نیوجرسی:پاکستانی وزیراعظم شہباز شریف نے امریکی صدر ڈونلڈ ٹرمپ سے ملاقات کو پاکستان اور امریکہ کے بہتر تعلقات کے لیے انتہائی اہمیت کا حامل اور مفید قرار دیتے ہوئے کہا ہے کہ ڈونلڈ ٹرمپ امن چاہتے ہیں اور انہوں نے ہند۔پاک جنگ بندی میں اہم کردار ادا کیا تھا۔ڈان نیوز کے مطابق وزیر اعظم نے نیوجرسی میں میڈیا کے نمائندوں سے گفتگو کے دوران کہا کہ امریکہ، پاکستان میں آئی ٹی اور دیگر شعبوں میں سرمایہ کاری کے لیے تیار ہے، ٹرمپ نے امریکی کمپنیوں کو پاکستان میں فوری سرمایہ کاری کرنے کا کہا ہے۔ انہوں نے کہا کہ پاکستان اور امریکہ کے درمیان معدنیات کی قیمت کا مناسب تعین ہوگا، پاک-امریکہ تجارتی معاہدے باہمی مفادات کے تحت ہوں گے۔ایک سوال پر وزیراعظم نے کہا کہ سعودی عرب میں جیسا استقبال کیا گیا، ویسا 40 سال میں کبھی نہیں دیکھا۔ انہوں نے کہا کہ آرمی چیف کی قیادت میں پاک فوج نے دانشمندی کے ساتھ بھارت کو شکست دی، 10 مئی کو امریکی وزیر خارجہ نے جنگ بندی کا بھارتی پیغام پہنچایا تھا۔شہباز شریف نے یہ بھی کہا کہ ملکی حالات چند سال پہلے مشکلات کا شکار تھے، لیکن اب مہنگائی ڈیڑھ سال میں کم ہوکر سنگل ڈیجٹ میں آگئی ہے۔
