دیوبند، عازمین حج 2023 کو یہ اطلاع دی جاتی ہے کہ سالہا ئے گذشتہ کی طرح اس سال بھی مسلم فنڈ ٹرسٹ دیوبند کی جانب سے تین روزہ حج ٹریننگ کیمپ شیخ الہند ھال عیدگاہ روڑ پر 14؍ مئی تا 16؍ مئی بروز اتوار ،پیر اورمنگل کو منعقد کیاجائے گا۔ اس حج ٹریننگ کیمپ میں عازمین حج کو ارکان حج وعمرہ احرا م باندھنا،وقوفِ مزدلفہ، طواف ِزیارت، طواف وداع قربانی کرنا،کنکریاں مارنا او ر ترتیب کے اعتبار سے مناسک حج کی ادائیگی نیز سعی وطواف سے متعلق علمائے کرام، مفتیان کرام وتجربہ کا ر افراد ماڈلوں کی مددسے عملی ٹریننگ دیں گے۔ حج ٹریننگ کیمپ کے سرپرست وذمہ دران ڈاکٹر نواز دیوبندی ،ڈاکٹر محمد اعظم اور مولانا دلشاد قاسمی اور ادارہ کے منیجر سہیل صدیقی نے بتایا کہ تین روزہ حج ٹریننگ کیمپ میں شرکت کرنے والے عازمین کے قیام وطعام اور ناشتہ وغیرہ کا انتظام منجانب مسلم فنڈ ٹرسٹ دیوبند کیاجائے گا۔ ٹریننگ کیمپ کے کنوینر فہیم صدیقی اور معاون کنوینر فیضی صدیقی نے بتایا کہ خواتین کی حج ٹریننگ کا انتظام ملحقہ بلڈنگ میںمرد عازمین سے الگ پر دہ کے ساتھ کیاجائے گا، جہاں تجربہ کار خواتین کے ذریعہ عملی ٹریننگ دی جائے گی۔ انہوں نے بتایا کہ ٹریننگ کیمپ میں دیوبند اور قرب و جوار کے عازمین کے علاوہ دوسرے شہروں و دیگر اضلاع کے عازمین بھی شرکت کر سکتے ہیں۔ تمام عازمین کے لیے لازم ہوگا کہ وہ ٹریننگ کیمپ میں شرکت کیلئے اپنے کو ر نمبر کی سلپ ساتھ لیکر آئیں ۔ کیمپ کے اختتام پر تمام شریک عازمین کو ٹریننگ سر ٹیفکیٹ تقسیم کئے جائیں گے ۔
