نئی دہلی ۔25اگست ،سماج نیوز ۔کانگریس کے رکن پارلیمنٹ اور سابق صدر راہل گاندھی ان دنوں لداخ کے دورے پر ہیں۔ اس دوران انہوں نے جمعہ (25 اگست) کو کارگل کا دورہ بھی کیا۔ کارگل 1999 میں پاک بھارت جنگ کا میدان بھی بنا۔ راہل گاندھی بائیک سے اس مقام پر پہنچے اور کانگریس کے نوجوان کارکنوں نے ان کا پرتپاک استقبال کیا۔اس دوران انہوں نے نوجوانوں سے خطاب بھی کیا۔ اس کے ساتھ ہی نوجوانوں نے راہل گاندھی سے بے باکی کے ساتھ سوالات بھی کئے۔سوال جواب کے اس سیشن میں ایک مسلم نوجوان نے راہل گاندھی سے ایسا سوال کر لیا جو سوال ملک کے کروڑوں مسلمان راہل گاندھی سمیت ” انڈیا”کے تمام لیڈروں سے پوچھنا چاہتے ہیں ۔اس مسلم نوجوان نے راہل گاندھی سے کہا کہ بطور مسلمان ہمیں اپنی پہچان عزیز ہے، ہمیں کارگل کا باشندہ ہونے پر فخر ہے، ہمیں مسلمان ہونے پر بہت فخر ہے۔ ہم اپنی ایک مسلم شناخت رکھتے ہیں۔ یہ ہمیں بہت عزیز ہے۔ ہم نے ملک میں نوجوانوں کو چھوٹے چھوٹے جرائم، تقریروں کے لیے جیل جاتے دیکھا ہے، ہم جاننا چاہتے ہیں کہ جب آپ اقتدار میں آئیں گے تو ہندوستانی مسلمانوں کو جس منظر نامے کا سامنا ہے اس کو بدلنے کے لیے آپ کیا کریں گے؟نوجوان نے مزید کہا کہ ہمیں اپنے دل کی بات کرنے کے لیے ایسے پلیٹ فارم نہیں ملتے۔ یہ ان مراحل میں سے ایک ہے جہاں ہم بغیر کسی ہچکچاہٹ کے اپنے دل کی بات کر سکتے ہیں۔ ہم اپنے مسائل پر بات کرنے سے ڈرتے ہیں، ہم نہیں چاہتے کہ لوگ حکومتوں کا نشانہ بنیں۔ ہم سرکاری ملازمت کے مواقع سے محروم نہیں رہنا چاہتے۔ جب آپ اقتدار میں آئیں گے تو کیا کریں گے۔ ؟اس سوال کے جواب میں راہل گاندھی نے کہا کہآپ کا کہنا بجا ہے کہ ہندوستان میں مسلمانوں پر حملے ہو رہے ہیں۔ یہ غلط نہیں ہے لیکن آپ کو یہ بھی سمجھ لینا چاہیے کہ ہندوستان میں بہت سے دوسرے لوگوں پر بھی حملے ہو رہے ہیں۔ ذرا دیکھیں آج منی پور میں کیا ہو رہا ہے؟ منی پور 4 ماہ سے جل رہا ہے۔ کانگریس لیڈر نے مزید کہا کہ آپ کو یہ نہیں سوچنا چاہیے کہ آپ مسلمان ہی وہ لوگ ہیں جن پر حملہ کیا جا رہا ہے۔ مسلمانوں اور دیگر اقلیتوں کے ساتھ یہی ہو رہا ہے۔ یہ دلتوں اور آدیواسیوں کے ساتھ بھی ہو رہا ہے۔راہل گاندھی نے بات چیت کو آگے بڑھاتے ہوئے کہا کہ یہ وہ چیز ہے جس سے ہم لڑنے کے لیے پرعزم ہیں۔ آپ اچھی طرح جانتے ہیں کہ میں اور کانگریس پارٹی اس لڑائی میں سب سے آگے ہیں۔ اس بات سے کوئی فرق نہیں پڑتا ہے کہ آپ کا تعلق کس مذہب سے ہے، آپ کا تعلق کس کمیونٹی سے ہے، آپ جہاں سے بھی آئے ہیں، پرسکون ماحول میں بے خوف زندگی گذاریں خود کو پرسکون محسوس کریں ۔ یہ ہندوستان کی آئینی بنیاد ہے۔ ،اس دوران نوجوانوں نے راہل گاندھی سے سوال کیا کہ کیا آپ جیل میں بند مسلمانوں کو رہا کریں گے؟ اس کے جواب میں راہل گاندھی نے کہا کہ ہمیں عدالت کی پیروی کرنی ہوگی۔ ہم ملک کے آئینی نظام سے ہٹ کر کام نہیں کر سکتے۔ اگر مجھے سپریم کورٹ نے بحال نہ کیا ہوتا تو مجھے اس فیصلے پر عمل کرنا پڑتا۔ یہ وہ اوزار ہیں جو ہمارے پاس ہے ۔اور ہمیں اس کا احترام کرنا ہوگا ۔
