لکھنؤ: مافیا ڈان مختار انصاری جیل میں بند بڑے بیٹے عباس انصاری کو بڑا جھٹکا لگا ہے۔مختارانصاری کی نماز جنازہ اور تدفین میں شرکت کو یقینی بنانے کے مقصد سے انصاری خاندان نے عباس کی پیرول ضمانت کے لیے الہ آباد ہائی کورٹ میں درخواست دائر کی تھی۔ مختار کے خاندان کی درخواست کی سماعت جسٹس سنجے کمار سنگھ کی بنچ میں ہونا تھا، جو ایم پی ایم ایل اے سے متعلق معاملات کی سماعت کرتی ہے۔ لیکن یہ بنچ آج نہیں بیٹھی اور پھر یہ کیس جسٹس سمیت گوپال کی بنچ کو منتقل کر دیا گیا۔اس کے ساتھ ہی جسٹس سمیت گوپال کی بنچ نے کسی دوسرے بنچ سے آنے والے کسی بھی معاملے کی سماعت کرنے سے انکار کر دیا۔ جس کی وجہ سے مختار کے اہل خانہ کی درخواست ہائی کورٹ میں نہیں چل سکی۔ انصاری خاندان نے اب سپریم کورٹ میں درخواست دائر کرنے کی تیاری شروع کر دی ہے۔ کچھ دیر بعد سپریم کورٹ میں درخواست دائر کی جائے گی۔ تاہم وکلاء اس بات کو یقینی بنانے کی بھی کوشش کر رہے ہیں کہ معاملہ چیف جسٹس کے سامنے پیش کیاجاسکیں اور چیف جسٹس سماعت کے لیے بینچ نامزد کریں۔ دراصل، انصاری خاندان، مختار انصاری کی نماز جنازہ اور تدفین میں جیل میں بند ایم ایل اے کے بیٹے عباس انصاری کی شرکت کو یقینی بنانا چاہتے ہیں۔
مختار کی آخری رسومات یوسف پور محمد آباد، غازی پور میں ادا کی جائیں گی
غازی پور،مختار انصاری جو کہ مئوصدر اسمبلی حلقہ سے پانچ بار ایم ایل اے رہ چکے ہیں، کی آخری رسومات ان کے آبائی گاؤں یوسف پور محمد آباد میں واقع آبائی قبرستان کالی باغ میں ادا کی جائیں گی، جس کی تیاریاں مکمل کرلی گئی ہیں، ان کو سپردخاک کئے جانے کے وقت ان کی اہلیہ افسا بیگم اور بیٹا عباس انصاری ایم ایل اے اس موقع پر موجود ہوں گے یانہیں اس پر شکوک شبہات برقرار ہیں۔قابل ذکر ہے کہ مختار انصاری کی اہلیہ افسا بیگم طویل عرصے سے مفرور ہیں۔ جس پر انتظامیہ کی جانب سے 50 ہزار روپے انعام کا اعلان کیا گیا ہے ۔ ایسے میں یہ قیاس آرائیاں کی جا رہی ہیں کہ آیا وہ اپنے شوہر کے آخری دیدار کے لئے آئیں گی یا مفرور ہی رہیں گی۔مختار انصاری کے بڑے بیٹے مئو صدر سے ایم ایل اے عباس انصاری اس وقت جیل میں ہیں، جن کی ہائی کورٹ میں پیرول کی سماعت نہیں ہوسکی۔ فی الحال ان کی جانب سے سپریم کورٹ میں بھی درخواست دائر کرنے کی بات چل رہی ہے ۔ اب ایسی صورت حال میں ایم ایل کی اہلیہ اور بڑے بیٹے ان کی آخری رسومات میں شامل ہوتے ہیں یا نہیں اس میں شش وپنج برقرار ہے ۔خاندانی ذرائع کے مطابق مختار انصاری کو سپرد خاک کرنے کے لئے ان کے والد سبحان اللہ انصاری کی قبر کے پیچھے قبر تیار کی گئی ہے ۔
