نئی دہلی، (یو این آئی) آل انڈیا نیشنل کانگریس کے ترجمان گورو ولبھ، بہار پردیش کانگریس کے سابق صدر انل کمار شرما اور راشٹریہ جنتا دل کے سینئر لیڈر اوپیندر پرساد نے آج یہاں بھارتیہ جنتا پارٹی کی رکنیت لے لی۔ بی جے پی کے مرکزی دفتر میں پارٹی کے جنرل سکریٹری ونود تاوڑے اور قومی میڈیا کے شریک انچارج سنجے میوکھ نے تینوں رہنماؤں کو رکنیت کی پرچیاں اور گلدستے دے کر پارٹی میں خوش آمدید کہا۔ تینوں لیڈروں کا خیرمقدم کرتے ہوئے مسٹر تاوڑے نے کہا کہ کانگریس اپنے ہی وجود کو تباہ کرنے پر تلی ہوئی ہے ۔ بہار میں کانگریس نے ریاستی قیادت سے مشورہ کیے بغیر کچھ ایسے فیصلے نافذ کیے ہیں، جس کی وجہ سے کانگریس کارکنان مایوس ہیں۔ بہار کے دونوں رہنما، جو عظیم اتحاد کی طاقت تھے ، ترقی یافتہ ہندوستان کے لیے وزیر اعظم نریندر مودی کے عزم میں شامل ہو گئے ہیں۔ اپنی صلاحیتوں اور ہنر کو بروئے کار لاتے ہوئے ترقی یافتہ ہندوستان کی مہم میں مزید تیزی آنے کی امید ہے ۔ اس موقع پر مسٹر گورو ولبھ نے کہا کہ کانگریس نے شری رام مندر میں پران پرتشٹھا کی دعوت کو ٹھکرا کر ٹھیک نہیں کیا۔ ان صنعت کاروں کو گالی دینا بالکل بھی مناسب نہیں ہے جو دن رات ملک کے لیے سرمایہ اور دولت پیدا کر رہے ہیں اور جنہیں سابق وزیر اعظم منموہن سنگھ کی پالیسیوں کی وجہ سے آگے آنے کا موقع ملا ہے ۔ غلط پالیسیوں کی وجہ سے مسائل کو غلط طریقے سے اٹھایا جا رہا ہے ۔ سناتن دھرم کو گالی دینے کے معاملے پر کانگریس کے سینئر لیڈروں کا خاموش بیٹھنا انتہائی قابل اعتراض بات ہے ۔ سیاسی پارٹیاں نظریہ کی بنیاد پر چلتی ہیں لیکن کانگریس ذاتی مخالفت پر چل رہی ہے جہاں نئی سوچ کی کوئی گنجائش نہیں ہے ۔ انہوں نے کہا کہ وہ بی جے پی میں وزیر اعظم نریندر مودی کی قیادت میں ہندوستان کو ترقی یافتہ بنانے میں ہر ممکن تعاون کریں گے ۔
مسٹر انل کمار شرما نے کانگریس کی قیادت پر سخت حملہ کرتے ہوئے کہا کہ کانگریس پارٹی فرقہ وارانہ سوچ رکھنے والے لیڈروں کے چنگل میں پھنسی ہوئی ہے ۔ کانگریس کے صدر ملک ارجن کھڑگے ، جو خود کو سیکولر کہتے ہیں اور سابق صدر سونیا گاندھی انتہائی فرقہ وارانہ سوچ رکھنے والے رہنما ہیں۔ اس کا ثبوت یہ ہے کہ ان لیڈروں نے اجودھیا کے شری رام جنم بھومی مندر میں رام للا کے پران پرتشٹھا کی تقریب کی دعوت کو ٹھکرا دیا تھا لیکن جب اٹلی کے شہر روم میں مدر ٹریسا کی سینٹ ہڈ پروگرام منعقد ہوا تو انہوں نے کانگریس کے دو عیسائی لیڈروں کو خصوصی نمائندے کے طور پر بھیجا تھا۔ انہوں نے کہا کہ مسٹر کھڑگے اتنے متعصب ہیں کہ وہ اپنی تقریروں میں کہتے ہیں کہ اگر مسٹر نریندر مودی اقتدار میں آئے تو سناتن آجائے گا۔ اس سے صاف ظاہر ہوتا ہے کہ دونوں لیڈروں کی ذہنی حالت انتہائی فرقہ پرست اور سناتن مخالف ہے ۔ مسٹر شرما نے کہا کہ مسٹر راہل گاندھی کہتے ہیں کہ وہ نظریات کی جنگ لڑ رہے ہیں۔ وہ واقعی نظریات کی جنگ لڑ رہے ہیں ۔ درحقیقت اس ملک میں دو طرح کے نظریے ہیں – ایک جو سناتن دھرم کو تباہ کرتا ہے اور دوسرا جو سناتن دھرم کو بچاتا ہے ۔ مسٹر راہل گاندھی اس نظریے کے لیے لڑ رہے ہیں جو سناتن کو تباہ کرتاہے ۔ مسٹر گاندھی کہتے ہیں کہ وہ محبت کی دکان لگاتے ہیں۔ محبت کی دکان کی ضرورت نہیں جہاں لوگ امن اور ہم آہنگی سے رہ رہے ہوں، بلکہ ایسی جگہ پر دکان لگائیں جہاں نفرت اور تشدد ہو۔ انہوں نے کہا کہ ہندوستان کی روح ابدی ہے ۔ اگر سناتن نہیں رہے گا تو ہندوستان ایک بے جان ملک رہے گا۔ مسٹر اوپیندر پرساد نے کہا کہ انہوں نے اپنی سیاست بھارت رتن ایوارڈ یافتہ کرپوری ٹھاکر کی تحریک سے شروع کی اور ڈاکٹر رام منوہر لوہیا کی پیروی کی۔ ڈاکٹر لوہیا نے اقربا پروری اور بدعنوانی کو مسئلہ بنایا تھا۔ کرپوری ٹھاکر کے بعد بہار میں لالو پرساد یادو اور اتر پردیش میں ملائم سنگھ یادو نے اقربا پروری اور بدعنوانی کو اس حد تک فروغ دیا کہ سوشلزم تباہ ہو گیا۔ ان دونوں لیڈروں کی وجہ سے ہی ہندوستان میں سوشلزم کو دھکا لگا ہے ۔ مسٹر لالو یادو انتخابات میں ٹکٹ بیچ رہے ہیں۔ ایسی گراوٹ پہلے کبھی، کہیں نہیں دیکھی گئی۔ اس موقع پر مسٹر تاوڑے نے کہا کہ کانگریس میں خواتین کی طاقت کا احترام نہیں کیا جاتا ہے ۔ ایک طرف جہاں وزیر اعظم نریندر مودی ا سٹیج پر سب کے سامنے ایک عام بزرگ خاتون کے پاؤں چھونے سے نہیں ہچکچاتے ، وہیں کانگریس خواتین کی توہین کرنے سے باز نہیں آتی۔ مسٹر تاوڑے نے کہا کہ چھتیس گڑھ اسمبلی میں اپوزیشن لیڈر نے وزیر اعظم مودی کا سر توڑنے کی بات کی ہے ۔ کانگریس لیڈر کو سمجھنا چاہئے کہ ملک کے عوام مسٹر مودی کو چاہتے ہیں۔ انہیں سوچنا چاہیے کہ عوام ان کے خلاف لاٹھیاں اٹھانے والوں کا کیا حشر کریں گے ۔ کچاٹیوو جزیرے کے معاملے میں کانگریس کے اتحادیوں نے بھی کہنا شروع کر دیا ہے کہ کانگریس نے تمل ناڈو کو دھوکہ دیا ہے ۔
