ہرارے، (یواین آئی )بین میئس (191 رنز) اور جوزف مورس (81 رنز) کی دھواں دھار اننگز کی بدولت انگلینڈ نے بدھ کے روز انڈر-19 ورلڈ کپ کے 17ویں میچ میں اسکاٹ لینڈ کے خلاف مقررہ 50 اوورز میں 6 وکٹوں کے نقصان پر 404 رنز کا ہمالیہ جیسا اسکور کھڑا کر دیا ہے۔آج یہاں اسکاٹ لینڈ نے ٹاس جیت کر پہلے بالنگ کرنے کا فیصلہ کیا، لیکن انگلش بلے بازوں نے اس فیصلے کو غلط ثابت کر دیا۔ اگرچہ انگلینڈ کی شروعات مایوس کن تھی اور محض 12 کے مجموعی اسکور پر بین ڈکنز (5) کی صورت میں پہلی وکٹ گر گئی، لیکن اس کے بعد میدان میں رنوں کا طوفان آ گیا۔بین میئس اور جوزف مورس نے مل کر دوسری وکٹ کے لیے 188 رنز کی برق رفتار شراکت داری قائم کی۔ 25ویں اوور میں جوزف مورس سنچری کی جانب بڑھتے ہوئے 81 رنز بنا کر آؤٹ ہوئے، انہوں نے اپنی اننگز میں 5 چوکے اور 4 چھکے لگائے۔ کپتان تھامس ریو نے 22 اور کالیب فالکنر نے 32 رنز کا تعاون دیا۔میچ کا اصل مرکز بین میئس رہے، جنہوں نے اسکاٹش بالرز کی لائن اور لینتھ بگاڑ دی۔ وہ اپنی ڈبل سنچری کے انتہائی قریب پہنچ کر 46ویں اوور میں 191 رنز پر آؤٹ ہوئے۔ میئس نے محض 117 گیندوں کا سامنا کیا جس میں 18 چوکے اور 8 بلند و بالا چھکے شامل تھے۔انگلینڈ نے اننگز کے اختتام پر 404 رنز بنائے، جس میں فرحان احمد (15) اور سیبسٹین مورگن (25) ناٹ آؤٹ رہے۔اسکاٹ لینڈ کی جانب سے جیک ووڈ ہاؤس سب سے کامیاب باؤلر رہے جنہوں نے 3 وکٹیں حاصل کیں، جبکہ فنلے جونز نے 2 اور میکس چیپلن نے ایک کھلاڑی کو آؤٹ کیا۔
