نئی دہلی: حج بیت اللہ2023کے لیے حجاج کرام کی روانگی کی مقررہ تاریخ21مئی2023کے قریب آنے کے ساتھ ہی حج سے منسلک مختلف سرگرمیوں کی تیاریاں شروع ہو چکی ہیں۔ اس ضمن میں دہلی اسٹیٹ حج کمیٹی کی چیئرپرسن محترمہ کوثر جہاں نے دہلی ایمبارکیشن پوائنٹ سے سفر حج کے لیے روانہ ہونے والے دہلی اور مختلف چھ ریاستوں کے عازمین حج کے لیے دہلی اسٹیٹ حج کمیٹی کی جانب سے عارضی قیام، ٹرانسپورٹ اور دیگر سہولیات کی فراہمی سے متعلق انتظامات میں اب تک کی پیش رفت کا جائزہ لیا۔حسن میں اتفاق سے آج ہی مہاراسٹرا اسٹیٹ حج کمیٹی کے سابق چیئرمین اور بھارتیہ جنتا پارٹی اقلیتی مورچہ کے قومی صدر جناب جمال صدیقی بھی حج کمیٹی میں موجود تھے ۔چیئرپرسن محترمہ کوثر جہاں نے ان سے بھی ان کے تجربات سے استفادہ کے لیے تفصیلی تبادلۂ خیال کیا اور بتایا کہ حج امور و معاملات کے بہتر سے بہتر انتظامات کے لیے جلد ہی متعلقہ محکموں مثلا ریونیو، ایم سی ڈی،ڈوسب، دہلی جل بورڈ، دہلی پولیس، دہلی ٹرافک، فائر سروز کی میٹنگ بلائی جائے گی تاکہ حاجیوں کو بہتر سے بہتر سہولیات کو یقینی بنایا جاسکے۔ انہوں نے اس موقع پر اپنے اس عزم کا بھی اعادہ کیا کہ حاجیوں کو ملک گیر پیمانے پر فراہم کی جانے والی مجموعی سہولیات پر اجتماعی تبادلہ خیال کے لیے دہلی اسٹیٹ حج کمیٹی تمام ریاستی حج کمیٹیوں کے چیئرمین اور افسران کا ایک مشاورتی اجتماع بھی منعقد کرنے کا ادارہ رکھتی ہے ۔ جس میں دہلی اسٹیٹ حج کمیٹی ملک کے دار الحکومت میں واقع ہونے اور ملک کے سب سے بڑے ایمبارکیشن پوائنٹ کی انتظام کار ریاستی حج کمیٹی ہونے کی وجہ سے ایک مرکزی کردار ادا کرے گی۔
