سید پرویز قیصر
راولپنڈی میں کھیلے گئے دوسرے ٹسٹ میں بنگلہ دیش نے پاکستان کو چھ وکٹ سے شکست دیکر دو ٹسٹ میچوں کی سریز2-0 سے جیتی۔ اس ٹسٹ میں پاکستان نے ٹاس ہارنے کے بعد پہلے بلے بازی کرتے ہوئے85.1 اوور میں274رن بنائے تھے۔ بنگلہ دیش کے سبھی کھلاڑی اپنی پہلی اننگ میں78.4 اوور میں262 رن بناکر آوٹ ہوئے تھے جسکی بدولت پاکستان کو پہلی اننگ کی بنیاد پر بارہ رن کی قلیل برتری حاصل ہوگئی تھی۔ دوسری اننگ میں پاکستان کے سبھی کھلاڑی46.4 اوور میں172 رن بناکر آوٹ ہوئے۔ بنگلہ دیش کو میچ جیتنے کیلئے185 رن کا ہدف ملا تھا۔ اس نے 56 اوور میں چار وکٹ پر 185 رن بناکر میچ چھ وکٹ سے جیتا اور سریز میں2-0 سے کامیابی اپنے نام کی۔ بنگلہ دیش کا دوسری اننگ میں اسکور جیت کیلئے چوتھی اننگ میں اس کا تیسرا سب سے بڑا سکور تھا۔
اسی میدان پر کھیلے گئے پہلے ٹسٹ میں ٹاس ہارنے کے بعد پہلے بلے بازی کرتے ہوئے پاکستان نے اپنی پہلی اننگ113 اوورمیں چھ وکٹ پر448 رن بناکر ڈکلیر کردی تھی۔ بنگلہ دیش نے اپنی پہلی اننگ میں167.3 اوور میں565 رن بنائے تھے جو اس کا پاکستان کے خلاف سب سے زیادہ اسکور تھا۔ پاکستان نے اپنی دوسری اننگ117 رن کے خسارے کے ساتھ شروع کی اوراسکے سبھی کھلاڑی 55.5 اوور میں146 رن بناکر آوٹ ہوگئے۔ بنگلہ دیش کو میچ جیتنے کے لئے30 رن درکار تھے۔ اس نے 6.3 اوور میں کسی نقصان کے بغیر یہ رن بناکر دس وکٹ سے میچ جیتا تھا۔ بنگلہ دیش کی یہ ٹسٹ کرکٹ میں وکٹوں کے اعتبار سے سب سے بڑی جیت تھی۔
اس دورے سے پہلے بنگلہ دیش نے غیر ممالک میں لگاتار پانچ ٹسٹ میچوں میں شکست ہوئی تھی۔ اس نے لگاتار پانچ میچوں میں شکست کے بعد لگاتار دو میچوں میں جیت اپنے نام کی ہے۔
پاکستان کے خلاف ٹسٹ سریز میں پہلی جیت بنگلہ دیش کی غیر ممالک میں کسی سریز میں تیسری جیت ہے۔ اس نے بنگلہ دیش سے باہر پہلی سریز2009 میں ویسٹ انڈیز میں جیتی تھی۔ اس سریز کے دونوں ٹسٹ میچوں میں بنگلہ دیش فاتح رہی تھی۔ کنگس ٹاون میں کھیلے گئے پہلے ٹسٹ میں95 رن کی کامیابی کے بعد بنگلہ دیش نے سینٹ جارج میں ویسٹ انڈیز کے خلاف چار وکٹ سے جیت اپنے نام کی تھی۔
زمبابوے کے خلاف 2021 میں زمبابوے میں واحد ٹسٹ میچ بنگلہ دیش نے220 رن سے جیتا تھا۔ اس ٹسٹ میچ میں بنگلہ دیش نے اپنی پہلی اننگ میں126 اوور میں468 رن بنائے تھے۔ زمبابوے نے پہلی اننگ میں111.5 اوور میں276 رن بنائے تھے جسکی وجہ سے بنگلہ دیش کو پہلی اننگ کی بنیاد پر192 رن کی سبقت حاصل ہوگئی۔ بنگلہ دیش نے اپنی دوسری اننگ 67.4 اوور میں ایک وکٹ پر 284 رن بناکر ڈکلیر کردی اور زمبابوے کو میچ جیتنے کیلئے477 رن کا ایک بڑا ہدف دیا تھا۔ زمبابوے کے سبھی کھلاڑی94.4 اوور میں 256 رن بناکر آوٹ ہوئے جسکی وجہ سے بنگلہ دیش نے اس ٹسٹ میچ میں220 رن سے جیت حاصل کرلی۔
بنگلہ دیش نے اپنے گھر سے باہر ابھی تک جو ٹسٹ میچ کھیلے ہیں اس میں67 ٹسٹ میچ کھیلے ہیں اس میں آٹھ ٹسٹ اسے کامیابی ملی ہے اور55 ٹسٹ میچوں میں شکست ہوئی ہے۔ اسکے چار ٹسٹ میچ برابر بھی رہے ہیں۔ کل ملاکر بنگلہ دیش نے جو144 ٹسٹ میچ کھیلے ہیں اس میں21 میں اسے کامیابی ہوئی ہے اور105ٹسٹ میچوں میں ہار ہوئی ہے۔ اسکے18 ٹسٹ برابری پر خٹم ہوئے ہیں۔
