نثاراحمد کو دہلی یونیورسٹی سے پی ایچ ڈی کی ڈگری تفویض

نئی دہلی، دہلی یونیورسٹی کے ریسرچ اسکالر نثار احمد خان کو آج پی ایچ ڈی کی ڈگری کی تفویض کی گئی۔ ریسرچ اسکالر نثار احمد نے سابق صدر، شعبہ اردو، دہلی یونیورسٹی پروفیسر ابن کنول (مرحوم) کی نگرانی میں مکمل کیا تھا۔ تحقیقی مقالے کا موضوع آزادی کے بعد اردو-ہندی ناولوں کا موضوعاتی وتجزیاتی مطالعہ (نمائندہ ناولوں کے حوالے سے) تھا۔ یہ موضوع پروفیسر ابن کنول کی تجویز پر منتخب کیا گیا تھا اور نثاراحمد نے ان کی نگرانی میں آخری تحقیقی مقالہ جمع کیا تھا۔ خاص بات یہ ہے کہ پروفیسر ابن کنول کے ریٹائرمنٹ کے روز یعنی 31 اکتوبر 2022 کو یہ مقالہ جمع کرکے نثاراحمد کو پروفیسرابن کنول کا آخری شاگرد ہونے کا اعزاز حاصل کیا تھا۔اس تحقیقی مقالہ کے ممتحن جامعہ ملیہ اسلامیہ کے معروف استاد پروفیسر ندیم احمد تھے۔ نثاراحمد خان نے پروفیسر ندیم احمد کے سوالوں کا تشفی بخش جواب دیا تھا، جس کے بعد پروفیسر ندیم احمد نے انہیں ڈاکٹریٹ کی ڈگری کے لئے مبارکباد پیش کی تھی۔دہلی یونیورسٹی کے 100 سال مکمل ہونے پر 99 ویںسالانہ کنووکیشن تقریب میں وائس چانسلرپروفیسر یوگیش سنگھ کے دست مبارک سے نثاراحمد کو ڈگری تفویض کی گئی۔ اس موقع پر مہمان خصوصی کے طور پر صدر جمہوریہ ہند دروپدی مرمو نے شرکت کی جبکہ مہمان اعزازی کے طور پر مرکزی وزیر تعلیم دھرمیندر پردھان نے شرکت کی۔ اس موقع پر صدر جمہوریہ دروپدی مرمو اور وائس چانسلر پروفیسر یوگیش سنگھ نے ڈاکٹریٹ کی ڈگری حاصل کرنے والے طلباکو روشن مستقبل کے لئے مبارکباد پیش کرتے ہوئے اپنے تعلیم سے معاشرہ اور ملک کی تعمیر میں اہم تعاون دینے کی نصیحت کی۔