لکھنؤ (یواین آئی) سماجوادی پارٹی(ایس پی) کے قومی صدر اکھلیش یادو نے جیوتِرمٹھ کے شنکراچاریہ سوامی اویمکتیشورانند سرسوتی کے لکھنؤ میں پروگرام کی اجازت کے معاملے پراتر پردیش کی بی جے پی حکومت کو نشانہ بنایا ہے۔ انہوں نے کہا کہ کسی بھی پروگرام پر غیر ضروری شرطیں اور پابندیاں لگانا کمزور حکومت کی نشانی ہے۔ اگر بی جے پی سناتن روایات کا احترام نہیں کر سکتی تو کم از کم ان کی توہین بھی نہ کرے۔ بدھ کو سوشل میڈیا کے ذریعے بیان جاری کرتے ہوئے اکھلیش یادو نے الزام لگایا کہ ریاستی حکومت ایک خاص برادری کے وقار کو ٹھیس پہنچا رہی ہے۔ انہوں نے کہا کہ اس برادری کے لوگ بی جے پی حکومت میں وزیر، رکن پارلیمنٹ، رکن اسمبلی اور دیگر عوامی نمائندوں کے طور پر شامل ہیں، لیکن وہ اس معاملے پر اپنی ہی برادری کو جواب دینے سے بچ رہے ہیں۔ انہوں نے کہا کہ ایسے عوامی نمائندے ذاتی مفاد کے لئے بی جے پی کے ساتھ ہیں اور اپنی برادری میں عزت کھو چکے ہیں۔ سماجوادی پارٹی سربراہ نے کہا کہ آئندہ انتخابات میں عوام ایسے لیڈروں کو سبق سکھائے گی۔
