دیوبند (سماج نیوز سروس)دیوبند بلاک کے تھیتکی گائوں کے وارڈ نمبر 99کی بی ڈی سی شبنم اہلیہ فہیم کی موت ہونے کے بعد خالی ہونے والی پنچایت ممبر کی سیٹ پر 6اگست کو ہونے والے ضمنی الیکشن کرائے گئے تھے جس کے نتیجہ کا جمعرات 8اگست کو ووٹوں کی گنتی کرائے جانے کے بعد کیا گیا۔ اس ضمنی الیکشن میں عرشی ناز نے کامیابی حاصل کی ہے۔ الیکشن آفیسرز بی ڈی او اعظم علی اور سنجے ڈبرال نے عرشی ناز کو سرٹیفکیٹ دیا۔ تفصیل کے مطابق تھیتکی کے وارڈ نمبر 99میں ہونے والے ضمنی الیکشن میں پنچایت رکن عباس کی اہلیہ خوشنودہ اور منورکی اہلیہ عرشی ناز الیکشن کے میدان میں تھیں۔ منگل کے روز تھیتکی کے پرائمری اسکول میں بنائے گئے پولنگ بوتھوں پر وارڈ نمبر 99کے 37فیصد ووٹرس نے اپنے ووٹ ڈالے۔ ان ووٹوں کی جمعرات کے روز بلاک آفس میں گنتی کی گئی، عرشی ناز نے 475ووٹ حاصل کئے جب کہ اس کی حریف خوشنودہ کو 147ووٹ مل سکے ، 45ووٹ کینسل کئے گئے ۔ ووٹوں کی گنتی کے وقت انتظامیہ پوری طرح مستعد رہی ، ووٹوں کی گنتی اور نتیجہ کے اعلان تک ایس ڈی ایم انکور ورما ، سی او اشوک سسودیا اور کوتوالی انچارج سنجیو کمار موجود رہے۔ اے ڈی او پنچایت انل کمار نے بتایا کہ وارڈ نمبر 99کے لئے ہونے والے ضمنی الیکشن کی پولنگ میں 768ووٹر س میں سے 667ووٹرس نے اپنے ووٹ ڈالے ۔ انہوں نے بتایاکہ ووٹوں کی گنتی کے وقت عرشی ناز کو 475اور خوشنودہ کو 147ووٹ ملے جب کہ 45ووٹوں کو کینسل کیا گیا۔ انہوں نے بتایا کہ لکھنوتی کے وارڈ نمبر 63میں پنچایت رکن کے امیدوار کرن سنگھ بلامقابلہ منتخب ہوگئے کیوں کہ 24جولائی کو ہونے والی پرچہ نامزدگی کے وقت کرن سنگھ کے مقابلہ میں کسی دوسرے امیدوار نے پرچہ نامزدگی داخل نہیں کیا اس لئے کرن سنگھ بلامقابلہ منتخب ہوگئے۔
