کاروان اتحاد و بھائی چارہ کے تحت ویشالی ضلع کے کئی مقامات پر پروگرام کا انعقاد
پٹنہ، 9 اگست : جے ڈی یو کے سر گرم لیڈر ایم ایل سی ڈاکٹر خالد انور کی قیادت میں جاری ‘کاروان اتحاد و بھائی چارہ’ کے تحت آج ویشالی ضلع کے کئی مقامات پر پروگرام کا انعقاد کیا گیا۔سب سے پہلا پرو گرام جنداہا بلاک کے مرادآباد واقع مدرسہ اشرف العلوم میں منعقد ہوا، بعد ازیں سہدیئی تھانہ کے تحت دوبہا، آندھرا باد چوک اور حاجی پور ٹاؤن میں تقریبات ہوئیں۔
مدرسہ اشرف العلوم میں منعقد اجلاس سے خطاب کرتے ہوئے کارواں کے کنوینر ایم ایل سی ڈاکٹر خالد انور نے کہا کہ وزیر اعلی نتیش کمار نے ملک کے آئین کی بقا اور ملک سے نفرت کے خاتمہ کے لئے ای ڈی اور سی بی آئی کی پرواہ کئے بغیر این ڈی اے سے علیحدگی اختیار کی ہے۔ بی جے پی کے ناپاک عزائم کے خاتمہ کیلئے وزیر اعلی نتیش کمار کی ایک آواز پر تمام سیکولر جماعتوں نے لبیک کہا ہے۔ اب ہماری ذمہ داری ہے کہ وزیر اعلی کے اس مشن کو کیسے کامیاب کیا جائے ۔ ڈاکٹر خالد انور نے کہا کہ گھر گھر نفرت بانٹ رہی بی جے پی کی سیاست کو ختم کرنے کیلئے ہمیں سماج میں اتحاد و بھائی چارہ کو فروغ دینا ہوگا۔ جیسے ہی سماج سے نفرت ختم ہوگی بی جے پی کی سیاست ختم ہوجائے گی۔ انہوں نے کہا کہ فرقہ پرستوں سے لوہا لینے والے اور ہماری شریعت کے تحفظ کیلئے لڑائی لڑنے والے وزیر اعلی نتیش کمار کے ساتھ ہمیں چلنا ہوگا اور انکے نظریات کو عام کرنا ہوگا۔ انہوں نے عوام سے اپیل کی کہ مقامی سطح پر کمیٹی بنائیں اور ہندو بھائیوں کے ساتھ آپسی اتحاد کے فروغ کیلئے کام کریں۔
تقریب سے خطاب کرتے ہوئے بہار اسٹیٹ سنی وقف بورڈ کے چیئرمین الحاج محمد ارشاد اللہ نے کہا کہ وزیر اعلی نتیش کمار نے کبھی بھی فرقہ پرستی سے سمجھوتہ نہیں کیا۔ جب بھی فرقہ پرستوں نے ماحول خراب کرنے کی کوشش کی ہے وزیر اعلی نتیش کمار نے ایسے لوگوں کے خلاف سخت کارروائی کی ہے۔ انہوں نے کہا کہ وزیر اعلی نتیش کمار نے بہار میں تمام طبقوں کی ترقی کیلیے کام کیا ہے۔ خاص کر اقلیتوں کیلئے انہوں نے جو کام کیا ہے اس کی مثال ملک بھر میں نہیں ملتی۔ "کاروان اتحاد و بھائی چارہ” کی ستائش کرتے ہوئے انہوں نےکہا کہ ملک کے ابھی کے جو حالات ہیں، فرقہ پرستوں کے ذریعہ جس طرح سے ملک کے آئین کو ختم کرنے کی سازش ہو رہی ہے، ملک کی یکجہتی اور بھائی چارگی کو ختم کیا جا رہا ہے، ایسے میں ڈاکٹر خالد انور صاحب کی یہ پہل قابل ستائش اور قابل خیر مقدم ہے۔ یہ کارواں در اصل وزیر اعلی نتیش کمار کا تر جمان ہے ۔ یہ اتنا بڑا کام ہے جس کیلئے ہر کسی کو آگے آنا چاہئے۔ الحاج محمد ارشاد اللہ نے اعلان کیا کہ میں آج سے ایم ایل سی ڈاکٹر خالد انور کے نقش قدم پر چلنے کا عزم کرتا ہوں۔
پروگرام کی صدارت محمد ابوزر صدیقی نے کی جبکہ نظامت ابو بکر صدیقی نے انجام دئے۔ پروگرام سے جے ڈی یو ایم ایل سی وجے سنگھ، جے ڈی یو کے ریاستی جنرل سکریٹری میجر اقبال حیدر خان، جے ڈی یو کے ریاستی سکریٹری عبدالباقی، سرمد پور پنچایت کے مکھیا محمد مختار، سابق مکھیا محمد انوٹھے، ضلع پریشد رکن رینا راگنی، جے ڈی یو کے ضلعی صدر سبھاش چندر سنگھ، اقلیتی سیل کے ضلعی صدر مصطفیٰ حسن نے بھی خطاب کیا۔ موقع پر پنچایت سمیتی کے رکن چندن کمار، سابق پنچایت سمیتی رکن محمد نثار، سابق پنچایت سمیتی رکن محمد نثار، وارڈ ممبر سنجر عالم کے علاوہ بڑی تعداد میں علاقہ کے دانشوران وعلما موجود تھے۔ اسکے بعد یہ کارواں سہدیئی تھانہ کے تحت دوبہا، آندھرا باد چوک پر رکتے ہوئے حاجی پور پہنچا۔ یہاں بازار سمیتی واقع منت ریسورٹ کے وسیع و عریض ہال میں وارڈ پارشد سرفراز عالم کے زیر انتظام شاندار پروگرام کا انعقاد کیا گیا۔پرو گرام کی نظامت ڈاکٹر مقصود عالم نے کی ۔ اس پرو گرام میں مہمان خصوصی کے طور پر حکومت بہار کے وزیر جینت سنگھ سمیت مذکورہ بالا تمام مہمانان، جمعیۃ علما کے ممبران اور بڑی تعداد میں علاقہ کے دانشوران وعلما موجودتھے۔
