عامرسلیم خان
نئی دہلی ،کانگریس ’ بھارت جوڑو یاترا‘ دوئم کی تیاری میں جٹ گئی ہے۔ بھارت جوڑو یاترا سے پارٹی کو ملنے والے عوامی آکسیجن نے کانگریس کے حوصلے بلند کردیئے ہیں۔ پارٹی لیڈر وبھاکر شاستری نے آج کہا کہ کانگریس 2024 کے لوک سبھا انتخابات سے قبل ملک کے جنوبی اور شمالی علاقوں کے درمیان جاری بھارت جوڑو یاترا کی طرح ایک اور مارچ نکالے گی۔ شاستری جو راجستھان کیلئے ’بھارت جوڑو یاترا ‘کے انچارج ہیں، نے کہا کہ جاری پیدل مارچ دسمبر کے پہلے ہفتہ میں ریاست میں داخل ہو جائے گا اور الور ضلع کے مالاکھیڑا میں ایک بڑی ریلی کا منصوبہ ہے۔انہوں نے مزید کہا ہے کہ بھارت جوڑو یاترا کی طرز پر مشرق سے مغرب تک ایک اور ریلی کی بھی تجویز زیر غورہے۔ روڈ میپ تیار کیا جا رہا ہے۔ یہ یاترا 2024 لوک سبھا انتخابات سے پہلے کی جائے گی۔
وبھاکر شاستری نے کہا کہ بھارت جوڑو یاترامکمل طور پر غیر سیاسی ہے اور اس کا مقصد امیر اور غریب کے درمیان فرق کو کم کرنا، ملک میں ہم آہنگی پیدا کرنا اور اس جیسے بیشتر مسائل کو اٹھانا ہے۔اس کا مقصد یہ بھی ہے کہ عوم کوبے تحاشہ بڑھتی مہنگائی اور بے روزگاری کے بارے میں بتایا جائے۔شاستری نے کہا کہ راجستھان کیلئے بھارت جوڑو یاترا کے راستے کوآج حتمی شکل دی جارہی ہے۔راجستھان میں یہ ابتدائی طور پر 21 دن کا منصوبہ تھا، لیکن اس میں کچھ تبدیلیاں بھی ہو سکتی ہیں کیونکہ راہل گاندھی گجرات میں انتخابی ریلیوں سے خطاب کریں گے۔یہ یاترا جھالاواڑ سے راجستھان میں داخل ہوگی اور دیگر شہروں کے علاوہ کوٹا، دوسا اور الور کا احاطہ کرے گی۔ بتایاجاتا ہے کہ کانگریس کو یاتراکی سیاست بھاگئی ہے، اس کے حوصلے بلند ہیں، کیونکہ اس کا دعویٰ ہے کہ بھارت جوڑو یاترا عوام میں کافی مقبول ہورہی ہے۔
وبھاکرشاستری کے اس ریمارک کی مخالفت کرتے ہوئے کہ جاری یاترا غیر سیاسی تھی، کانگریس کے سربراہ برائے راجستھان گووند سنگھ دوتاسرا نے کہا کہ پیدل مارچ مرکز میں بی جے پی کی آٹھ سالہ غلط حکمرانی کے خلاف ہے۔ انہوں نے کہا کہ کانگریس کے سابق صدر راہل گاندھی اس غلط حکمرانی کے خلاف آواز اٹھا رہے ہیں اور مرکزی حکومت پر دباؤ بڑھا رہے ہیں۔کانگریس نے کل کہا تھاکہ وہ اپنے اختیار میں تمام قانونی علاج کی پیروی کر رہی ہے جب بنگلورو کی ایک عدالت نے ٹویٹر کو ہدایت دی کہ وہ اپنے آفیشل ہینڈل اور کانگریس کی بھارت جوڑو یاترا کو میوزک کاپی رائٹ کی مبینہ خلاف ورزی پر بلاک کرے۔ پارٹی نے کہا کہ وہ کارروائی کے دوران موجود نہیں تھی اور اسے حکم نہیں ملا ہے۔ ساتھ ہی عدالت نے پارٹی کی طرف سے پوسٹ کی گئی تین ٹویٹس کوبھی ہٹانے کا حکم دیا۔ عدالتی حکم ایم آر ٹی میوزک کے دائر کردہ مقدمہ پر آیا جو فلم کے جی ایف چیپٹر 2 کے ساؤنڈ ٹریکس کا کاپی رائٹ ہولڈر ہے۔
کانگریس یہ دعویٰ بار بار کررہی ہے کہ بھارت جوڑو یاتراسے لوگ جڑ رہے ہیں کیونکہ وہ مرکزی سرکار کی سیاسی بے راہ روی سے پریشان ہیں۔ بھارت جوڑو یاترا کئی مسائل کااحاطہ کرتی ہے۔ راہل گاندھی بار بار کہتے آرہے ہیں کہ دیش کو طبقات میں منقسم نہیں ہونے دیا جائے گا۔ مہنگائی اور بے روزگاری کے ساتھ ساتھ کانگریس اپنی یاترا کے دوران فرقہ وارانہ اشتعال انگیزی اور تشدد کیخلاف بھی مسلسل آواز بلند کررہی ہے۔ راہل گاندھی کہہ رہے ہیں کہ دیش میں تمام طبقات مساوی حقوق کے مستحق ہیں اس لئے طبقات کو مذہب اور برادریوں کی بنیاد پر بانٹنے کی اجازت نہیں دیجائے گی۔ بتادیںکہ ’بھارت جوڑو یاترا ‘کنیاکماری سے شروع ہوئی ہے۔7ستمبر سے شروع ہوئی یاترا 150 دنوں کے بعد کشمیر میں اختتام پذیر ہوگی۔راہل گاندھی نے یاترا کے آغاز میں ہی کہا ہے کہ ہم آر ایس ایس اور بی جے پی کی طرح بھارت کے عوام کی آواز کو دبانا نہیں چاہتے، ہم بھارت لوگوں کی بات سننا چاہتے ہیں۔
