ابھیشیک شرما مکمل فٹ نہیں، ایک دو میچز سے باہر رہ سکتے ہیں: سوریہ کمار یادو

نئی دہلی،  ( یو این آئی) ہندوستانی ٹی-20 ٹیم کے کپتان سوریہ کمار یادو نے نوجوان بلے باز ابھیشیک شرما کی صحت کے حوالے سے اہم اپ ڈیٹ دیتے ہوئے بتایا ہے کہ وہ ابھی مکمل طور پر فٹ نہیں ہیں اور آئندہ ایک دو میچوں میں شرکت نہیں کر سکیں گے۔نمیبیا کے خلاف ٹاس کے موقع پر گفتگو کرتے ہوئے کپتان نے واضح کیا کہ ابھیشیک شرما پیٹ کے انفیکشن کا شکار تھے، جس کی وجہ سے انہیں ہسپتال میں داخل کرایا گیا تھا۔ اگرچہ انہیں بدھ کے روز ہسپتال سے چھٹی مل گئی تھی، لیکن ان کی جسمانی کمزوری کو مدنظر رکھتے ہوئے انہیں فی الحال آرام کا مشورہ دیا گیا ہے۔ذرائع کے مطابق ٹیم مینجمنٹ ابھیشیک شرما کے معاملے میں کوئی جلد بازی نہیں کرنا چاہتی۔ پاکستان کے خلاف ہونے والے بڑے اور اہم مقابلے سے قبل مینجمنٹ چاہتی ہے کہ وہ مکمل طور پر صحت یاب ہو جائیں، اسی لیے انہیں نمیبیا کے خلاف میچ سے باہر رکھا گیا ہے۔ابھیشیک شرما کی عدم موجودگی میں اسٹار بلے باز سنجو سیمسن کو پلیئنگ الیون میں شامل کیا گیا ہے، جو ٹورنامنٹ کے اس اہم مرحلے پر اپنی کارکردگی دکھانے کے لیے پرجوش ہیں۔