بچے ہمارے مستقبل ہیں لیکن وہ اپنا وقت لاپرواہی سے گزار رہے ہیں

رضوان سلمانی
دیوبند، 23 جنوری ،سماج نیوز سروس: جمعیة علماءکی جانب سے چلائی جارہی سماجی اصلاحی مہم کے تحت گا¶ں غالب پور میں اصلاحی جلسہ کا انعقاد کرکے معاشرے میں پھیلی برائیوں کو ختم کرنے کی اپیل کی گئی۔ اس دوران مفتی مجیب ندوی نے پروگرام کے اغراض و مقاصد پر تفصیلی روشنی ڈالی۔ اس موقع پر مفتی عبدالقادر قاسمی نے بتایا کہ یہ مہم جمعیة کی جانب سے ملک بھر میں چلائی جا رہی ہے۔ انہوں نے کہا کہ برائیوں کا خاتمہ وقت کی اہم ضرورت ہے اور اسلامی تعلیم کا بنیادی مقصد انسانی معاشرہ کی اصلاح کرنا ہے اور اس طرح اصلاح کرنا ہے کہ دنیا میں تمام انسان امن وامان کی زندگی بسر کریں اور اس طرح زندہ رہیں کہ اخلاق کا دامن کبھی ہاتھ سے نہ چھوٹے اور آخرت کی لامتناہی زندگی کے لئے پورے اخلاق وتقویٰ کے ساتھ تیاری کریں، اللہ ان سے راضی ہو ، اسلامی تعلیم کا یہ بنیادی مقصد صرف اس طرح سے حاصل ہوسکتا ہے کہ اللہ تعالیٰ کے حکم کے مطابق ہم حضور پاک صلی اللہ علیہ وسلم کے اسوئہ حسنہ کی پیروی کرتے ہوئے یہ معلوم کریں کہ حضورپاک صلی اللہ علیہ وسلم نے معاشرہ کی اصلاح کس طرح کی تھی ۔ مہمان خصوصی مولانا نذر محمد قاسمی نے کہا کہ دین اسلام نے جہیز کی نمائش کو حرام قرار دیا ہے لیکن ہمارے ہاں طرح طرح کے رواج اور رسومات بڑھ رہی ہیں اور سٹے بازی کی عادت عام ہو گئی ہے اور ہم لوگ جوا وغیرہ میں مصروف ہو گئے ہیں۔ انہوں نے کہا کہ ہرمسلمان کے لیے ایسی حرکتیں کرنا حرام ہے۔جمعیة علماءبڈھانہ کے شہرصدر حافظ شیردین نے کہا کہ ہمارے بچے رات بھر پڑھائی نہیں کرتے اور موبائل میں مصروف رہتے ہیں۔ انہوں نے کہا کہ ہمیں اپنے بچوں کی نگرانی کرنی چاہئے اور دیکھنا چاہئے کہ ہمارے بچے کس کام میں مصروف ہیں، یہ والدین کی ذمہ داری ہے ۔انہوں نے کہا کہ بچے ہمارے مستقبل ہیں لیکن بچے اپنا وقت لاپرواہی سے گزار رہے ہیں، اس پر توجہ دینے کی ضرورت ہے۔ انہوں نے کہا کہ اس وقت مسلم قوم کے دو بڑے مسائل ہیں ، تعلیمی پسماندگی اور اقتصادی بدحالی ، اس لئے سب سے پہلے اس بات کی ضرورت ہے کہ مسلم معاشرہ کو تعلیمی پسماندگی سے باہر نکال کر اعلیٰ ومعیاری تعلیم سے آراستہ کیا جائے ۔ انہو ںنے کہا کہ اس ذمہ داری کو والدین کے ساتھ ساتھ علماءاور تعلیمی اداروں کے ذمہ داران اور اساتذہ کو نبھانا چاہئے ۔ حافظ شیردین نے تمام والدین سے اپیل کی کہ وہ اپنے بچوں کی صحیح دیکھ بھال کریں ،کیا ہمارے بچے غلط کاموں میں مصروف ہیں۔مولانا سید محمد سعد نے اپنے صدارتی خطاب میں کہا کہ وراثت میں بیٹیوں کو حصہ دیں، قرآن مجید میں بڑی وضاحت کے ساتھ عورت اور مرد کے حقوق کا تعین کیا گیا ہے اور عورتوں کے حق وراثت کو بڑی تفصیل کے ساتھ بیان کیا گیا ہے۔ اس سلسلہ میں حدیث پاک میں بڑی تاکید آئی ہے۔ پروگرام کو کامیاب کرانے میں قاری عبدالجبار،قاری محمد جاوید،قاری ظفر وغیرہ کا اہم کردار رہا۔ اس موقع پر مولانا سرفراز،قاری محمد عمران،محمد آصف قریشی بڈھانوی،قاری محمد طاہر،عبدالناصر صدیقی، مرسلین پردھان، نعیم پردھان،ماسٹر آس محمد،حافظ عبدالغفار وغیرہ موجود رہے۔