غزہ:تباہ حال غزہ کی پٹی میں جاری جنگ کو مسلسل نو ماہ ہو چکے ہیں۔ ایسے میں شمالی علاقوں میں بے گھر افراد کو واپسی کی اجازت کے حوالے سے افواہیں پھیلنا شروع ہو گئی ہیں۔
سوشل میڈیا پر سرگرم بعض ذرائع متعدد بے گھر فلسطینی خاندانوں کے ساتھ اسرائیلی رابطوں کا انکشاف کیا ہے۔ ساتھ ہی دعوی کیا گیا ہے کہ اسرائیلی فوج نے شام کے اوقات میں شارع الرشید کے راستے پر قائم کی جانے والی عسکری چیک پوسٹ کے ذریعے غزہ اور شمالی علاقوں میں واپسی کی اجازت دے دی ہے۔
دوسری جانب غزہ میں فلسطینی حکام نے اس نوعیت کی دعوت سے خبردار کرتے ہوئے اسے مشکوک قرار دیا ہے۔ حکام نے بے گھر فلسطینیوں پر زور دیا ہے کہ وہ ان غیر مصدقہ رابطوں سے انتہائی ہوشیار رہیں۔ اس حوالے سے حکام نے ان سابقہ جرائم اور خلاف ورزیوں کی یاد دہانی کرائی جب اسرائیلی فوج نے غزہ پٹی کے شمال میں واپس لوٹنے والوں پر براہ راست فائرنگ کر دی تھی۔
غزہ پٹی میں بالخصوص وسطی اور جنوبی علاقوں میں اسرائیلی بم باری کا سلسلہ جاری ہے۔ گذشتہ برس سات اکتوبر کو شروع ہونے والی جنگ میں اب تک موت کا شکار ہونے والے فلسطینی شہریوں کی مجموعی تعداد 37600 سے زیادہ ہو چکی ہے۔
غزہ کی پٹی میں 20 فی صد سے زیادہ آبادی یعنی 4 لاکھ 95 ہزار سے زیادہ افراد غذائی امن کے سنگین ترین بحران سے دوچار ہیں۔ جنگ کے نتیجے میں اب تک غزہ کی پٹی میں 15 لاکھ سے زیادہ فلسطینی بے گھر ہو کر شمالی علاقوں سے جنوب کی جانب بالخصوص رفح شہر ہجرت کر چکے ہیں۔
