برسلز میں ہزاروں افراد نے غزہ میں فوری جنگ بندی کا مطالبہ کرتے ہوئے کیا مظاہرہ

برسلز، (یو این آئی) مختلف یورپی ممالک کے ہزاروں مظاہرین نے غزہ میں فوری جنگ بندی کا مطالبہ کرتے ہوئے برسلز میں مظاہرہ کیا۔مظاہرین نے اتوار کو’فلسطین میں نسل کشی بند کرو‘، ’مزاحمت‘ اور ’فلسطینیوں کے ساتھ یکجہت‘ جیسے نعرے لگاتے ہوئے گارے ڈو نورڈ سے یورپی کوارٹر میں جین ری کی جگہ تک مظاہرہ کیا۔
تقریباً 40,000 مظاہرین نے مظاہرے میں حصہ لیا، جس کا اہتمام سول سوسائٹی کی تنظیموں بشمول بیلجیئم-فلسطینی ایسوسی ایشن، فرانسیسی اور ڈچ بولنے والی امبریلا تنظیم سی این ڈی سی 11.11.11 اور فلسطینی گروپ نے کیا تھا۔
منتظمین نے عالمی برادری سے مطالبہ کیا کہ وہ مستقل جنگ بندی کا راستہ تلاش کرنے، شہریوں کی حفاظت اور یرغمالیوں کو آزاد کرانے کے لیے فوری کارروائی کرے۔ انہوں نے غزہ پٹی کی ناکہ بندی ختم کرنے اور فلسطینیوں کے لیے انسانی امداد کو پہنچانے کے لئے بڑھاوا دینے کی بھی مانگ کی۔
وولووے سینٹ- لینبرٹ میں سی این سی ڈی 11.11.11 کے صدر جارجیز ڈی سمول نے کہا کہ اس مسئلے کی بنیادی وجہ یہ ہے کہ فلسطین کو 70 سال قبل اقوام متحدہ نے ایک ملک کے طور پر تسلیم نہیں کیا تھا۔ انہوں نے زور دے کر کہا کہ فلسطین کو ریاست کا جائز حق حاصل ہے۔ اس کے علاوہ تنظیموں نے یورپی یونین اور اس کے رکن ممالک پر زور دیا کہ وہ اسرائیل پر مکمل بین الاقوامی فوجی پابندیاں عائد کریں اور اس کے خلاف اقتصادی اور سفارتی پابندیاں عائد کریں۔