نوشاد عباس
علی گڑھ، 21 مئی،سماج نیوز سروس:علی گڑھ مسلم یونیورسٹی کے ایس ٹی ایس اسکول (منٹو سرکل) میںمنعقدہ ایک تقریب میں سال 2023-24 کے مختلف ثقافتی و دیگر مقابلوں کے انعامات تقسیم کئے گئے۔ چھٹی سے نویں جماعت تک کے طلباء کو ان کی عمدہ تعلیمی کارکردگی کے لئے سرٹیفیکٹ آف میرٹ اور ٹرافیوں سے نوازا گیا۔ تقریب میں اولمپیاڈ اور نیشنل اسپیل بی سمیت مختلف مقابلوں میں طلباء کی حصولیابیوں کو سراہا گیا۔ سائنس فاؤنڈیشن، سلور زون، اور این ایس ٹی ایس ای اولمپیاڈ میں 200 سے زائد طلباء نے حصہ لیا تھا، جن میں مینک چودھری نے آئی ایم او اور این ایس او میں گولڈ میڈل حاصل کیا۔ اولمپیاڈ میں کیسری نندن گوڑ، سعادت حسین خان، کیف پرویز اور جتن کمار لودھی کی کارکردگی کی ستائش کی گئی۔ انٹرا سکول نیشنل اسپیل بی مقابلے میں جویر خان اور الفائز نے پہلا مقام اور ایک ہزار روپے کا نقد انعام حاصل کیا۔کھیلوں میں نمایاں کارکردگی کا مظاہرہ کرنے والے طلباء کو میڈل اور اسناد سے نوازا گیا۔یاسر وسیم خان کو انٹر ہال ایتھلیٹکس میٹ میں بہترین ایتھلیٹک کا ایوارڈ دیا گیا۔ ایس ٹی ایس اسکول نے مارچ پاسٹ مقابلے میں دوسرا انعام جیتا تھا۔اوورآل فاتح کے زمرے میں ٹوپاز ہاؤس فتح یاب ہوا اور ٹرافی جیتی۔تقریب کا اختتام پرنسپل جناب فیصل نفیس کے کلمات پر ہوا جنھوں نے طلباء کے لئے استقامت اور محنت کی اہمیت پر زور دیتے ہوئے کہا کہ تقسیم انعامات کی تقریب سے طلباء کی حوصلہ افزائی ہوتی ہے ۔ مس نسرین فاطمہ (کلچرل کوآرڈینیٹر)، مسز ثمینہ یوسف خان (پرائمری انچارج)، مسٹر محمد عدنان خان، مسٹر محمد عاصم اور مسٹر فرحان حبیب نے پروگرام کو مربوط کیا جب کہ نظامت مسز غزالہ تنویر نے کی۔
