کانگریس نے اعلیٰ تعلیمی ریگولیٹری اداروں میں خالی اسامیوں کی نشاندہی کی، وی بی ایس اے بل پر اعتراضات اٹھائے

نئی دہلی، (یو این آئی) سینئر کانگریس لیڈر جے رام رمیش نے جمعرات کو ان کلیدی اعلیٰ تعلیمی ریگولیٹری اداروں میں حیران کن حد تک خالی آسامیوں کی بڑی تعداد” پر گہری تشویش کا اظہار کیا جبکہ مجوزہ وِکست بھارت شکشا ادھیشٹھان (وی بی ایس اے ) بل 2025 پر کانگریس پارٹی کے اعتراضات کی تفصیلات بھی پیش کیں۔سوشل میڈیا پلیٹ فارم ایکس پر جاری ایک بیان میں، رمیش نے کہا کہ یونیورسٹی گرانٹس کمیشن (یوجی سی ) اور آل انڈیا کونسل فار ٹیکنیکل ایجوکیشن (اے آئی سی ٹی ای ) جیسے اداروں میں خالی آسامیوں کا مسئلہ محکمہ اعلیٰ تعلیم سے متعلق پارلیمانی قائمہ کمیٹی برائے تعلیم کی سالانہ رپورٹ میں اجاگر کیا گیا ہے، جو ایک دن پہلے پیش کی گئی تھی۔انہوں نے کہا، "یہ تشویشناک خبر ایک ایسے وقت میں آئی ہے جب اعلیٰ تعلیم کے ریگولیشن کے ڈھانچے کی تشکیلِ نو کی تحریک پہلے ہی موجود ہے،” انہوں نے وی بی ایس اے بل کا حوالہ دیتے ہوئے کہا جو فی الحال پارلیمنٹ کی مشترکہ کمیٹی کے زیرِ غور ہے۔ رمیش نے ان سات اہم مسائل کا خاکہ پیش کیا جن کی نشاندہی پارٹی نے مجوزہ قانون سازی کی موجودہ شکل میں کی ہے۔کانگریس لیڈر کی جانب سے اٹھایا گیا ایک بڑا خدشہ ریاستی حکومتوں کے ساتھ مشاورت کی مبینہ کمی تھی۔ انہوں نے کہا، "وزارت نے اس بل کی تیاری میں ریاستی حکومتوں سے مشاورت نہیں کی ہے، باوجود اس کے کہ تعلیم متوازی فہرست میں ہے اور یہ بل براہ راست ریاستی یونیورسٹیوں پر اثر انداز ہوتا ہے۔” انہوں نے مزید دلیل دی کہ یہ بل ایک "آئینی تجاوز” ہے، یہ دعویٰ کرتے ہوئے کہ یہ یونین لسٹ کے اندراج 66 کے تحت پارلیمنٹ کے قانون سازی کے مینڈیٹ سے تجاوز کرتا ہے۔ رمیش کے مطابق، مجوزہ ڈھانچہ ریاستوں کے لیے مخصوص اختیارات میں بے جا مداخلت کرتا ہے، جو ممکنہ طور پر آئین کے وفاقی ڈھانچے کی خلاف ورزی ہے۔کانگریس نے مجوزہ ڈھانچے میں ایک مخصوص فنڈنگ کونسل کی عدم موجودگی پر بھی تنقید کی، اورواضح کیا کہ قومی تعلیمی پالیسی 2020 نے چار ستونوں کے ساتھ ہائر ایجوکیشن کونسل آف انڈیا کا تصور پیش کیا تھا۔