مدرسہ زینت القرآن ویلکم میں جمعیۃ علماء ہند کی میٹنگ کا انعقاد

نئی دہلی ، جمعیۃ علماء ہند(ضلع شمال مشرقی دہلی) کی مجلس عاملہ کی میٹنگ مدرسہ زینت القرآن ویلکم دہلی میں منعقد ہوئی جس کی صدارت الحاج محمد سلیم رحمانی (صدر جمعیۃ علماء ضلع) اور جبکہ نظامت مولانا جمیل اختر قاسمی (ناظم ضلع) نے کی جس کا آغاز مفتی ابصار عالم قاسمی کی تلاوتِ قرآن کریم اور مفتی سید محمد اسلم قاسمی (خازن ضلع) کی نعت پاک سے ہوا۔اس موقع پرمولانا جمیل اختر قاسمی نے میٹنگ کے اغراض و مقاصد پر روشنی ڈالتے ہوئے کہا کہ جمعیۃ علماء صوبہ دہلی کے 14؍ مئی کو ہونے والے منتظمہ کے اجلاس میں تمام اراکین کی شرکت ازحد ضروری ہے اور عمومی نشست میں ہر حلقہ سے عوام کی سرکردہ شخصیات کی قابل ذکر تعداد کی شرکت کو یقینی بنانے کیلئے جملہ اراکین اپنے طور پر محنت اور کوشش کریں۔ صوبہ کی طرف سے ملنے والا کوئی بھی تقاضہ پورا کرنے کیلئے تمام شرکاء نے اپنے عزم کا اظہار کیا۔ ممبئی میں ہونے والے مرکزی منتظمہ کے اجلاس میں شرکت کیلئے تقریباً تمام اراکین منتظمہ(مرکزیہ) نے ٹکٹ بنوا کر اپنی شرکت کی سنجیدہ اور قابل فکر کوشش کا اظہار کیا۔اس میٹنگ میں مسلم لڑکیوں کے ارتداد کا مسئلہ پر تمام شرکاء نے اس پر گہری تشویش کا اظہار کرتے ہوئے اپنی قیمتی آراء پیش کیں اور اس عنوان پر منظم و مرتب اصلاحی مہم چلانے کا عزم کیا۔صدر کے قیمتی کلمات اور قاری فضل الرحمن (نائب صدر)کی دعا پر مجلس کا اختتام ہوا۔اہم شرکاء میں مفتی معین الدین صدر حلقہ سیماپوری ،مولانا ہارون صدر حلقہ کھجوری ،مفتی خیر محمد صدر حلقہ گھونڈہ ،مولانا عبدالباسط ناظم حلقہ چاند باغ،مولانا سرتاج عالم ناظم حلقہ کبیر نگر ،حاجی سرور صدر حلقہ ویلکم ،قاری انیس ناظم حلقہ کھجوری، مفتی محمد انور قاسمی صدر حلقہ گوکل پوری وغیرہ کے نام قابل ذکر ہیں۔