقال پر گہرے دکھ کا اظہار کرتے ہوئے کہا ہے کہ ان کی وراثت آنے والی نسلوں کو ترغیب دیتی رہے گی۔مسٹر رادھاکرشنن نے اتوار کو اپنے تعزیتی پیغام میں کہا کہ "عظیم گلوکارہ آشا بھوسلے جی کے انتقال سے مجھے شدید دکھ ہوا ہے۔ ان کے اہل خانہ، مداحوں اور موسیقی کے شائقین کے ساتھ میری ہمدردیاں ہیں۔”انہوں نے کہا کہ آشا بھوسلے کی ورسٹائل آواز نے انہیں غزل اور بھجن جیسی موسیقی کی مختلف اصناف میں مہارت عطا کی۔نائب صدر نے کہا کہ ان کی بہترین آواز اور موسیقی کی وراثت آنے والی نسلوں کو متاثر کرتی رہے گی اور کروڑوں لوگوں کے دلوں میں گونجتی رہے گی۔ صدر جمہوریہ دروپدی مرمو نے معروف گلوکارہ آشا بھونسلے کے انتقال پر تعزیت کا اظہار کرتے ہوئے کہا ہے کہ انہوں نے ملک میں موسیقی کے ایک پورے عہد کی تعریف کی اور ان کی آواز ہمیشہ زندہ رہے گی۔ صدر مرمو نے سوشل میڈیا پلیٹ فارم "ایکس” پر اپنے پیغام میں لکھا: "آشا بھونسلے کے انتقال سے موسیقی کی دنیا میں ایک بڑا خلا پیدا ہو گیا ہے۔ ایک عظیم گلوکارہ کے طور پر انہوں نے ہندستان میں موسیقی کے ایک مکمل دور کو متعین کیا۔ ان کے ساتھ میری ذاتی ملاقاتوں کی یادیں میرے لیے نہایت قیمتی ہیں۔” انہوں نے مزید کہا: "ایک فنکار اور ایک انسان کے طور پر انہوں نے اپنی زندگی اپنی شرائط پر گزاری۔