سید پرویز قیصر
امان شراوت اولمپک کھیلوں میں تمغہ جیتنے والے سب سے چھوٹے ہندوستانی کھلاڑی بن گئے ہیں۔ انہوں نے جس دن مردوں کی 57 کلو گرام فری اسٹا ئل میں کانسہ کا تمغہ جیتا اس دن انکی عمر21 سال اور24 دن تھی۔ کانسہ کے تمغہ کیلئے ہوئی کشتی میںانہوں نے پورٹو ریکو کے ڈارین کروز کو13-5 سے شکست دی۔
ہریانہ کے گاوں بروہر میں16 جولائی2003 کو پیدا ہوئے امان شراوت نے 2023 میں استانا میں ہوئی ایشیائی کشتی چمپیئن شب میں طلائی تمغہ جیتا تھا جبکہ ہنگژو میں 2022 میں ہوئے ایشیائی کھیلوں میں انہوں نے کانسہ کا تمغہ حاصل کیا تھا۔
ان سے پہلے ہندوستان کی جانب سے سب سے کم عمر میں اولمپک کھیلوں میں تمغہ جیتنے کا ریکارڈ پوسارلا وینکٹ سندھو کے پاس تھا جنہوں نے ریو میں2016 میں بیڈمنٹن کے سنگلز میں نقرئی تمغہ جیتا تھا تو وہ 21 سال اور45 دن کی تھی۔ فائنل میں انہیں اسپین کی کارولینا مارن نے21 – 19 ، 21-12 اور21-15 سے شکست دی تھی۔ وہ اب بھی ہندوستان کی جانب سے اولمپک کھیلوں میں تمغہ حاصل کرنے والی سب سے چھوٹی عمر کی کھلاڑی ہیں۔
ان سے پہلے جس ہندوستانی خواتین نے سب سے چھوٹی عمر میں اولمپک کھیلوں میں تمغہ حاصل کیا تھا وہ سانیا نہوال تھیں۔انہوں نے لندن میں2012 میں جب بیڈ منٹن میں کانسہ کا تمغہ جیتا تھا تو انکی عمر22 سال اور140 دن تھی۔ سانیا نہوال نے چین کی وانگ زن کو شکست دیکر یہ تمغہ جیتا تھا۔ انہوں نے پہلا سیٹ21-18 سے جیت لیا تھا اور دوسرے سیٹ میں پہلا پوائنٹ حاصل کرلیا تھا ۔اسکے بعد وانگ زن زخمی ہونے کی وجہ سے کھیل جاری نہیں رکھ سکیں اور سانیا نہوال کو فاتح قرار دے دیا گیا۔ بیڈ منٹن میں اولمپک کھیلوں میں یہ ہندوستان کا پہلا تمغہ بھی تھا۔
پیرس اولمپک کھیلوں میں دو کانسہ کے تمغہ جیتنے والی نشانہ باز مانو بھاکر نے جس دن10 میٹر کی ائیر پسٹل میں کانسہ کا تمغہ جیتا تھا اس دن انکی عمر22 سال اور161 دن تھی۔ انہوں نے 221.7 پوائنٹس کے ساتھ یہ تمغہ حاصل کیا تھا جس کے بعد وہ دس میٹر کی ائیر پسٹل کے مکسڈ ایونٹ میں سربجوت سنگھ کے ساتھ کانسہ کا تمغہ جیتی تھی۔ اس ایونت میں انکی ٹیم نے جنوبی کوریا کی ٹیم کو16-10 سے شکست دی تھی۔ وہ ایک اولمپک میں دو تمغہ جیتنے والی پہلی ہندوستانی کھلاڑی بھی بنی تھیں۔
پہلوان وجندر سنگھ نے بیجنگ میں2008 میں ہوئے اولمپک کھیلوں میں 66 کلو گرام فری اسٹائل میں کانسہ کا تمغہ جیتا تھا۔ جس دن انہپوں نے ایسا کیا تھا اس دن انکی عمر22 سال اور298 دن تھی۔ وہ اولمپک کھیلوں میں کوئی تمغہ جیتنے والی ہندوستان کے سب سے چھوٹے پہلوان اور کل ملاکرپانچویںسب سے کم عمر کھلاڑی ہیں۔
ہندوستان کی جانب سے سب سے چھوٹی عمر میں اولمپک کھیلوں میں طلائی تمغہ جیتنے کا ریکارڈ نیرج چوپڑہ کے پاس ہے۔انہوں نے جب ٹوکیو میں جولین تھرو میں طلائی تمغہ جیتا تھا تو انکی عمر23 سال اور 227 دن تھی۔ اولمپک کھیلوں میں سب سے چھوٹی عمر میں طلائی تمغہ جیتنے کا اعزاز فرانس کے ایک لڑکے کے پاس ہے۔1900 میں جب پیرس میں اولمپک کھیل پہلی مرتبہ ہوئے تھے تو اس نے کشتی رانی میں ایسا کیا تھا۔ اسکی عمر سات سے دس سال تھی اور اس نے اپنی ٹیم کو طلائی تمغہ جیتنے میں کشتی کو کوکس کیا تھا یعنی اس نے چپو نہیں چلائے تھے بس کشتی میں سواری کی تھی۔
جس کھلاڑی کی اولمپک کھیلوں میں معلومات کے ساتھ سب سے چھوٹی عمر میں طلائی تمغہ جیتنے کا اعزاز حاصل ہے وہ امریکہ کے مرجوری گیسٹرنگ ہیں۔ انہوں نے 1936 میں جب برلن میں اسپرنگ بورڈ ڈائیونگ میں طلائی تمغہ جیتا تھا تو انکی عمر 13 سال اور268 دن تھی۔
