دیوبند، سماج نیوز \سروس:تحصیل دیوبند کے گائوں چندینا کولی میں واقع شری گاندھی ویدک انٹر کالج کی منتظمہ کمیٹی کے جمعرات کے روز ہونے والے الیکشن نہایت سخت حفاظتی بندوبست کے ساتھ کرائے گئے۔ اس الیکشن میں منیجر کے عہدہ کے لئے ہونے والے مقابلہ میں اشوک کمار نے 68ووٹ حاصل کرکے اپنے حریف جوگندر کمار کو 27ووٹوں سے شکست دے کر کامیابی حاصل کی۔ اشوک کمار شری گاندھی ویدک انٹر کالج کی منتظمہ کمیٹی کے چوتھی مرتبہ صدر کے عہدہ پر منتخب ہوئے ہیں۔ الیکشن آفیسر مشرا اور جائزہ کار کی نگرانی میں ہونے والے الیکشن پوری شفافیت کے ساتھ منعقد ہوئے۔ الیکشن آفیسر نے بتایا کہ انٹر کالج کی کمیٹی میں کل 119ممبران تھے ، ان میں سے چار ممبران کی موت ہوجانے کے بعد یہ تعداد گھٹ کر 115رہ گئی۔ انہو ںنے بتایا کہ ان ایک سو پندرہ ممبران میں سے 109نے ووٹنگ میں حصہ لیا۔ الیکشن آفیسر مشرا نے بتایا کہ منتظمہ کمیٹی کے 12عہدوں کے لئے الیکشن کرایا گیا ، لیکن 11عہدوں پر بلامقابلہ عہدیداران وممبران منتخب ہوگئے صرف منیجر کے عہدہ کے لئے دو پرچہ نامزدگی بھرے گئے تھے جس کے لئے الیکشن کرایا گیا۔ انہوں نے بتایا کہ نوتشکیل شدہ کمیٹی میں ڈاکٹر اوم کمار کو صدر، یشپال سنگھ کو نائب صدر ، اشوک کمار کو منیجر ، ڈاکٹر پتامبر موہن کو نائب منیجر اور وپن کمار کو خازن مقرر کیا گیا ہے، جب کہ گورو، نند کشور شرما، رام کمار، سنجے، ستیہ ویر عرف ببلی اور انل کو کمیٹی کے ارکان کی حیثیت سے بلامقابلہ منتخب کرلیا گیا۔
