نئی دہلی (یو این آئی) کانگریس نے کہا ہے کہ وزیر اعظم نریندر مودی جب اپنی غلط پالیسیوں میں پھنستے ہیں، تو وہ اس سے نکلنے کے لیے سہارے کی تلاش کرتے ہیں اور اس بار وہ اگنی ویر یوجنا میں پھنس گئے ہیں، اس لیے اس سے نکلنے کے لیے وہ الیکشن کمیشن کی مدد لے رہے ہیں ۔کانگریس کے سابق فوجی شعبے کے سربراہ کرنل روہت چودھری نے جمعہ کو یہاں پارٹی ہیڈکوارٹر میں ایک پریس کانفرنس میں کہا کہ اگنی ویر اسکیم غلط ہے اور یہ فوج میں امتیازی سلوک کا باعث بن رہی ہے ۔ یہ اسکیم ملک، فوج اور نوجوانوں کے لیے غلط ہے ، اس لیے کانگریس کی حکومت بننے پر اسے منسوخ کردیا جائے گا لیکن مسٹر مودی اس اسکیم کی وجہ سے پھنس گئے ہیں اور اب وہ الیکشن کمیشن کا سہارا لے رہے ہیں۔ کرنل چودھری نے کہا "الیکشن کمیشن نے کانگریس صدر کو ایک خط لکھا ہے کہ پارٹی کے اسٹار کمپینرز انتخابی مہم کے دوران دفاعی افواج کے آپریشنل معاملات کے بارے میں بات نہ کریں۔ مسٹر مودی جب بھی پھنس جاتے ہیں، وہ کسی نہ کسی مدد کی تلاش میں رہتے ہیں۔ پہلے وہ دفاعی افواج کے پیچھے چھپتے تھے اور اب الیکشن کمیشن کی مدد لے رہے ہیں۔ ملک کی فوج کو مضبوط قرار دیتے ہوئے انہوں نے کہا کہ ہماری افواج قابل ہیں، بہترین کام کر رہی ہیں اور ملک کی حفاظت کر رہی ہیں۔ لیکن مودی حکومت نے اگنی ویر اسکیم لاکر فوج کو کمزور کیا ہے ۔ ہم اگنی ویر اسکیم کو چیلنج کر رہے ہیں، جو ملک، فوج اور فوجیوں کے مفاد میں نہیں ہے ۔ سابق آرمی چیف نے اپنی کتاب میں اگنیویر اسکیم کا ذکر کرتے ہوئے لکھا ہے کہ اس اگنی ویر اسکیم کے اعلان نے تینوں افواج کو حیران کردیا تھا۔ کرنل چودھری نے کہا ہمارے ملک کی افواج نے بہت سی لڑائیاں لڑی ہیں۔ ماضی میں فوجوں کو بھی جدید بنایا گیا، جہاز بھی خریدے گئے ، دفاعی شعبے میں بہت کام ہوا اور فوجوں میں باقاعدہ سپاہی تھے ۔ اگر آج مودی حکومت پیسہ بچانے کے لیے اگنی ویر اسکیم لے کر آئی ہے تو سوال یہ ہے کہ کیا حکومت کے پاس فوج کے لیے پیسہ نہیں ہے ، اگنی ویر اسکیم ہماری فوجوں پر مسلط کر دی گئی ہے اور اب فوجی یونٹوں میں مشکلات بڑھ رہی ہیں۔ پھر آپ سروے کا کام کر سکتے ہیں جبکہ یہ کام پہلے ہو جانا چاہیے تھا۔ انہوں نے کہا کہ ہم ملک کے نوجوانوں کو امید دلانا چاہتے ہیں کہ اگر ہماری حکومت بنتی ہے تو اگنی ویر اسکیم کو منسوخ کر دیا جائے گا اور جو اگنی ویر ہیں ان کے مستقل انتظام کا کام کیا جائے گا۔ اس اسکیم نے فوج میں تفریق پیدا کی ہے اور ملک کی سلامتی کو بھی کمزور کر رہی ہے ۔
