علی گڑھ،سماج نیوز سروس : ذاکر حسین کالج آف انجینئرنگ اینڈٹکنالوجی، علی گڑھ مسلم یونیورسٹی (اے ایم یو) میں اے ایم یو- ریموٹلی آپریٹیڈ انڈرواٹر وہیکل چیلنج کے چوتھے ایڈیشن کا افتتاح ہوا۔ یہ قومی سطح کا مقابلہ ایم ٹی ایس-اے یو وی-ذاکر حسین کالج آف انجینئرنگ اینڈ ٹکنالوجی کی جانب سے آئی ای ای ای روبوٹکس اینڈ آٹومیشن سوسائٹی، اے ایم یو کے اشتراک سے منعقد کیا جا رہا ہے، جو اے ایم یو کے طلبہ کے اختراعی جذبے اور انجینئرنگ مہارت کا مظہر ہے۔ افتتاحی تقریب کالج کے اسمبلی ہال میں منعقد ہوئی، جس میں پرو وائس چانسلر پروفیسر محمد محسن خان؛ ڈین، فیکلٹی آف انجینئرنگ اینڈ ٹکنالوجی پروفیسر نثار احمد؛ انجینئرنگ کالج کے پرنسپل پروفیسر محمد مزمل؛ صدر سوئمنگ کلب اور چیئرمین، شعبہ اناٹومی ڈاکٹر فضل الرحمن، فیکلٹی ایڈوائزر پروفیسر سلیم انور خان اور فیکلٹی ایڈوائزر ڈاکٹر اظہر جمیل موجود تھے۔ اپنے خطاب میں پروفیسر محمد محسن خان نے طلبہ کی تخلیقی صلاحیت اور تکنیکی اہلیت کو سراہتے ہوئے کہا کہ ایسے پلیٹ فارمز ہمارے طلبہ کی بے پناہ اختراعی صلاحیت کی عکاسی کرتے ہیں۔ اس نوعیت کے تجرباتی تعلیمی اقدامات نہ صرف تکنیکی مہارتوں کو نکھارتے ہیں بلکہ نوجوان انجینئروں کو تخلیقیت، ٹیم ورک اور تحقیق پر مبنی مسئلہ حل کرنے کے ذریعے حقیقی دنیا کے چیلنجوں سے نمٹنے کے لیے بھی تیار کرتے ہیں۔ حاضرین کا خیرمقدم کرتے ہوئے پروفیسر سلیم انور خان نے کہا کہ 2022 میں طلبہ کی جانب سے شروع کیا جانے والا اے ایم یو ریموٹلی آپریٹیڈ انڈرواٹر وہیکل چیلنج اب ایک تسلیم شدہ قومی سطح کے مقابلے کی صورت اختیار کر چکا ہے۔ انہوں نے زیر آب روبوٹکس میں مکینیکل ڈیزائن، الیکٹرانکس، پروگرامنگ اور کنٹرول سسٹمز کے امتزاج پر روشنی ڈالی۔ پروفیسر نثار احمد اور پروفیسر محمد مزمل نے منتظمین کی ستائش کی اور نظری تعلیم کو عملی اطلاق سے جوڑنے کی اہمیت پر زور دیا، ساتھ ہی سمندری تحقیق، ماحولیاتی نگرانی اور دفاعی ٹکنالوجیز میں زیرِ آب روبوٹکس کی بڑھتی ہوئی افادیت کی طرف توجہ دلائی۔ ڈاکٹر فضل الرحمن نے طلبہ کو ایسے مسابقتی پلیٹ فارمز کے ذریعے اعتماد و قیادت کی صلاحیت پیدا کرنے اور ٹیم ورک کی ترغیب دی۔ اس مقابلے میں ملک کے ممتاز اداروں کی ٹیمیں شرکت کر رہی ہیں، جن میں ذاکر حسین کالج آف انجینئرنگ اینڈٹکنالوجی سمیت دہلی ٹکنالوجیکل یونیورسٹی، نِرما یونیورسٹی، بنّاری اَمّان انسٹی ٹیوٹ آف ٹکنالوجی اور آئی آئی آئی ٹی ڈی ایم کانچی پورم شامل ہیں۔ یہ مقابلہ یوسف علی ایکواٹکس اینڈ اسپورٹس کمپلیکس میں منعقد کیا جا رہا ہے، جہاں زیرِ آب مشکل ٹاسک کے ذریعے گاڑی کی مہارت، درستگی، خودکار فیصلہ سازی اور اشیاء کو سنبھالنے کی صلاحیتوں کا امتحان لیا جا رہا ہے۔ اینڈرومیڈا پرائیویٹ لمیٹڈ سے تعلق رکھنے والے ججز، جو 50 ہزار روپے کے انعامی فنڈ کے اسپانسر بھی ہیں، کارکردگی کا جائزہ لے رہے ہیں۔ اے ایم یو ریموٹلی آپریٹیڈ انڈرواٹر وہیکل چیلنج، طلبہ کی تخلیقی سوچ، اختراع اور عملی انجینئرنگ مہارتوں کو نمایاں کرتے ہوئے تحقیق پر مبنی اور تجرباتی تعلیم کے حوالے سے اے ایم یو کی ساکھ کو مزید مضبوط کررہاہے۔
