اسرائیل:اسرائیل نے اعلان کیا ہے کہ جمعہ کو لبنان میں اس کے حملے میں حزب اللہ کے سربراہ حسن نصر اللہ مارے گئے ہیں۔ حزب اللہ کے سیکرٹری جنرل حسن نصر اللہ کے قتل پر کسی لبنانی تبصرے کی عدم موجودگی کے باوجود اسرائیلی فوج نے کہا ہے کہ وہ خطے میں وسیع تر کشیدگی کے لیے تیار ہے۔
فوج کے ترجمان نداو شوشانی نے ہفتے کے روز کہا کہ اسرائیل ایک وسیع تر تنازعے کے لیے ہائی الرٹ پر ہے لیکن امید ہے کہ حزب اللہ کے رہنما کی ہلاکت ایران کے حمایت یافتہ گروپ کو راستہ بدلنے پر مجبور کر دے گی۔ انہوں نے مزید کہا کہ ہم ایک وسیع تر کشیدگی کے درمیان ہیں۔ ہماری افواج ہائی الرٹ پر ہیں اور ہماری انٹیلی جنس سروسز الرٹ اور خطرات کی نگرانی کر رہی ہیں۔
فوج کے ترجمان نے ایک میڈیا بریفنگ میں فوج کی جانب سے حسن نصراللہ کو ہلاک کرنے کے اعلان کے بعد مزید کہا ہمیں امید ہے کہ اس سے حزب اللہ کے اقدامات میں تبدیلی آئے گی ۔ انہوں نے کہا کہ حزب اللہ کی صلاحیتوں کو کمزور کرنے کے لیے ابھی بہت طویل سفر طے کرنا ہے۔ انہوں نے مزید کہا کہ ہم نے ایک سال کے دوران حزب اللہ کو ہمارے خلاف حملے کرتے دیکھا۔ اس لیے یہ پیش گوئی کی جا سکتی ہے کہ وہ ہمارے خلاف اپنے حملے جاری رکھے گی۔
انہوں نے الزام لگایا کہ تقریباً ایک سال سے حزب اللہ کے بڑھتے ہوئے حملوں کے پیچھے ایران کا ہاتھ ہے۔ یہ کوئی راز نہیں ہے کہ ایران حزب اللہ، حماس اور خطے میں دیگر پراکسیوں کی حمایت کرتا ہے۔
اس کے علاوہ، انہوں نے وضاحت کی کہ اسرائیل میں شہریوں کو ہوم فرنٹ کی تیاری کے حوالے سے کوئی نئی ہدایات جاری نہیں کی گئیں، کیونکہ موجودہ ہدایات نے پہلے ہی زیادہ تر علاقوں کو ہائی الرٹ پر رکھا ہوا ہے۔
