ریو ڈی جنیرو، (یو این آئی) برازیل کے مشہور فٹ بال کلب بوٹافوگو پرتگال سے تعلق رکھنے والے فرینکلن کاروالہو کو اپنا نیا ہیڈ کوچ مقرر کرنے کے بالکل قریب پہنچ گئے ہیں۔ برازیلی میڈیا کی رپورٹس کے مطابق، 39 سالہ کاروالہو کے جمعرات کو ریو ڈی جنیرو پہنچنے کی توقع ہے جہاں وہ دسمبر 2027 تک کے طویل مدتی معاہدے پر دستخط کریں گے۔ اخبار ‘او گلوبو کے مطابق، کاروالہو بوٹافوگو کے لیے کوئی نیا نام نہیں ہیں کیونکہ وہ 2024 میں آرتھر جارج کے اسسٹنٹ کوچ کے طور پر کام کر چکے ہیں، جب اس کلب نے کوپا لبرٹادورس اور برازیلین سیری اے جیسے بڑے اعزازات اپنے نام کیے تھے۔ژنہوا کے مطابق، کاروالہو کا فرسٹ ٹیم مینیجر کے طور پر واحد تجربہ 2022 میں پرتگالی کلب ‘بیلنسز ایس اے ڈی کے ساتھ رہا تھا جو اب ختم ہو چکا ہے۔ بوٹافوگو مارچ میں ارجنٹائن کے مارٹن انسلمی سے علیحدگی کے بعد سے ایک نئے ہیڈ کوچ کی تلاش میں تھا۔ تین بار کے برازیلین چیمپئن کلب کے لیے جنوبی امریکی سیزن کا آغاز کافی مشکل رہا ہے، جہاں وہ نہ صرف کوپا لبرٹادورس کے کوالیفائنگ مرحلے سے باہر ہو گئے بلکہ برازیلین سیری اے کے ابتدائی سات میچوں میں سے پانچ میں انہیں شکست کا سامنا کرنا پڑا۔ اب کاروالہو کی واپسی کا مقصد ٹیم کو دوبارہ فتوحات کی راہ پر گامزن کرنا ہے، جو برازیلی فٹ بال میں اس کلب کی اصل پہچان رہی ہے۔
