پیرس (یو این آئی) ہندوستانی پہلوان امن سہراوت پیرس اولمپکس 2024 گیمز کے ریسلنگ ایونٹ میں کانسہ کا تمغہ جیت کر ملک کے سب سے کم عمر تمغہ جیتنے والے بن گئے ہیں۔
امن سہراوت نے شاندار کارکردگی کا مظاہرہ کرتے ہوئے جمعہ کو پیرس 2024 ریسلنگ ایونٹ میں مردوں کے 57 کلوگرام فری اسٹائل میں کانسہ کا تمغہ جیتا۔
امن نے 21 سال 24 دن کی عمر میں کانسہ کا تمغہ جیت کر یہ ریکارڈ بنایا ہے۔ انہوں نے ہم وطن بیڈمنٹن اسٹار پی وی سندھو کا ریکارڈ بھی توڑ دیا۔ سندھو نے 21 سال، ایک ماہ اور 14 دن کی عمر میں ریو اولمپکس 2016 میں چاندی کا تمغہ جیتا تھا۔ اس کے ساتھ ہی امن سمر گیمز میں ہندوستان کی سب سے کم عمر میڈل جیتنے والے بن گئے ہیں۔
ہندوستانی پہلوان نے کانسہ کے تمغے کے مقابلے میں پورٹو ریکو کے ڈیرین کروز کے خلاف زبردست کارکردگی کا مظاہرہ کیا۔ امن نے 13-5 کے شاندار اسکور سے میچ جیت لیا۔ میچ کے دوران انہوں نے شروع سے ہی جارحیت کا مظاہرہ کیا اور اپنے حریف کو واپسی کا کوئی موقع نہیں دیا۔ قابل ذکر ہے کہ اولمپکس میں کشتی میں یہ ہندوستان کا آٹھواں تمغہ بھی تھا۔ سشیل کمار اور روی کمار دہیا نے بالترتیب لندن اولمپکس 2012 اور ٹوکیو اولمپکس 2020 میں چاندی کے تمغے جیتے تھے۔ باقی چھ کانسہ کے تمغے ہیں۔
دریں اثنا امن سہراوت نے پیرس 2024 اولمپکس میں جمعہ کو کانسے کے تمغے کے مقابلے میں پورٹو ریکو کے ڈیرین کروز کو شکست دے کر ہندوستان کے لیے چھٹا تمغہ جیتا۔ انہوں نے مردوں کے فری اسٹائل 57 کلو گرام وزن کے زمرے میں حریف کو 13-5 سے شکست دی۔اس جیت نے 2008 کے بعد سے ہر ایڈیشن میں کشتی میں کم از کم ایک تمغہ جیتنے کا ہندوستان کا سلسلہ بھی جاری رکھا۔تاہم امن کو بھی اضافی وزن ہونے کی وجہ سے ونیش پھوگٹ جیسی صورتحال کا سامنا کرنا پڑ سکتا تھا۔ لیکن، سخت محنت نے اسے اہلیت کے معیار پر پورا اترنے میں مدد کی۔گزشتہ روز جمعرات کی شام 6:30 بجے کے قریب جاپان کے ری ہیگوچی سے ہارنے کے بعد، امن کا وزن 61.5 کلو گرام – قابل قبول حد سے 4.5 کلو زیادہ تھا۔ ہندوستانی کیمپ میں ہلچل مچ گئی۔ دو سینئر کوچز جگمندر سنگھ اور وریندر دہیا کو وزن کم کرنے کے مشکل کام کا سامنا کرنا پڑا کیونکہ کانسے کے تمغے کے میچ کی صبح وزن کا کام 10 گھنٹے کی مقررہ وقت میں مکمل کرنا تھا۔ وزن کم کرنے کا عمل ڈیڑھ گھنٹے کے میٹ سیشن سے شروع ہوا۔
