ریاض/میڈرڈ،3 مارچ (یواین آئی )سعودی عرب میں قائم امریکی سفارتی تنصیبات پر ایرانی ڈرون حملوں کے بعد النصر کلب کے اسٹار کھلاڑی کرسٹیانو رونالڈو اپنے نجی طیارے میں میڈرڈ روانہ ہو گئے ہیں۔ فلائٹ ٹریکر کے مطابق 41 سالہ فٹ بالر کا طیارہ رات 8 بجے ریاض سے اڑا اور مصر و بحیرہ روم کی فضائی حدود استعمال کرتے ہوئے رات 1 بجے اسپین کے دارالحکومت میڈرڈ پہنچا۔ ایرانی سرکاری میڈیا نے تصدیق کی ہے کہ گزشتہ رات ریاض میں امریکی سفارتی ہیڈکوارٹر پر دو ڈرون حملے کیے گئے، جس سے سیکیورٹی کی صورتحال انتہائی سنگین ہو گئی۔ حملوں کا سلسلہ صرف سعودی عرب تک محدود نہیں رہا، بلکہ بحرین میں بھی ایک عمارت کو نشانہ بنایا گیا ہے۔مشرقِ وسطیٰ میں کشیدگی کے چوتھے روز داخل ہونے پر سینکڑوں غیر ملکی باشندے اپنی حفاظت کے پیشِ نظر خطے سے نکل رہے ہیں۔ رونالڈو نے سفر کے لیے اپنا 61 ملین پاؤنڈ مالیت کا نجی طیارہ استعمال کیا۔رونالڈو ریاض میں اپنی منگیتر جارجینا روڈریگز اور 5 بچوں کے ساتھ رہائش پذیر تھے۔ تاہم، تا حال یہ واضح نہیں ہو سکا کہ ان کے اہل خانہ بھی اسی پرواز میں ان کے ہمراہ تھے یا نہیں۔
